អ្នកភ្នំពេញត្អូញរឿងខ្វះទឹកស្អាតប្រើ ដោយសម្ពាធទឹកស្អាតហូរខ្សោយខ្លាំង

2020-03-10 08:19:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពលរដ្ឋមួយចំនួនរស់រាជធានីភ្នំពេញបានត្អូញត្អែរពីសម្ពាធទឹកស្អាត នៅតំបន់ខ្លួនរស់នៅហូរខ្សោយ ឬលែងចេញទឹកតែម្ដងនៅពេលខ្លះ ខណៈបញ្ហានេះបានកើតឡើងចាប់តាំងពីការមកដល់នៃដើមរដូវប្រាំងមកម្ល៉េះ។ លោក តារា ប្រជាពលរដ្ឋរស់នៅបុរី ពិភពថ្មីកំបូលបានឱ្យដឹងថា សម្ពាធទឹកស្អាតបានថយចុះខ្លាំង ចាប់តាំងពីដើមរដូវប្រាំងចូលមកដល់កាលពីចុងឆ្នាំ២០១៩។ លោកបានសម្រេចចិត្តទិញម៉ូទ័រ ដើម្បីទាញទឹក ប៉ុន្តែនៅតែមិនមានទឹកគ្រប់គ្រាន់ និងស្នើឱ្យមន្ត្រីរដ្ឋាករទឹកមកពិនិត្យផ្ទាល់

“សូម្បីតែមានម៉ូទ័របូមទឹកហើយ នៅបូមគ្មានទឹកប្រើផង ទម្រាំគ្មានម៉ូទ័របូមទៀតនោះ តើពួកគាត់មានលំបាកយ៉ាងណា?”។

ពលរដ្ឋរស់នៅតំបន់ឈូកវ៉ា ២ រាជធានីភ្នំពេញ កញ្ញា ពិសី ឱ្យដឹងថា ថ្ងៃខ្លះស្ទើរគ្មានទឹកមួយតំណក់ប្រើប្រាស់តែម្តងនៅពេលព្រឹក និងបានចោទសួរថា តើរដ្ឋាករទឹក បិទមិនឱ្យពលរដ្ឋប្រើ ឬមានបញ្ហាអ្វីកើតឡើង។

"សម្ពាធទឹកខ្សោយមែនទែនគ្មានសូម្បីមួយតំណក់នៅថ្ងៃខ្លះ ពិសេសនៅពេលព្រឹក សូមរដ្ឋាករទឹកស្វយ័តជួយដោះស្រាយផង”។

ពលរដ្ឋម្នាក់ទៀតនៅសង្កាត់ព្រែកលាភ លោក ម៉ៅ ទី បានឱ្យដឹងថា ទឹកស្អាតបើកអត់ចេញទាំងព្រឹក ថ្ងៃត្រង់ និងពេលល្ងាច និងស្នើសុំរដ្ឋាករទឹកស្វយ័តដោះស្រាយដូចគ្នា។ លោកថា ទឹកអត់ចេញ ចេញខ្សោយ គួរគិតពីការបង្កើនការផ្គត់ផ្គង់ទឹកស្អាតបន្ថែម ព្រោះទន្លេជុំវិញក្រុង។

“សូមជួយបង្កើនផ្គត់ផ្គង់ទឹកស្អាតផង បរិមាណទឹកនៅពេលថ្ងៃជាពិសេសរដូវក្តៅគឺខ្សោយ កន្លែងខ្លះបើកសឹងតែមិនចេញទឹក សូមឲ្យការពង្រីកការតបណ្ដាញឲ្យសមតុល្យ និងការផ្គត់ផ្គង់ផង”។ ចំណែកលោក ធានី ពលរដ្ឋរស់នៅសង្កាត់ចាក់អង្រែក្រោមរាជធានីភ្នំពេញចង់ឱ្យមានការបញ្ជាក់ពីរដ្ឋាករទឹកស្វយ័តពីសម្ពាធទឹកចុះខ្សោយនៅពេលព្រឹក និងពេលល្ងាច ដើម្បីងាយស្រួលលោកត្រៀមលក្ខណៈរក្សាទឹកទុកប្រើប្រាស់ ខណៈបញ្ហានេះបានកើតមានឡើងប្រហែលពីរខែមកហើយ។

“សូមជួយដោះស្រាយផង បើអាចជួយប្រាប់មូលហេតុឱ្យប្រជាជនដឹងផង ដើម្បីបានរក្សាទឹកទុកប្រើប្រាស់ពេលដែលទឹកមិនចេញ ហើយបញ្ហាហ្នឹងវាកើតឡើងដល់ពេលណា ទើបអាចប្រើប្រាស់បានដូចធម្មតាវិញ?”។

ទាក់ទងនឹងបញ្ហានេះលោក ស៊ឹម ស៊ីថា អគ្គនាយករដ្ឋាករទឹកស្វយ័តក្រុងភ្នំពេញបានថ្លែងថា បរិមាណទឹកស្អាត និងសមត្ថភាពផលិតរបស់រោងចក្រមានកម្រិតតិចជាងតម្រូវការប្រើប្រាស់ទើបបណ្ដាញឱ្យសម្ពាធទឹកចុះខ្សោយ។ រដ្ឋាករទឹកស្វយ័តបានផលិតទឹកអស់សមត្ថភាពរបស់រោងចក្រហើយក៏នៅតែមិនគ្រប់តាមសេចក្ដីត្រូវការដែរ។ដូចនេះហើយបានជាយើងកំពុងសាងសង់រោងចក្រផលិតទឹកបន្ថែមនៅបាក់ខែង។

លោកបានបន្ថែមថា សម្ពាធទឹកចុះខ្សោយនេះគឺខ្សោយទាំង១២ ខណ្ឌនៅរាជធានីភ្នំពេញ និង សុំឲ្យប្រជាជនជួយសន្សំសំចៃទឹកស្អាត ដើម្បីចែករំលែកគ្នាប្រើប្រាស់ ទម្រាំសាងសង់រោងចក្រថ្មីរួច។ សូមកុំយកទឹកស្អាត បាញ់បោសមុខផ្ទះជំនួសអំបោស ឬយកទឹកស្អាតស្រោចស្មៅ។ បច្ចុប្បន្នរដ្ឋាករទឹកស្វយ័តក្រុងភ្នំពេញអាចផលិតទឹកស្អាតបាន ៦២ម៉ឺនម៉ែត្រគីប ខណៈតម្រូវការមានប្រមាណ ៧០ម៉ឺនម៉ែត្រគីបក្នុងមួយថ្ងៃ៕