ឧក្រិដ្ឋកម្មអ៊ីនធឺណិតធំបំផុតទាំង ៥ ក្នុងប្រវត្តិសាស្ត្រ មនុស្សជាតិគ្មានថ្ងៃភ្លេច

2021-03-09 07:10:02
ចំនួនមតិ 0 | ចំនួនចែករំលែក 0

ចន្លោះមិនឃើញ

តាំងតែពីចាប់ផ្ដើមមានការបង្កើតឲ្យមានគេហទំព័រ (World Wide Web) នាឆ្នាំ ១៩៨៩ មកមនុស្សរាប់ពាន់លាននាក់ក្នុងពិភពលោកចាប់ផ្ដើមប្រាស្រ័យទាក់ទងគ្នា និងផ្ទុកទិន្នន័យផ្ទាល់ខ្លួននៅលើកុំព្យូទ័រ និងបណ្ដាញអ៊ីនធឺណិត។ ប្រការនេះ បានធ្វើឲ្យមានបទល្មើសនានា នៅលើប្រព័ន្ធអ៊ីនធឺណិតបានកើតឡើងជារឿយៗ ដោយសារវាអាចប្រព្រឹត្តឡើងលើមនុស្សច្រើនរាប់លានអ្នកក្នុងពេលតែមួយ និងទទួលបានផលច្រើនពីការធ្វើបទល្មើសនោះ។

ខាងក្រោមនេះជាបទល្មើសដ៏ធំបំផុត នៅលើអ៊ីនធឺណិតក្នុងប្រវត្តិសាស្ត្រសកលលោក៖

ចុច Subscribe ឆានែល Telegram របស់ Sabay ដើម្បីទទួលបានព័ត៌មានថ្មីៗទាន់ចិត្ត

១. មេរោគ WannaCry ក្នុងឆ្នាំ ២០១៧

មេរោគនេះជាប្រភេទ Ransomware ដែលផ្ទុះឡើងនៅឆ្នាំ ២០១៧។ វាឆ្លងតាមរយៈ Email ដែលមានផ្ទុកមេរោគ ក្នុងទម្រង់ជាឯកសារ។ ពេលអ្នកប្រើប្រាស់ចុចចូលទៅ WannaCry នឹងជ្រាបចូលក្នុងកុំព្យូទ័រ ហើយវានឹងបិទមិនឲ្យអ្នកចូលយកឯកសាររបស់ខ្លួនបានវិញឡើយ ដរាបណាមិនបង់លុយនោះ។ តាមរបាយការណ៍មានកុំព្យូទ័រជាង ៣០០ ០០០ គ្រឿងបានរងគ្រោះ តែសំណាងល្អ ដែលមានអ្នកស្រាវជ្រាវផ្នែកសុវត្ថិភាពវ័យ ២២ ឆ្នាំម្នាក់បានរកឃើញវិធីដើម្បីសម្លាប់មេរោគនេះចេញពីកុំព្យូទ័របាន។

២. ការលួចយកលុយជាង ៨៦៤ លានដុល្លារពីធនាគារជុំវិញពិភពលោក ក្នុងឆ្នាំ ២០១៥

រូបតំណាង

វាចាប់ផ្ដើមតាំងតែពីឆ្នាំ ២០១៣ មក។ ក្រុម hackers របស់ប្រទេសរុស្សី បានលួចយកលុយពីជាង ១០០ ស្ថាប័ននៅជុំវិញពិភពលោក។ ពួកគេបានលួចចូលក្នុងប្រព័ន្ធរបស់ស្ថាប័នហិរញ្ញវត្ថុទាំងនោះ ហើយទាញយកព័ត៌មានឯកជនរបស់អ្នកប្រើប្រាស់។ បន្ទាប់មក ធ្វើប្រតិបត្តិការក្លែងក្លាយបានដោយជោគជ័យ និងអាចដកលុយតាមទូ ATM នានានៅជុំវិញពិភពលោកដោយមិនប្រើកាតទៀតផង។ ទម្រាំតែការលួចរយៈពេល ២ ឆ្នាំនេះត្រូវបានបញ្ចប់ ស្ថាប័នហិរញ្ញវត្ថុទាំងនោះខាតបង់ប្រាក់ជាង ៨៦៤ លានដុល្លារឯណោះ។

