អ្នកណាមិនស្លុតចិត្ត! មួន ម៉ារ៉ា ឃើញម្តាយឈឺដំបូងស្មានផ្តាសាយតិចតួច ដល់ក្អកខ្លាំង ដល់ថ្នាក់ផ្តាំផ្ញើកូនចៅ

2019-01-15 07:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក មួន ម៉ារ៉ា ព្រួយចិត្តយ៉ាងខ្លាំងនៅពេលអ្នកម្ដាយជាទីស្រលាញ់ មានជំងឺរហូតពេលអាការៈទ្រាំលែងបាន ក៏បានផ្ដាំផ្ញើកូនៗ ប្រៀបដូចបណ្ដាំចុងក្រោយ ធ្វើឲ្យតារាចម្រៀងរូបនេះ ស្លុតចិត្តយ៉ាងខ្លាំង។

ម្ចាស់បទ "កាដូឥតន័យ" ប្រាប់ថា កាលពីថ្ងៃទី១៣ ខែមករា ម្ដាយរបស់លោកស្រាប់តែក្អកធ្លាក់ឈាម ពិបាកដកដង្ហើម ដើរមិនរួច ហើយចុកណែនទ្រូង រហូតស្ទើរផុតដង្ហើម។ គ្រានោះ ម្ដាយរបស់តារារូបនេះ មានសភាពពិបាកខ្លាំង រហូតផ្ដាំផ្ញើកូនៗ ធ្វើឲ្យម្នាក់ៗរន្ធត់ចិត្តយ៉ាងខ្លាំង។

តែយ៉ាងណា បន្ទាប់ពីបានបញ្ជូនទៅសម្រាកនៅគ្លីនិក អាការៈរបស់អ្នកម្ដាយវ័យ៦៥ឆ្នាំ បានធូរស្រាលមួយកម្រិត ដោយអាចហូបអាហារបានខ្លះ និងត្រលប់មកផ្ទះវិញហើយ។ នៅពេលនេះ លោកមិនទាន់ដឹងច្បាស់នៅឡើយថា ម្ដាយមានជំងឺអ្វីឲ្យពិតប្រាកដទេ ព្រោះមុនពេលឈឺធ្ងន់ គាត់គ្រាន់មានអាការៈក្អកដូចផ្ដាសាយធម្មតាប៉ុណ្ណោះ ហើយកន្លងមកក៏គាត់មិនដែលឈឺបែបនេះពីមុនមកដែរ។ ប៉ុន្តែ លោក ម៉ារ៉ា ប្រាប់ថា ម្ដាយខ្លួនមានជំងឺលើសឈាម ដែលជាជំងឺប្រចាំកាយ។

អតីតសមាជិកក្រុមចម្រៀង 4 Strong កំពុងរង់ចាំលទ្ធផលពិនិត្យជំងឺម្ដាយរបស់ខ្លួនពីមន្ទីរពេទ្យរុស្សី បន្ទាប់ពីបានទៅកាលពីព្រឹកមិញ ដោយជំហានដំបូងលោកសន្និដ្ឋានថា ជំងឺរបេង។ ចំពោះថ្លៃព្យាបាលវិញ អស់ជិត១ពាន់ដុល្លារ ក្នុងរយៈពេលប្រមាណ៣ថ្ងៃនេះ។

ដើមឆ្នាំ២០១៩នេះ តារាចម្រៀង មួន ម៉ារ៉ា ហាក់ជួបរឿងមិនសូវល្អផ្ទួនៗ ដោយកូនស្រីទើបឈឺ អស់ប្រាក់ជាង១ពាន់ដុល្លារដែរ ។ បន្ទាប់មកលោកឈឺវិញម្ដង ហើយនៅពេលនេះ អ្នកមានគុណក៏ជួបរឿងបែបនេះទៀត។ ដោយសារតែបែបនេះ ធ្វើឲ្យលោកមានអារម្មណ៍មិនសូវល្អ តែទោះយ៉ាងណា លោកថា ត្រូវតែឆ្លៀតពេលមើលថែអ្នកម្ដាយឲ្យបានដឹតដល់ជាទីបំផុត៕

អត្ថបទ៖ លឹម សុនា