តួឯកស្រទន់ ទម្លាយរឿងគំនាបគ្រួសារមុនចូលសិល្បៈ

2018-08-16 00:05:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្ន កញ្ញា នៅ ម៉ារីសា តួឯកស្រទន់ ក្នុងរឿង «ស្រទន់មន្តស្នេហ៍» និងជាពិធីការិនី ឯករាជ្យម្នាក់ដែលមានសម្រស់ស្រស់ស្អាត កាលដើមនៃការឈានជើងចូលក្នុងវិស័យសិល្បៈមិនត្រូវបានគាំទ្រ ឬលើកទឹកចិត្តពីគ្រួសារឪពុកម្ដាយនោះទេ ដោយសារខ្លាចក្រែងសុវត្ថិភាព និងចង់ឱ្យកញ្ញាមានជំនាញ ឬការងារស៊ីវិលច្បាស់លាស់ជាងតារាសម្ដែង។

ដោយឧបនិស្ស័យ និងទេពកោសល្យ និងភាពស្រស់ស្អាតបែបសាមញ្ញរបស់កញ្ញា ម៉ារីសា បាននាំកញ្ញាឱ្យបោះជំហានចូលក្នុងវិស័យសិល្បៈដោយឥតព្រាងទុក ដែលគិតមកដល់ពេលនេះមានរយៈពេលជាង ៧ឆ្នាំ មកហើយ តាំងពីពេលជាយុវតីវ័យ ១៨ ឆ្នាំប៉ុណ្ណោះ។ កញ្ញា រៀបរាប់ថា៖ «កាលពីនៅក្មេងៗ ខ្ញុំតែងបានចាស់ទុំ និយាយសរសើរ ហើយថា ខ្ញុំគួរតែទៅធ្វើតួសម្ដែង តួកុនអីចឹងទៅ ដល់ឮគាត់និយាយចឹង ក៏មិនបានគិតអ្វីច្រើនដែរ តែយូរៗ វាហាក់ដូចជាមានអ្វីជំរុញឱ្យខ្ញុំឈានចូលក្នុងវិស័យនេះដោយមិនដឹងខ្លួន»។

ជាតួសម្ដែងថ្ងៃដំបូង ធ្វើឱ្យកញ្ញាមានអារម្មណ៍ថាជារឿងនឹកស្មានមិនត្រូវ ហើយជាក់ស្ដែង កញ្ញាមានការភ័យខ្លាចនឹងមនុស្សជុំវិញខ្លួនដែលជាក្រុមការងារ ដែលមានមុខមាត់ផ្សេងៗគ្នា នៅជុំវិញខ្លួន ដែលកញ្ញា មិនដឹងថាពួកគាត់ជាអ្នកណាសោះ។ ហេតុតែស្រលាញ់ និងចង់យកឈ្នះខ្លួនឯងក្នុងការបង្ហាញសមត្ថភាពសម្ដែងកញ្ញាក៏ធ្វើបាន និងទទួលបានការកត់សម្គាល់តាំងពីពេលផ្ដើមក្នុងវិស័យភាពយន្តនេះរហូតមក៕

ចង់ដឹងកាន់តែច្បាស់ តោះទស្សនាវីដេអូសម្ភាសជាមួយកញ្ញា នៅ ម៉ារីសា ដូចខាងក្រោម៖

អត្ថបទ៖ Sunny