៣. ការលួចទិន្នន័យឯកជនជាចង្កោមក្នុងឆ្នាំ ២០១៥

នៅចុងឆ្នាំ ២០១៥ មនុស្ស ៣ នាក់ត្រូវបានចោទប្រកាន់ពីបទលួចយកព័ត៌មានឯកជនទៅធ្វើអាជីវកម្មដោយខុសច្បាប់។ ការលួចនោះចាប់ផ្ដើមឡើងក្រៅប្រទេសអ៊ីសា្រអែល ដោយពួកគេលួចយកទិន្នន័យអ្នកប្រើប្រាស់នានា ហើយលក់ក្នុងទីផ្សារងងឹត។ ពួកគេក៏បានលួចព័ត៌មានផ្ទៃក្នុងរបស់ក្រុមហ៊ុននានា ដើម្បីក្រឡុកទីផ្សារភាគហ៊ុនបានយ៉ាងងាយផងដែរ។

គេបានប៉ាន់ប្រមាណថា សកម្មភាពពួកគេទាំង ៣ កើបរកលុយបានរាប់រយលានដុល្លារពីការលួចយកទិន្នន័យទៅលក់ ដោយក្នុងនោះ មាន ៨៣លានគណនី ជារបស់ក្រុមហ៊ុន JP Morgan and Chase Co ដែលជាក្រុមហ៊ុនវិនិយោគក្នុងផ្សារហ៊ុនដ៏ធំរបស់អាមេរិក។

៤. ក្រុមហ៊ុន SONY ត្រូវបានគេធ្វើស៊ី នាឆ្នាំ ២០១៤

ឈុតមួយក្នុងរឿង The Interview

ក្រុម hackers ដែលមានឈ្មោះថា Guardians of Peace (GOP) ជាអ្នកនៅពីក្រោយខ្នងក្នុងការប្រើមេរោគ លួចយកទិន្នន័យរបស់ក្រុមហ៊ុន SONY ទំហំជាង ១០០ តេរ៉ាបៃ (TB)។ តាមពិតទៅ រឿងនេះកើតឡើងដោយសារក្រុមហ៊ុន SONY គ្រោងបញ្ចេញរឿង The Interview ដែលជាប់ពាក់ព័ន្ធនឹងមេដឹកនាំកូរ៉េខាងជើង Kim Jong-un ហើយតួមេដឹកនាំត្រូវស្លាប់នៅចុងរឿង អាចជាហេតុឲ្យមានភាពចម្រូងចម្រាស់កើតឡើង។ ដូចនេះ គេសន្និដ្ឋានថាក្រុម GOP នេះ មានរដ្ឋាភិបាលកូរ៉េខាងជើងនៅពីខាងក្រោយខ្នង។

៥. គណនីក្រុមហ៊ុន YaHoo ជាងមួយពាន់លានត្រូវបានគេលួច នាឆ្នាំ ២០១៣

គណនីជាង ១ពាន់លានរបស់ក្រុមហ៊ុន YaHoo ត្រូវបានគេលួចយកព័ត៌មានដូចជាឈ្មោះ លេខទូរសព្ទ លេខសម្ងាត់ និង Email ជាដើម។ សំណាងល្អ ព័ត៌មានទាក់ទងនឹងគណនីធនាគារ ដែលភ្ជាប់នឹងគណនីធនាគារនោះមិនត្រូវបានគេលួចយកឡើយ។ ព័ត៌មានលេចធ្លាយនេះ ទើបតែលេចចេញនាឆ្នាំ ២០១៦ នេះតែប៉ុណ្ណោះ បន្ទាប់ពីមានការបែកធ្លាយពីការលួចព័ត៌មានឯកជនជាលើកទី ២ ក្នុងឆ្នាំ ២០១៤ ដែលលើកនេះមានជាង ៥០០ លានគណនី៕

ប្រភព៖ The Sun ប្រែសម្រួល៖ ផាត សុវត្ថិ