លើកដំបូង ក្នុងពេលជាងមួយទសវត្ស ដែល Messi មិនស្ថិតក្នុងបេក្ខភាពប្រជែងពានកីឡាករល្អបំផុតប្រចាំឆ្នាំ

2018-09-03 14:13:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងថ្ងៃនេះ FIFA បានប្រកាសអំពីបេក្ខភាពទាំងបីដែលប្រជែងយកពានរង្វាន់កីឡាករល្អបំផុតប្រចាំឆ្នាំ ២០១៨។ កីឡាករទាំងបីរួមមាន Cristiano Ronaldo, Luka Modric និង Mohamad Salah។ ការណ៍នេះ ធ្វើឲ្យខ្សែប្រយុទ្ធ Lionel Messi នឹងមិនមានឱកាសក្នុងការប្រជែងពានរង្វាន់មួយនេះ ជាលើកដំបូង ក្នុងរយៈពេល ១២ ឆ្នាំ។

Lionel Messi ចាប់ផ្ដើមមានមុខក្នុងការដណ្ដើមពានកីឡាករល្អបំផុតរបស់ FIFA ដែលកាលនោះមានឈ្មោះថា FIFA World Player កាលពីឆ្នាំ ២០០៧។ នៅពេលនោះ កីឡាករទទួលបានលេខ ២ និងបន្តទទួលបានចំណាត់ថ្នាក់ដូចគ្នា នៅមួយឆ្នាំបន្ទាប់។ នៅឆ្នាំ ២០០៩ ខ្សែប្រយុទ្ធអាហ្សង់ទីនបានឈ្នះពានរង្វាន់មួយនេះ។

នៅពេលដែល FIFA World Player បានរួមបញ្ចូលជាមួយ Ballon D'or នៅឆ្នាំ ២០១០ ខ្សែប្រយុទ្ធ Messi នៅតែបន្តធ្វើជាម្ចាស់ពានរង្វាន់មួយនេះ ហើយបន្តគ្រងតំណែងនៅ ២ឆ្នាំបន្ទាប់។

នៅឆ្នាំ ២០១៣ និង ២០១៤ Lionel Messi បានត្រឹមលេខ ២ ខណៈ Cristiano Ronaldo គឺជាអ្នកឈ្នះក្នុងអំឡុងពេលនោះ។ ទោះជាយ៉ាងណា នៅឆ្នាំ ២០១៥ ខ្សែប្រយុទ្ធអាហ្សង់ទីនបានឈ្នះពានរង្វាន់នេះម្ដងទៀត។

នៅឆ្នាំ ២០១៦ និង ២០១៧ កីឡាករបានបន្តឈរលេខ ២ នៅពីក្រោយ Cristiano Ronaldo។ ក្នុងឆ្នាំ ២០១៨ ខ្សែប្រយុទ្ធមិនបានស្ថិតក្នុងបេក្ខភាពទាំងបីដើម្បីប្រជែងរង្វាន់កីឡាករល្អបំផុតប្រចាំឆ្នាំរបស់ FIFA។

កាលពីរដូវកាល ២០១៧/១៨ Messi បានឈ្នះពានលីគកំពូលអេស្ប៉ាញ, ពាន Copa Del Rey ព្រមទាំងឈ្នះពានរង្វាន់ Pichichi និង ស្បែកជើងមាស។ យ៉ាងនេះក្ដី ការណ៍ដែល Barcelona ត្រូវបានទម្លាក់ដោយ Roma ក្នុង Champions League ក្នុងវគ្គ ៨ ក្រុម និងអាហ្សង់ទីន ចាញ់បារាំងក្នុងវគ្គ ១៦ ក្រុមក្នុង World Cup អាចជាកត្តាមួយដែល Messi មិនបានជាប់ឈ្មោះស្ថិតចំណោមបេក្ខភាពទាំងបីដូច្នេះ៕