ខាំ ភូរិ ត្រៀមថតរឿងថ្មី ចំណងជើង «ខោល» លើកកម្ពស់សិល្បៈបុរាណខ្មែរឱ្យយុវវ័យបានស្គាល់

2018-09-04 09:09:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តភាគថ្មី ចំណងជើង «ខោល» រៀបចំគម្រោងផលិតជិត២ឆ្នាំមកហើយ ក្រុមការងារ លោក ខាំ ភូរិ ក៏បន្តការស្រាវជ្រាវជាង ៦ខែ ហើយ សរសេរ និង តែងនិពន្ធជាង ១ឆ្នាំ កន្លងមកហើយ ទើបប្រកាសរួចរាល់នៅថ្ងៃនេះ ហើយត្រៀមខ្លួនសម្រាប់ការផលិតក្នុងពេលឆាប់ៗនេះ។

លោក ខាំ ភូរិ

ខ្សែភាពយន្តរឿងភាគ «ខោល» នឹងនាំអច្ឆរិយភាព ល្ខោនខោល ពិសេសរសជាតិស្នេហា សិល្បករខោល និងនារីក្រមុំម្នាក់ក្នុងសម័យលង្វែក ស្នេហាមួយនេះ ក៏បន្តចាំជាតិ រហូតក្នុងសម័យថ្មីមួយទៀត។ លោក ខាំ ភូរិ បញ្ជាក់ថា ភាពយន្តភាគនេះលោកធ្លាប់មានគំនិតថាចង់ផលិតជិត ២ឆ្នាំ មកហើយ ដោយមានការជំរុញលើកទឹកចិត្ត រូបលោក និងក្រុមការងារបានចុះស្រាវជ្រាវពីប្រវត្តិពិត ទម្រង់ និងលក្ខណៈរបស់ល្ខោនខោល តាំងពីវត្តស្វាយអណ្ដែត និងជួបជាមួយព្រឹទ្ធាចារ្យ សាស្ត្រាចារ្យជំនាញខាងផ្នែកល្ខោនខោល ពីសាលាភូមិន្ទវិចិត្រសិល្បៈ ដើមរៀបចំជាគ្រោងរឿង និងសរសេរតែងនិពន្ធបន្ថែមជាអត្ថបទភាពយន្ត។

រូបស្រោមមុខ (ខ្មុក) តួអង្គ «ល្ខោនខោល»

ទស្សនៈនៃការបញ្ចូលសាច់រឿងមនោសញ្ចេតនា ជាមួយសិល្បៈវប្បធម៌ជាការចូលរួមចំណែកមួយក្នុងការលើកស្ទួយតម្លៃវប្បធម៌ជាតិខ្មែរ ហេតុនេះហើយទើបរូបលោក មានឆន្ទៈចង់បង្ហាញល្ខោនខោលក្នុងភាពយន្តបែបនេះ។ "ខ្ញុំ និងក្រុមការងារផលិត ពិសេសក្រុមអ្នកតែងនិពន្ធសេនារីយ៉ូកុនបានធ្វើការជាច្រើនដើម្បីរួមផ្តុំគំនិត ទស្សនៈ រួមគ្នាផលិតបានជាសាច់រឿង «ខោល» មួយនេះឡើងមក សម្រាប់ជាចំណីអារម្មណ៍ រួមទាំងជាចំណេះដឹងទាក់ទងនឹង ល្ខោន «ខោល»"។

រូបលោក ព្រឹទ្ធាចារ្យ ល្ខោនខោល

យ៉ាងណាក្ដី លោក ខាំ ភូរិ មិនអាចធានាថា ភាពយន្តនេះនឹងល្អប្រៀបធៀបនឹងប្រទេសជិតខាងឡើយ លោក គ្រាន់តែព្យាយាមផលិតភាពយន្តនេះតាមលទ្ធភាព ដោយសង្ឃឹមថា វាជាការចូលរួមចំណែកតូចមួយក្នុងវិស័យសិល្បៈ និងដើម្បីជាការលើកស្ទួយតម្លៃវប្បធម៌ជាតិផងដែរ៕