មូលហេតុសេះពូល A អវត្តមានប្រកួតប្រណាំងសេះនៅខែនេះ

2018-09-18 04:09:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតប្រណាំងសេះ ពានរង្វាន់ Smart Land and Home Champion ប្រចាំខែកញ្ញា នៅលើទីលាន SCT Sport Complex របស់ក្រុមហ៊ុន 7NG ទឹកដីវិហារសួគ៌នោះ បានបញ្ចប់ហើយកាលពីចុងសប្ដាហ៍កន្លងទៅ។

សម្រាប់ខែនេះ សេះមាន២ពូល គឺពូលC និងពូល D ខណៈដែលពូល A វិញ ដែលពោរពេញដោយសេះលំដាប់អន្តរជាតិ មិនមានការប្រណាំងឡើយ។ មូលហេតុ ត្រូវបានលោក អឿន សុផល គណៈកម្មការរៀបចំការប្រកួតអះអាងថា សេះលំដាប់អន្តរជាតិ ក្នុងពូលA ត្រូវការបំប៉ន សុខភាព សម្រាប់ការប្រកួតនៅខែបន្ទាប់ ក៏ដូចជាថែទាំឈានទៅប្រកួតក្នុងព្រឹត្តិការណ៍ធំប្រចាំឆ្នាំ នាខែធ្នូ ខាងមុខ។

ត្បិតតែមិនបានប្រកួតមែន ប៉ុន្តែសេះពូល A ៣ក្បាលត្រូវបានដាក់បង្ហាញនៅថ្ងៃប្រកួតកន្លងទៅនេះ ដើម្បីជាការដាក់លក់ ប្រសិនបើមានអ្នកចាប់អារម្មណ៍។ ក្នុងនោះសេះជយលាភីជើងឯកកាលពីខែសីហា ឆ្នាំ២០១៨ ឈ្មោះ Black Woman លក់ក្នុងតម្លៃ១ម៉ឺនដុល្លារ សេះឈ្មោះ ការីណូ ៧០០០ដុល្លារ និងសេះឈ្មោះ ប៊េលី ៧០០០ដុល្លារដែរ។

និយាយពីលទ្ធផលការប្រកួតប្រចាំខែកញ្ញានេះវិញ ពូល C បានទៅលើសេះ NAVARA បញ្ជាដោយកីឡាករឈ្មោះ មុំ លេខ២ បានទៅលើសេះឈ្មោះ អាឆ្លាម បញ្ជាដោយកីឡាករ នាក់ ម៉ៅ ទទួលបានប្រាក់រង្វាន់ ៥០ម៉ឺនរៀល និងលេខ៣ បានទៅលើសេះឈ្មោះ KK បញ្ជាដោយកីឡាករ លាស់ ម៉ាណ បានប្រាក់រង្វាន់៤០ម៉ឺនរៀល។ សម្រាប់ពូល D វិញ ចំណាត់ថ្នាក់លេខ១ សេះឈ្មោះ អាប៉ែក បញ្ជាដោយកីឡាករ ម៉ន រៃ ប្រាក់រង្វាន់ ៣០ម៉ឺនរៀល, លេខ២ សេះឈ្មោះ ប្រុស ប៉ាវ បញ្ជាដោយ ជន ស៊ីថា ប្រាក់រង្វាន់ ២០ម៉ឺនរៀល និង លេខ៣ សេះឈ្មោះ កេត ស៊ីការ បញ្ជាដោយ កីឡាករ ហេង ប្រាក់រង្វាន់ចំនួន១៥ម៉ឺនរៀល៕

អត្ថបទ៖ មុន្នីរម្យ