អំឡុងពិធីបុណ្យអុំទូកភ្ញៀវទេសចរដើរកម្សាន្តជាង ៥លាននាក់ ទូទាំងប្រទេស

2018-11-25 04:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

រយៈពេល ៣ថ្ងៃ នៃពិធីបុណ្យអុំទូក ភ្ញៀវទេសចរក្នុងស្រុកបានដើរកម្សាន្តសរុបចំនួន ជាង៥លាននាក់ ក្នុងនោះអ្នកដើរកម្សាន្តនៅតាមបណ្ដាខេត្តទូទាំងប្រទេសមានប្រមាណ ៩២,៥ម៉ឺននាក់ អត្រាកំណើនប្រមាណ ១៥,៦% ខណៈរាជធានីភ្នំពេញមានចំនួន ៤,៥លាននាក់ កើនឡើងជិត៥០% ។ នេះបើយោងតាមរបាយការណ៍របស់ ក្រសួងទេសចរណ៍។

អ្នកចូលរួមបុណ្យអុំទូក នៅមុខវាំង

យោងតាមផេកហ្វេសបុករបស់ក្រសួងទេសចរណ៍ ដែលបានដកស្រង់ប្រសាសន៍របស់ ឯកឧត្ដម ថោង ខុន រដ្ឋមន្ត្រីក្រសួងទេសចរណ៍ ឲ្យដឹងថា សម្រាប់ថ្ងៃឈប់សម្រាក ព្រះរាជពិធីបុណ្យអុំទូក អកអំបុក លយប្រទីប សំពះព្រះខែ រយៈពេល៣ថ្ងៃ (២១-២៣ ខែវិច្ឆិកា ឆ្នាំ២០១៨) នេះ ភ្ញៀវទេសចរ និងបងប្អូនប្រជាពលរដ្ឋដែលដើរកម្សាន្តនៅតាម រមណីយដ្ឋានទេសចរណ៍នានា តាមបណ្តាខេត្តទូទាំងប្រទេសមានចំនួនសរុបប្រមាណ ៩២,៥ម៉ឺននាក់ ក្នុងអត្រាកំណើនប្រមាណ ១៥,៦% ខណៈរាជធានីភ្នំពេញមានចំនួន ៤,៥លាននាក់ កើនឡើងជិត ៥០%។

១៖ ភ្ញៀវទេសចរដើរលេងកម្សាន្តតាមបណ្តាខេត្តនានាទូទាំងប្រទេសក្នុងនោះរួមមាន៖ (មិនបូកបញ្ចូលរាជធានីភ្នំពេញទេ)

ភ្ញៀវជាតិប្រមាណ ៨៤,២ ម៉ឺននាក់ ក្នុងអត្រាកំណើន ១៥,៣%
ភ្ញៀវអន្តរជាតិប្រមាណ ៨.៣ ម៉ឺននាក់ ក្នុងអត្រាកំណើន ១៨,៥%
សរុបតាមបណ្ដាខេត្តនានាទូទាំងប្រទេស៖ ៩២,៥ ម៉ឺននាក់

២៖ សម្រាប់រាជធានីភ្នំពេញ

តាមរបាយការណ៍របស់គណៈកម្មាធិការជាតិរៀបចំបុណ្យជាតិ-អន្តរជាតិ មានបងប្អូនប្រជាពលរដ្ឋប្រមាណ ៤,៥លាននាក់ បានចូលមកទស្សនាព្រះរាជពិធីបុណ្យអុំទូកនៅរាជធានីភ្នំពេញ ហើយក្នុងនោះ ក៏មានភ្ញៀវទេសចរអន្តរជាតិប្រមាណ ១,២ម៉ឺននាក់ បានចូលទស្សនាវេទិកាបុណ្យអុំទូក ដែលរៀបចំដោយក្រសួងទេសចរណ៍ផងដែរ។

នៅអំឡុងពេលបុណ្យអុំទូកនេះដែរ គ្មានឡើយអំពើហិង្សា និងអសន្តិសុខកើតឡើង។ នេះបើយោងតាមការបញ្ជាក់របស់ លោកឧត្ដមសេនីយ៍ឯក ឆាយ គឹមខឿន ប្រធានលេខាធិការដ្ឋាន នៃគណៈកម្មការការពារនៃក្រសួងមហាផ្ទៃ ដែលបានប្រាប់ វិទ្យុបារាំង RFI។

ប៉ុន្តែប្រភពខាងលើបញ្ជាក់ថា មានបទល្មើសតិចតួចបានកើតមានឡើង ដូចជាករណីចោរលូកហោប៉ៅ ករណីក្មេងវង្វេង និង ករណីចោរកម្មតិចតួចបានកើតមានឡើង។ ប៉ុន្តែអាជ្ញាធរបានចាត់ទុកថា នេះគឺជារឿងធម្មតានៅក្នុងពិធីបុណ្យជាតិដែលមានមនុស្សរាប់លាននាក់បានមកចូលរួមទស្សនា។

ពិធីបុណ្យអុំទូកឆ្នាំ២០១៨នេះ មានទូកសរុបចំនួន ២៩៥ទូក មានទូកខ្នាតអន្តរជាតិបុរសចំនួន ៩៦ទូក ទូកខ្នាតអន្តរជាតិនារី ចំនួន ២ ក្នុងនោះកម្លាំងអុំសរុប ១៩ ០១៦នាក់ ដែលមានកម្លាំងអុំបុរស ១៥ ២៧២នាក់ និងកម្លាំងអុំនារី ១៤១នាក់។ ខណៈកម្លាំងត្រៀមអុំបុរសចំនួន ៣ ៥២៥នាក់ និងកម្លាំងត្រៀមអុំនារីចំនួន ៧៩នាក់ប៉ុណ្ណោះ។

ចំពោះលទ្ធផលវិញ ទូកអុំផ្នែកបុរសមកពីខេត្តព្រះវិហារ «កោះកែសែនជ័យបារមីព្រះអង្គខ្មៅ» ឧបត្ថម្ភដោយ ឯកឧត្ដម ហ៊ីង ប៊ុនហៀង មេបញ្ជាការកងអង្គរក្សសម្ដេចនាយករដ្ឋមន្រ្តី ហ៊ុន សែន បានជាប់ចំណាត់ថ្នាក់លេខ ១ ខណៈទូកឈ្មោះ «សារាយតេជោសែនជ័យ» មកពីខេត្តកណ្ដាលឧបត្ថម្ភដោយសម្ដេច ហ៊ុន សែន ទទួលបានចំណាត់ថ្នាក់លេខ២ និងទូកឈ្មោះ «សម្ដេចវិបុលបញ្ញាបារមីមានជ័យ» មកពីខេត្តតាកែវ ឧបត្ថម្ភដោយកូនប្រុសសព លោកសុខ អាន ទទួលបានចំណាត់ថ្នាក់លេខ៣៕

អត្ថបទ៖ សុផល