លក្ខខណ្ឌងាយៗ អាចខ្ចី និងអានសៀវភៅរាប់ពាន់ក្បាល នៅទូតអាមេរិក (មានវីដេអូ)

2018-07-03 04:45:56
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្នវត្តមាន នៃបណ្ណាល័យនានា កំពុងចូលរួមចំណែកយ៉ាងសំខាន់ ដើម្បីលើកកម្ពស់ការអាននៅកម្ពុជា។ American Center មានទីតាំងក្នុងស្ថានទូតអាមេរិក ជាបណ្ណាល័យល្បី និងទំនើបមួយ ដែលមានសៀវភៅសំបូរបែបរាប់ពាន់ក្បាល។

ទិដ្ឋភាពខាងក្នុង (រូបផ្តល់ឲ្យដោយស្ថានទូតអាមេរិក)

ក្នុងបទសម្ភាសជាមួយ Sabay ក្នុងបរិវេណទូត លោក អេង ប៉ូ អ្នកឯកទេសទទួលបន្ទុកផ្នែកធនធានព័ត៌មាន នៃស្ថានទូតសហរដ្ឋអាមេរិកនៅកម្ពុជា បានប្រាប់ថា បណ្ណាល័យនេះបើកជាសាធារណៈ មានសៀវភៅសរុបប្រមាណជាង ២ ៥០០ក្បាល។

សៀវភៅក្នុងបណ្ណាល័យ (រូបផ្តល់ឲ្យដោយស្ថានទូតអាមេរិក)

ភាគច្រើន នៃសៀវភៅនៅទីនេះ បោះពុម្ពផ្សាយជាភាសាអង់គ្លេស តាមផ្នែកខុសៗគ្នា ពិសេសសៀវភៅទាក់ទងនឹងទំនាក់ទំនង និងប្រវត្តិសាស្ត្ររបស់សហរដ្ឋអាមេរិក។

លោក អេង ប៉ូ (ខាងឆ្វេង) រូបផ្តល់ឲ្យដោយស្ថានទូតអាមេរិក

ក្រៅពីនេះក៏មានសៀវភៅ ឯកសារ ឬទស្សនាវដ្ដីតិចតួចជាភាសាខ្មែរ មានចំនួនប្រមាណ ១០ក្បាល។

លោកបន្តថា មានបែបបទងាយស្រួល ដែលសិស្សនិស្សិត អាចបំពេញ មុនចូលអាន ឬខ្ចីសៀវភៅនៅទីនេះ ដោយគ្រាន់តែបង្ហាញកាតសិស្ស ឬនិស្សិត និងអត្តសញ្ញាណប័ណ្ណជនជាតិខ្មែរ ជាការស្រេច។

ដោយហេតុថា មានសៀវភៅថ្មីៗ រួមនឹងបរិយាកាសអំណោយផលដល់ការអាន ជាប្រចាំខែតួលេខ នៃសាធារណជន ភាគច្រើនជាសិស្សនិស្សិត បានចូលអាន មានប្រមាណជាង ២០០នាក់។

សូមបញ្ជាក់ថា សាធារណជនអាចចូលអានសៀវភៅនៅក្នុងស្ថានទូតសហរដ្ឋអាមេរិកនៅកម្ពុជា ដែលមានអាសយដ្ឋាន នៅអគារលេខ១ ផ្លូវលេខ ៩៦ សង្កាត់វត្តភ្នំ ខណ្ឌដូនពេញ រាជធានីភ្នំពេញ ឬទាក់ទងតាមទូរសព្ទលេខ ០២៣ ៧២៨ ០០០ នៅរៀងរាល់ម៉ោងធ្វើការ។

នៅទីនេះ មិនត្រឹមតែអានសៀវភៅ លោកអ្នក ក៏អាចចូលរួម ឬទស្សនាវីដេអូឯកសារ និងស្ដាប់ការចែករំលែកបទពិសោធន៍ល្អៗ ពីយុវជនជាច្រើនផងដែរ។

ខាងក្រោមនេះ ជាវីដេអូខ្លី របស់សិស្សវិទ្យាល័យ២រូប ចែករំលែកចំណេះដឹង នៃការអានសៀវភៅ ក្នុងបរិវេណស្ថានទូត មានអ្នកខ្លះទើបបានចូលលើកទី១។

អត្ថបទ៖ ពៅ រក្សា