លែងដូចមុនហើយ! ផ្សារលើខេត្តព្រះសីហនុ ធ្លាប់តែមានភ្ញៀវខ្មែរណែនៗថ្ងៃភ្ជុំ ឥឡូវស្ងាត់ជ្រងំ

2018-10-11 02:37:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្សារលើក្នុងខេត្តព្រះសីហនុ ល្បីល្បាញលក់អាហារសមុទ្រ និងគ្រឿងសមុទ្រស្រស់ៗ ធ្លាប់តែមានភ្ញៀវទេសចរខ្មែរ និងបរទេសណែនៗពេញផ្សារឥឡូវប្រែស្ងាត់ឈឹង ខុសស្រលះកាលពីរាល់ឆ្នាំ។

រូបភាព៖ Sopheak Jenny

អ្នកស្រី ម៉ាលី ជាអាជីវករខេត្តព្រះសីហនុ លក់គ្រឿងសមុទ្រ១០ឆ្នាំមកហើយក្នុងផ្សារលើ ប្រាប់ Sabay ថានេះជាឆ្នាំទី១ហើយ ដែលអ្នកស្រីឃើញផ្សារស្ងាត់ជ្រងំ ជាពិសេសភ្ញៀវខ្មែរ តែងតែចូលទិញគ្រឿងសមុទ្រ មុនទៅលែងឆ្នេរ ឥឡូវប្រែជាស្ងាត់លក់លែងដាច់។ អាជីវកររូបនេះបន្តថា រាល់ឆ្នាំអ្នកស្រីលក់គ្រឿងសមុទ្រអស់មិនក្រោមរយគីឡូឡើយ សឹងតែរកមកផ្គត់ផ្គង់មិនគ្រប់ មានភ្ញៀវខ្លះថែមទាំងកក់ទុកមុន តែឆ្នាំនេះអ្នកកក់ក៏គ្មាន អ្នកទៅទិញផ្ទាល់ក៏គ្មាន។

រូបភាព៖ Sopheak Jenny

អ្នកស្រីម៉ាលី បន្តថា មូលហេតុស្ងាត់ឈឹងដូចនេះ ប្រហែលមកពីការទទួលបានព័ត៌មានពីភាពអសកម្ម និងបញ្ហាបរិស្ថាននៅក្នុងខេត្តព្រះសីហនុ ទើបធ្វើឲ្យភ្ញៀវទេសចរផ្លាស់គោលដៅ ទៅកាន់ខេត្តផ្សេងៗទៀតក្នុងប្រទេសកម្ពុជា។

ជាមួួយគ្នានេះដែរ តាមការចុះផ្សាយរបស់បណ្ដាញសារព័ត៌មានដើមអំពិល បានឲ្យដឹងថា នៅតាមឆ្នេរសមុទ្រ នៅក្នុងរដូវភ្ជុំបិណ្ឌប៉ុន្មានថ្ងៃមកនេះ មានភាពស្ងប់ស្ងាត់ ពុំសូវមានអ្នកទៅកម្សាន្ត នៅតាមឆ្នេរនោះទេ ខណៈទូកទេសចរណ៍ ក៏ពុំមានអ្នកជួលជិះលេងកម្សាន្តផងដែរ ដែលនេះជាលើកទី១ហើយ ដែលមានលក្ខណៈស្ងាត់ ផ្ទុយពីពេលកន្លងទៅ ឲ្យតែមានបុណ្យជាតិ តែងតែមានមនុស្សមកកម្សាន្តច្រើន ដោយតាមការសង្ខេតឃើញថា ក្នុងឱកាសបុណ្យភ្ជុំបិណ្ឌឆ្នាំនេះ អ្នកទេសចរក្នុងស្រុក នាំគ្នាបង្វែល ទៅលេងនៅតាមរមណីយដ្ឋាននានា នៅតំបន់ផ្សេងៗ ដោយសារកន្លងទៅ ទីរួមខេត្តព្រះសីហនុផ្ទាល់ មួយរយៈចុងក្រោយនេះ បានបាត់បង់ នូវហេដ្ឋារចនាសម្ព័ន និងបញ្ហាផ្សេងៗជាច្រើន។

រូបភាព៖ Sopheak Jenny

តាមរបាយការណ៍របស់មន្ទីរទេសចរណ៍ ខេត្តព្រះសីហនុ បញ្ជាក់ថា ភ្ញៀវទេសចរទៅសម្រាកកម្សាន្តនៅខេត្តព្រះសីហនុរយៈពេល៣ថ្ងៃ ពីថ្ងៃទី៨ ដល់ថ្ងៃទី១០ ខែតុលា ឆ្នាំ២០១៨ ក្នុងឱកាសបុណ្យភ្ជុំបិណ្ឌមានចំនួនសរុបប្រមាណជិត ៨ម៉ឺននាក់ (៧៩៥៨៧) ថយចុះ ១៣,៤៩%។

រូបភាព៖ Sopheak Jenny

នៅថ្ងៃទី០១ នៃឱកាសភ្ជុំបិណ្ឌមានភ្ញៀវទេសចរប្រមាណ ១៨០០០នាក់ (០៨ តុលា) ។ ចំណែកនៅថ្ងៃទី០២ មានភ្ញៀវទេសចរប្រមាណ ៣៥០០០នាក់ (០៩ តុលា)។ រីឯថ្ងៃទី០៣ មានភ្ញៀវទេសចរប្រមាណ ២៦៥០០នាក់ (១០ តុលា)។ របាយការណ៍ដដែលបានបន្តថា ភ្ញៀវទេសចរជាតិមានចំនួន ៧៣១៧៧នាក់ ថយចុះ ១៦,២៧%។ ហើយភ្ញៀវទេសចរអន្តរជាតិមានចំនួន ៦៤១០នាក់ កើនឡើង ៣៩,៣៤%៕

អត្ថបទ៖ វឌ្ឍនៈ