ល្អសម្រាប់អ្នកលក់អនឡាញហើយ! ក្រោយ អ៊ុន សិទ្ធា ចុះកិច្ចសន្យាជាមួយក្រុមហ៊ុនបច្ចេកវិទ្យាធំមួយ

2020-09-28 08:39:45
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីឲ្យតម្រុយកាលពីដើមខែ ថានឹងបើកក្រុមហ៊ុនមួយនោះ នៅយប់មិញនេះ លោក អ៊ិន សិទ្ធា បានសម្រេចផែនការនោះហើយ ដោយបានធ្វើពិធីចុះកិច្ចសន្យាជាមួយក្រុមហ៊ុនធំមួយឈ្មោះថា XFORCE GLOBAL ដែលជាក្រុមហ៊ុនប្រព័ន្ធពាណិជ្ជកម្មអេឡិចត្រូនិចលំដាប់អន្តរជាតិ មកពីប្រទេសម៉ាឡេស៊ី។

តាមរយៈការចាប់ដៃគ្នានេះ ក្រុមហ៊ុនខាងលើនឹងនាំយកបច្ចេកវិទ្យាពាណិជ្ជកម្មអេឡិចត្រូនិច (e-commerce) មកកាន់ប្រទេសកម្ពុជាជាមួយការប្ដេជ្ញាចិត្តខ្ពស់ ក្នុងគោលដៅចូលរួមជួយដល់ការអភិវឌ្ឍន៍សេដ្ឋកិច្ចកម្ពុជា នាសម័យឌីជីថលនេះ។ លោក អ៊ុន សិទ្ធា នឹងធ្វើជាអ្នកតំណាងចែកចាយផ្តាច់មុខរបស់ XFORCE GLOBAL CAMBODIA។

ពាណិជ្ជកម្មអេឡិចត្រូនិច គឺជាកំលំាងសេដ្ឋកិច្ចមួយដែលគេបានដាក់ឈ្មោះឲ្យថា "ការវិវឌ្ឍន៍នៃអាជីវកម្មសតវត្សទី២១" ដោយកំលាំងនេះបានបង្កើតឲ្យមានវិស័យឧស្សាហកម្មថ្មីៗ បានផ្លាស់ប្តូររបៀបទិញលក់ទំនិញ និងបានជួយឲ្យអាជីវកម្មទំាងឡាយកាន់តែមានភាពរឹងមាំ និងផ្ដល់ឱកាសឲ្យអាជីវករទំាងឡាយអាចភ្ជាប់ទំនាក់ទំនងជាមួយអតិថិជនរបស់ខ្លួនគ្រប់ពេលវេលា គ្រប់ទីកន្លែង។

លោក អ៊ុន សិទ្ធា បានរៀបរាប់ថា៖ «ខ្ញុំពិតជាមានសេចក្តីរីករាយ និងមោទកភាពក្រៃលែង ដែលបានក្លាយជាអ្នកតំណាងចែកចាយផ្តាច់មុខរបស់ XFORCE GLOBAL CAMBODIA ដើម្បីនាំយកការវិវឌ្ឍន៍នៃអាជីវកម្មសតវត្សទី២១នេះ មកកាន់ប្រទេសកម្ពុជា ក្នុងគោលដៅចូលរួមជួយដល់ការអភិវឌ្ឍន៍សេដ្ឋកិច្ចជាតិកម្ពុជាយើង»។

កិច្ចសន្យារវាងតារាប្រុសល្បីរបស់កម្ពុជាជាមួយ XFORCE GLOBAL លើការនាំយកប្រព័ន្ធពាណិជ្ជកម្មអេឡិចត្រូនិច (e-commerce) នាពេលនេះ ត្រូវបានគេរំពឹងថា នឹងកាន់តែជះឥទ្ធិពលវិជ្ជមានថែមទៀតទៅលើវិស័យបច្ចេកវិទ្យាក្នុងស្រុកនិយាយជារួម។ និយាយដោយឡែក ខាងផ្នែកឧស្សាហកម្មលក់អនឡាញ នឹងកាន់តែទំនើបកម្ម ព្រមទាំងប្រសិទ្ធភាពជាងមុន។

ឯកឧត្តម លឹម រតនៈ ជាទីប្រឹក្សារាជរដ្ឋាភិបាលកម្ពុជា ដែលបានចូលរួមធ្វើជាគណអធិបតី ក្នុងពិធីចុះអនុស្សរណៈនៃការយោគយល់គ្នា រវាងលោក អ៊ុន សិទ្ធា និង XFORCE GLOBAL បានមានប្រសាសន៍ថា៖ "ខ្ញុំសូមកោតសរសើរ និងគាំទ្រ ចំពោះការចូលរួមអភិវឌ្ឍន៍សេដ្ឋកិច្ចជាតិ ពីសំណាក់ក្រុមហ៊ុន XFORCE GLOBAL តាមរយៈការនាំយកប្រព័ន្ធពាណិជ្ជកម្មអេឡិចត្រូនិចនេះមកកាន់កម្ពុជា។ បច្ចេកវិទ្យា បាន និងកំពុងនាំមកនូវការអភិវឌ្ឍន៍រីកចម្រើនជាច្រើននៅក្នុងពិភពលោក ដូច្នេះ ខ្ញុំសូមស្វាគមន៍ និងគាំទ្ររាល់ការប្ដេជ្ញាចិត្តរបស់គ្រប់ភាគីទាំងអស់ ដើម្បីនាំយកបច្ចេកវិទ្យាថ្មីៗ មកកាន់ប្រទេសកម្ពុជា ក្នុងគោលដៅចូលរួមជួយអភិវឌ្ឍប្រទេសជាតិយើង"។

XFORCE GLOBAL ក៏កំពុងសំឡឹងរកការសហការពីម្ចាស់អាជីវកម្មទាំងឡាយ។ លោក ព្រំ សំណាង ស្ថាបនិកក្រុមហ៊ុន XFORCE GLOBAL បានមានប្រសាសន៍ថា៖ "មិនថាសម្រាប់អ្នកដែលមិនមានបទពិសោធន៍អាជីវកម្ម ឬមិនមានយុទ្ធសាស្រ្តក្នុងការលក់ក៏ដោយ ក៏លោកអ្នកអាចចូលរួមធ្វើជាដៃគូរបស់ក្រុមហ៊ុន XFORCE ដើម្បីចាប់ផ្តើមអាជីវកម្មដ៏ជោគជ័យមួយ នៅលើប្រព័ន្ធពាណិជ្ជកម្មអេឡិចត្រូនិចបានយ៉ាងរលូន ដោយចំនាយតិច និងចំនេញច្រើន"៕