ហ្គេមស្រដៀង សាយ បង្កើតហើយផ្ទុះការគាំទ្រកាលពីខែមុន ត្រូវបានគេលេងដើម្បីទប់ស្កាត់ជំងឺកូវីដ-១៩

2020-12-08 07:46:26
ចំនួនមតិ 0 | ចំនួនចែករំលែក 0

ចន្លោះមិនឃើញ

របៀបទាញយកចំណាប់អារម្មណ៍លេងហ្គេមតាមបណ្ដាញសង្គមហ្វេសប៊ុកស្រដៀង សាយ កាលពីចុងខែតុលា ឆ្នាំ២០២០ ត្រូវបានគេលើកយកទៅ Challegne ជាថ្មីទៀតក្នុងបរិបទជំងឺកូវីដ-១៩ ឆ្លងក្នុងសហគមន៍។ ហ្គេមស្រដៀងគ្នា ប៉ុន្តែត្រូវគេប្រើក្នុងមុខព្រួញពីរផ្សេងគ្នា ពោលគឺសាយ បង្កើតឡើងដើម្បីរៃអង្គាសប្រាក់ទៅជួយមន្ទីរពេទ្យកុមារអង្គរ រីឯការធ្វើលើកនេះ គឺដើម្បីទប់ស្កាត់ជំងឺកូវីដ-១៩។

ហ្គេមថ្មីៗនេះ បានផ្ដើមចេញយុវជនម្នាក់ដែលសកម្មនឹងការងារជួយសង្គម គឺលោក តាន់ គីមសួរ ហើយត្រូវបានលេងបន្តបន្ទាប់ដោយពិធីករល្បីឈ្មោះ គឺលោក ប៉ែន ចំរុង និងលោក ជា វណ្ណារិទ្ធ មុនពេលដែលតារាៗ ព្រមទាំងហ្វេនៗរបស់ពួកគេជាច្រើនទៀតចាប់ផ្ដើមចូលរួមលេង។

លក្ខខណ្ឌ នៃការចូលរួមលេង គឺតម្រូវអ្នកលេងពាក់ម៉ាស ហើយថតរូបបង្ហោះ រួចសរសេរថា"ពាក់ម៉ាសដើម្បីជីវិតអ្នក និងក្រុមគ្រួសារអ្នក" បន្ទាប់មកផ្ញើទៅកាន់មនុស្សជាទីស្រឡាញ់របស់អ្នក(ប៉ុន្មាននាក់ក៏បាន)។ លោក ប៉ែន ចំរុង និងជា វណ្ណារិទ្ធ បានចូលរួមលេងហ្គេមនេះមុនគេ ហើយបានបញ្ចេញសារស្រដៀងគ្នាថា"អគុណចំពោះការចូលរួមជាមួយគ្នាក្នុងការប្រយុទ្ធប្រឆាំងនឹងជំងឺរាតត្បាតដ៏ចង្រៃមួយនេះ"។

ទោះជាយ៉ាងណាការលេងហ្គេមលើកនេះ មិនសូវផ្ទុះខ្លាំងដូចកាលលោក អ៊ួន បឋម ហៅសាយ បង្កើតឡើងដំបូងក្នុងគោលបំណងកៀរគរសប្បុរសជនឲ្យជួយចូលរួមបរិច្ចាគម្នាក់១ដុល្លារ ដើម្បីកុមារកម្ពុជា តាមរយៈគណនីធនាគារ ABA និងគណនី វីង នោះទេ៕

អត្ថបទ៖ ជិន សុភ័ក្ដ្រ