តារាចម្រៀងជួរមុខរបស់ផលិតកម្មរស្មីហង្សមាសបីដួង កំពុងខ្វល់ចិត្តរឿងដូចគ្នាក្នុងពេលតែមួយ

2020-10-13 02:49:40
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងបីដួង គឺអ្នកនាង ឱក សុគន្ធកញ្ញា លោក ណុប បាយ៉ារិទ្ធ និងលោក នី រតនា បានបញ្ចេញសារស្រដៀងគ្នាដល់ប្រជាពលរដ្ឋខ្មែរទូទាំងប្រទេសឲ្យបង្កើនការប្រុងប្រយ័ត្នចំពោះសុខសុវត្ថិភាពពីគ្រោះធម្មជាតិទឹកជំនន់ ដោយបង្កប់ពាក្យពេចន៍ផ្ដាំផ្ញើដ៏គួរឲ្យចាប់អារម្មណ៍។

ឱក សុគន្ធកញ្ញា៖"សូមបួងសួងទេវតាតាមថែរក្សាប្រជាជនកម្ពុជាចៀសផុតពីគ្រោះធម្មជាតិនេះឆាប់ៗ ហើយសូមឲ្យពលរដ្ឋខ្មែរមានសុវត្ថិភាពគ្រប់ៗក្រុមគ្រួសារ"។

ចំណែកលោក ណុប បាយ៉ារិទ្ធ អំពាវនាវដល់ប្រជាជនត្រូវបង្កើនការប្រុងប្រយ័ត្ន ហើយរកទីទួលសុវត្ថិភាពដើម្បីស្នាក់នៅបណ្ដោះអាសន្ន និងថែរក្សាសុខភាពឲ្យបានគ្រប់ៗគ្នា៖"សូមឲ្យទឹកជំនន់ស្រកចុះឲ្យឆាប់រហ័ស ហើយសូមកុំឲ្យបន្តជន់លេចដល់ខេត្តក្រុងដទៃទៀត ជាពិសេសកុំឲ្យប៉ះពាល់ដល់អាយុជីវិតពុកម៉ែ បងប្អូន កូនក្មួយឲ្យសោះ"។

ងាកមកលោក នី រតនា វិញ។ លោកបានអំពាវនាវដល់បងប្អូនប្រជាពលរដ្ឋខ្មែរដែលកំពុងរងផលប៉ះពាល់ដោយគ្រោះធម្មជាតិទឹកជំនន់ថា៖"បងប្អូនត្រូវថែរក្សាសុខភាពទាំងអស់គ្នា ឥឡូវនេះទឹកជំនន់មិនទាន់ស្រកនៅឡើយទេ ខ្ញុំសូមបួងសួងទេវតា និងវត្ថុសក្ដិសិទ្ធិក្នុងលោកសូមឲ្យប្រទេសកម្ពុជាយើងឆាប់ផុតពីគ្រោះធម្មជាតិនេះផង"។

ស្ថានភាពគ្រោះធម្មជាតិទឹកជំនន់នៅកម្ពុជា បានជន់លេចខេត្តក្រុងមួយចំនួនដូចជា៖ បាត់ដំបង ពោធិ៍សាត់ និងស្រុកមួយចំនួន នៃខេត្តក្រុងដទៃទៀតក៏មានការជន់លេចដែរ។ មន្ត្រីជំនាញក្រសួងធនធានទឹក ធ្លាប់បង្ហើបថា កម្ពុជានឹងបន្តរងអាកាសធាតុសម្ពាធទៀប ឬព្យុះចំនួនពីរទៀតដោយប្រយោលដែលបញ្ហានេះនឹងបង្កឲ្យប្រទេសកម្ពុជាបន្តមានភ្លៀងធ្លាក់រាយប៉ាយ ហើយទឹកជំនន់អាចនឹងបន្តកើនឡើងដែរ៕

អត្ថបទ៖ ជិន សុភ័ក្ដ្រ