បើកបង្ហាញរបររកស៊ី តារាប្រុស ៥ដួង ក្រោយលែងខ្វល់ខ្វាយសិល្បៈច្រើនឆ្នាំ

2018-08-29 04:20:34
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតតារា៥រូប រួមមាន លោក លាន អាព្រីលគីនីន ណាំ បុណ្ណារ័ត្ន គង់ សង្វាដានី កែវ បូរ៉ា និងលោក ឃុំ ប៉ុណ្ណាដែត បានឃ្លាតឆ្ងាយពីសិល្បៈអស់ពេលច្រើនឆ្នាំ ដោយពួកគេបានរៀបការមានប្រពន្ធកូនអស់ហើយ និង ងាកមកបើកមុខរបររកស៊ីវិញ ។

១. លាន អាព្រីលគីនីន

ក្រោយពីបាត់មុខពីសិល្បៈអស់ពេលច្រើនឆ្នាំ អតីតពិធីករ និងតារាចម្រៀងល្បីឈ្មោះ បានងាកមកបើកមុខជំនួញជាច្រើន។ ក្នុងនោះ កាលពីឆ្នាំ២០១៧ ត្រូវបានមិត្តភ័ក្កិក្នុងសិល្បៈទម្លាយថា លោកមានក្រុមហ៊ុនច្រើនក្នុងដៃ ដូចជា ក្រុមហ៊ុនផ្គត់ផ្គង់សម្ភារៈសំណង់ ក្រុមហ៊ុនសាងសង់ផ្លូវ ក្រុមហ៊ុន Media ហាងបោះពុម្ព ហាងផឹកស៊ី នៅផ្សារកុងតឺន័រ ព្រមទាំងបើកហាងលក់គ្រឿងថែរក្សាសម្រស់ ដែលប្រពន្ធលោកជាអ្នកមើលការខុសត្រូវ។

ប៉ុន្តែគេមិនច្បាស់ថា ហាងទាំងអស់នេះ នៅដំណើរការដោយរលូន ឬបានបិទខ្លះនោះទេ។ លោកក៏មានកូនប្រុសម្នាក់ឈ្មោះ លាន បញ្ចនីត បានដើរតាមគន្លង ប្រលូកក្នុងសិល្បៈចម្រៀងផងដែរ។

២. ណាំ ប៊ុណ្ណារ័ត្ន

ក្រោយពីបែកធ្លាយដំណឹងមានប្រពន្ធកូនរួចមក ម្ចាស់បទ "ពេលវេលាមិនស័ក្ដិសម" ងាកមកបើកហាងភេសជ្ជៈ និងឆាប់ៗនេះ បើក Studio ទំនើបមួយក្នុងរាជធានីភ្នំពេញ។ តារាមានកូនប្រុសម្នាក់រូបនេះ ប្រាប់ថា លោកបានសុំឈប់ច្រៀងនៅផលិតកម្ម M ដែលជាទ្រនំលោកធ្លាប់ជ្រកហើយ ត្រឹមធ្វើជានិពន្ធបទភ្លេងប៉ុណ្ណោះ។ ក្រៅពីនេះគេឃើញភរិយាស្រស់ស្អាតរបស់លោក បន្ថែមរបរលក់គ្រឿងថែរក្សាសម្ផស្សតាមអនឡាញ។

៣. គង់ សង្វាដានី

បន្ទាប់ពីផលិតកម្ម SSB បិទទ្វារ សកម្មភាពសិល្បៈរបស់ម្ចាស់បទ "មិនបានត្រៀមចិត្ត" ក៏ស្ងប់ស្ងាត់ ធ្វើឲ្យទស្សនិកជននឹករលឹកលោកជាខ្លាំង។ លោកបានចូលហ៊ុនជាមួយបងប្រុស បើកហាងលក់បបរមាន់ស្រែ នៅម្តុំទួលគោក និងធ្វើជាអ្នកថតរូបប្រចាំហាងបងស្រីរបស់ខ្លួន។

នៅពេលរៀបការជាមួយកូនស្រីអ្នកជំនួញម្នាក់ ថ្មីៗនេះ គេឃើញលោកបន្ថែមរបរមួយទៀត គឺបើកហាងលក់ភេសជ្ជៈ និងកាហ្វេនៅម្តុំ TK។

៤. កែវ បូរ៉ា

នៅពេលជាប់ជា Freshy Boy ចំណាត់ថ្នាក់លេខ១ បូរ៉ា លេចធ្លោខ្លាំងក្នុងសិល្បៈ ដោយបានថតស្ប៉ត សម្ដែងភាពយន្ត MV យ៉ាងច្រើនទៀតផង។ តែក្រោយមកក៏ស្ងាត់ មិនដឹងបាត់តារារូបនេះទៅណា។ ចុងក្រោយស្រាប់តែធ្លាយព័ត៌មានថា លោកមានប្រពន្ធ និងកូនម្នាក់ ដោយពេលនេះ បូរ៉ា បានបើកហាងលក់បុកល្ហុង។

៥. ឃុំ ប៉ុណ្ណាដែត

ជាច្រើនឆ្នាំមកហើយ លោក ឃុំ ប៉ុណ្ណាដែត បានទម្លាក់ចោលអាជីពជាតារាចម្រៀង ទៅរកស៊ីជំនួញដីធ្លី និងសំណង់ផ្ទះល្វែង ដែលជាមុខជំនួញមួយធ្វើឲ្យសេដ្ឋកិច្ចគ្រួសារអ្នកសិល្បៈមួយគូនេះកាន់តែមានទ្រព្យច្រើនជាងកាលប្រឡូកសិល្បៈ។ ក្រៅពីនេះ លោកបានបើកហាងផឹកស៊ីនៅជិតស្ថានទូតរុស្សី ចំណែកភរិយារបស់លោក អ្នកនាង យក់ ឋិតរដ្ឋា បើកលក់គ្រឿងសម្អាង បន្ថែមពីអាជីពអ្នកចម្រៀង។