Nam Joohyuk រម្លឹករឿងកម្សត់ពីក្មេង និងទម្លាយអាថ៌កំបាំងពីក្រោយចរិតមិនចេះមាត់ករបស់ខ្លួន

2018-09-24 02:36:29
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកគាំទ្រមួយចំនួនប្រាកដជាមិនធ្លាប់បានដឹងទេថា តារាសម្ដែងរាងខ្ពស់សង្ហា Nam Joohyuk ធ្លាប់ឆ្លងកាត់អតីតកាលបែបណាកាលពីនៅតូច តែពេលនេះអ្វីៗបានបកស្រាយ។

Nam Joohyuk តារាសម្ដែងដែលតែងធ្វើឲ្យនារីជាច្រើនធ្លាក់ក្នុងអន្លង់ស្នេហ៍នេះ ត្រូវបានអញ្ជើញឲ្យមកថតរូបឲ្យទស្សនាវដ្ដី GQ Korea ព្រមទាំងបានចំណាយពេលរម្លឹករឿងរ៉ាវមួយចំនួនឲ្យអ្នកគាំទ្រដឹងទៀត។ ក្នុងបទសម្ភាសនោះ Joohyuk បាននិយាយថា លោកមិនមែនជាមនុស្សពូកែខាងបង្ហាញអារម្មណ៍ឲ្យគេដឹងទេ។

តារាប្រុសដដែលបានលើកឡើងថា៖ "និយាយតាមត្រង់ ប្រសិនបើខ្ញុំនិយាយអ្វីចេញមកច្រើនពេក ខ្ញុំនឹងកាន់តែឆាប់ភ័យ។ ខ្ញុំជាមនុស្សលាក់អារម្មណ៍ ទោះបីខ្ញុំជួបរឿងល្អ ឬអាក្រក់ក៏ខ្ញុំកម្រនិយាយចេញដែរ។ ខ្ញុំតែងតែគិតថា មិនគួរបង្ហាញថាខ្ញុំមានអារម្មណ៍យ៉ាងណាទៅកាន់អ្នកណាទេ"។

និយាយដល់ចំណុចនេះ Joohyuk ក៏បានរម្លឹករឿងពីក្មេង ដែលនាំលោកឲ្យក្លាយជាមនុស្សបែបនេះ។ "ខ្ញុំយំច្រើនណាស់កាលពីតូច។ បើទោះបី រឿងខ្លះមិនធ្ងន់ធ្ងរក៏ដោយ ក៏ខ្ញុំនៅតែយំខ្លាំងដែរ។ ខ្ញុំត្រូវគេលេងសើច និងចំអន់ថាជាក្មេងពូកែយំ ហើយសម្ដីនោះ ធ្វើឲ្យខ្ញុំខ្មាសគេគួរសម។ ខ្ញុំមិនចង់យំទេ តែទឹកភ្នែកខ្ញុំវាចេះតែហូរ ទប់មិនជាប់។ ក្រោយមក ទើបខ្ញុំសម្រេចចិត្តថា ទោះមានរឿងអ្វីក៏ដោយ ខ្ញុំត្រូវតែលាក់អារម្មណ៍ ហើយខ្ញុំមិនដែលយំឲ្យអ្នកណាឃើញទៀតឡើយតាំងពីពេលនោះមក”៕

ប្រភព៖ kstarlive ប្រែសម្រួល៖ យី សុធារី