អ្នកនិពន្ធ សុខ ចាន់ផល ប្រកាសឈប់តែងទំនុកបទចម្រៀងថ្មីទៀតហើយ

2018-09-13 10:08:43
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកនិពន្ធ សុខ ចាន់ផល បានតែងបទចម្រៀង សម្រាប់ផលិតកម្ម ហង្សមាស រាប់រាយបទមកហើយ បើគិតតាំងពីចាប់ផ្ដើម រហូតមកដល់បច្ចុប្បន្ន ដែលបទចម្រៀងចុងក្រោយរបស់លោកនិពន្ធ សម្រាប់ភាពយន្ត រឿង «សង្សារ ១៤ ថ្ងៃ» ចំណងជើងថា «ខ្ញុំពីមុន» ច្រៀងដោយ កញ្ញា ឈិត សុវណ្ណបញ្ញា។

បទ «ខ្ញុំពីមុន» ច្រៀងដោយ កញ្ញា ឈិត សុវណ្ណបញ្ញា

ស្រាប់តែ លោក សុខ ចាន់ផល ប្រកាសក្នុងបណ្តាញសង្គម Facebook ផ្លូវការរបស់ខ្លួនថារូបលោកឈប់តែងទំនុកចម្រៀងថ្មីទៀតឡើយ បណ្តាលឱ្យអ្នកគាំទ្រជាច្រើនមានការងឿងឆ្ងល់ ពិសេសសោកស្ដាយស្នាដៃតែងនិពន្ធរបស់លោក។ ភ្លាមៗ Sabay ក៏បានទទួលការស្រាយបំភ្លឺថា កាលដែលរូបលោកប្រកាសឈប់តែងទំនុកបទចម្រៀងថ្មីជាការពិត តែលោកមិនឈប់ទាំងស្រុងនោះទេ រូបលោក ក៏នៅតែបន្តការតែងទំនុកថ្មី តែសម្រាប់តែបទចម្រៀងក្របភាពយន្ត ឬសម្រាប់ប្រលោមលោកប៉ុណ្ណោះ។

លោក សុខចាន់ផល និងតួរឿង «សង្សារ ១៤ថ្ងៃ»

ចំណែកឯកចំនួនបទចម្រៀង ដែលរូបលោកទទួលតែងនិពន្ធ គឺអាចត្រឹមតែ ១ បទ ឬ ២ បទ ប៉ុណ្ណោះ ក្នុងមួយឆ្នាំ។ ការតាំងចិត្តបែបនេះ អ្នកនិពន្ធ សុខ ចាន់ផល ពន្យល់ថាដើម្បីសម្រិតសម្រាំងយកគុណភាពនៃបទចម្រៀងថ្មី។ រូបលោក ក៏មានគោលបំណង ថា ចម្រៀងមួយបទ ដែលរូបលោកនឹងតែងនិពន្ធទំនុក សម្រាប់ផ្សារភ្ជាប់ ឬជាគ្រឹះនៃភាពយន្តថ្មីតែម្ដង គឺថា រូបលោកចង់ចាប់ផ្ដើមការផលិតបទចម្រៀង ជាមួយភាពយន្តតែម្ដង ដូចកាលសម័យសង្គម ដែលសិល្បករល្បីៗ ដូចលោក ស៊ីន ស៊ីសាមុត ជាដើមតែងអនុវត្ត គឺចម្រៀងមួយបទរឿងមួយដែរ៕