គន្លឹះរៀនជំនាញកម្រ១ មិនសូវមានអ្នកស្គាល់ របស់កូនខ្មែរម្នាក់ តស៊ូរហូតចប់បណ្ឌិត ពីសាលាល្បីនៅកូរ៉េ (មានវីដេអូ)

2018-08-01 02:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មុនខ្ញុំទៅរៀនជំនាញនេះ មានអ្នកឆ្ងល់ច្រើនថា មុខវិជ្ជាមានច្រើន រៀនចប់សំបូរការងារធ្វើម៉េចមិនរៀន? ទៅរៀនអី ជំនាញមិនដែលមានគេស្គាល់អីចឹង? រៀនចប់យកធ្វើអីកើត?

នេះជាសំណួរដែលមានអ្នកសួរដដែលៗច្រើន ទៅកាន់ សេរីវ័ទ្ធ តាំងពីចាប់ផ្ដើម រហូតដល់រៀនចប់។ លោកយឿន សេរីវ័ទ្ធ ជានិស្សិតខ្មែរ ដែលទើបបញ្ចប់ថ្នាក់បណ្ឌិត ផ្នែកបច្ចេកវិជ្ជាជីវវិទ្យា ដែលជាជំនាញដ៏កម្រ១ ដែលមិនសូវមានអ្នកស្គាល់។

លោកបន្តថា ជំនាញនេះ នៅពេលរៀនចប់ អាចផ្ដល់ប្រយោជន៍ច្រើនបំផុត លើសការរំពឹងទុក ព្រោះវាមានទាក់ទងគ្នាជិតស្និត ទៅនឹងផ្នែកកសិកម្ម ការរកសារធាតុនៃប្រភេទថ្នាំពុលក្នុងបន្លែ ផ្លែឈើ និងសុវត្ថិភាពចំណីអាហារ។

យឿន សេរីវ័ទ្ធ បានបញ្ចប់ការសិក្សា ពីសកលវិទ្យាល័យល្បី១ ឈ្មោះ Chunnam national university ក្នុងទីក្រុងក្វាងជូ នៃសាធារណរដ្ឋកូរ៉េខាងត្បូង។

សកលវិទ្យាល័យកូរ៉េនេះ មានឈ្មោះល្បីក្នុងស្រុក ផ្នែកកសិកម្ម និងលើឆាកអន្តរជាតិ ដែលមានដៃគូសកលវិទ្យាល័យជាង ១៥០ប្រទេសក្នុងពិភពលោក។

រំលឹកប្រវត្តិសិក្សាសង្ខេបពេលនៅស្រុកខ្មែរ

ជាកូនអ្នកស្រុកបាត់ដំបង យឿន សេរីវ័ទ្ធ បញ្ជាក់ថា លោកជានិស្សិត រៀនថ្នាក់បរិញ្ញាបត្រ ផ្នែកកសិឧស្សាហកម្ម នៅសកលវិទ្យាល័យភូមិន្ទភ្នំពេញ (RUPP)។

បើនិយាយពីប្រវត្តិសិក្សា និស្សិតខ្មែរចេះ២ ភាសារូបនេះ ប្រាប់ថា នៅក្រោយពេលចប់បរិញ្ញាបត្រ លោកបានទទួលអាហារូបករណ៍ ពីសកលវិទ្យាល័យ RUPP នៃប្រទេសកម្ពុជា សម្រាប់បន្តថ្នាក់ក្រោយឧត្ដមសិក្សា (Master Degree) ទៅសាធារណរដ្ឋកូរ៉េខាងត្បូង។

ដោយសារចិត្តស្រលាញ់ និងការតាំងចិត្តខ្ពស់ ជំរុញឲ្យលោកចង់បន្តរៀនមុខវិជ្ជាដ៏ពិបាកនេះ បន្ទាប់មកទៀត លោកក៏បានរៀនចប់ កាន់សញ្ញាប័ត្រថ្នាក់បណ្ឌិតពីបរទេស វិលមកស្រុកខ្មែរវិញដោយជោគជ័យ។

រំលឹកដល់ពេលសិក្សានៅកូរ៉េខាងត្បូងចាប់យកជំនាញកម្រ

អំលុងពេលរៀនលោកបានចេញបំពេញការងារ ដើម្បីបានចំណូលខ្លះ និងបទពិសោធន៍នានា និងដើម្បីបានអនុវត្តមុខវិជ្ជារៀនផង។

ដោយសារសមត្ថភាពខ្ពស់ផង នៅពេលនោះ លោកត្រូវបានជ្រើសរើសឲ្យចូលធ្វើការនៅក្នុងមជ្ឈមណ្ឌលជាតិធំ១ ដែលមាននាទីផ្ដល់អាជ្ញាប័ណ្ណដល់កសិករ នៅក្នុងប្រទេសកូរ៉េខាងត្បូង។

ពាក្យរំលឹកខ្លួនឯង ការលំបាក និងឧបសគ្គ គឺតែងមានបង្កប់ឱកាស។

មិនខុសទេ មួយឃ្លាគឺត្រឹមត្រូវមែន។ នេះជាការលើកឡើងរបស់អតីតនិស្សិតខ្មែរនៅកូរ៉េ។ កាលនោះ វាហាក់ដូចជាហត់បន្តិច ព្រោះលោកត្រូវរៀនផង និងចេញធ្វើការនៅស្រុកគេ។

ប៉ុន្តែ លោក យឿន សេរីវ័ទ្ធ ប្រាប់ថា វាហាក់ដូចជាល្អម្យ៉ាង ព្រោះវាជាឱកាសអនុវត្តផ្ទាល់ ដោយប្រើប្រាស់ឧបករណ៍ទំនើប សិក្សាស្រាវជ្រាវ មិនងាយមាន ដែលនេះ គឺជាជំនួយដល់ការសិក្សាប្រភេទមុខវិជ្ជា ផ្នែកបច្ចេកវិជ្ជាជីវវិទ្យា ជាផ្នែកសំខាន់នៃវិទ្យាសាស្ត្រជីវិត។

ខាងក្រោមនេះជាវីដេអូ គន្លឹះបន្ថែម របស់ លោកយឿន សេរីវ័ទ្ធ អតីតនិស្សិតខ្មែរ រៀនចប់ថ្នាក់បណ្ឌិត ផ្នែកបច្ចេកវិជ្ជាជីវវិទ្យា ពីសកលវិទ្យាល័យល្បី Chunnam national university ក្នុងទីក្រុងក្វាងជូ នៃសាធារណរដ្ឋកូរ៉េខាងត្បូង។