ពីក្មេងជនបទក្រីក្រ ក្លាយជាម្ចាស់ក្រុមហ៊ុនដោះស្រាយបញ្ហាតាមផ្ទះរកចំណូលបានរាប់ម៉ឺនដុល្លារ

2021-03-15 01:20:20
ចំនួនមតិ 0 | ចំនួនចែករំលែក 0

ចន្លោះមិនឃើញ

« យើងមិនអាចជ្រើសរើសកន្លែងកើតនោះទេ តែយើងអាចបង្កើតក្ដីស្រមៃខ្លួនឯង ទើបយើងស្គាល់ច្បាស់ពីផ្លូវដែលខ្លួនត្រូវដើរទៅមុខ។ ពីមួយជំហាន ទៅមួយជំហាន ប្រៀបបាននឹងកាំជណ្ដើរដឹកនាំជីវិតយើងទៅកាន់ក្តីស្រមៃមួយនោះ ហើយក្នុងនោះ ចិត្តអំណត់តស៊ូ ប្រឹងប្រែងបង្កើនសមត្ថភាពខ្លួនឯងមិនឈប់ឈរ ក៏ត្រូវតែមានផងដែរ »។ នេះបើតាមការលើកឡើងរបស់លោក តុង សៀកអាន ដែលជាម្ចាស់ក្រុមហ៊ុន CH Home Service គឺជាក្រុមហ៊ុនផ្តល់សេវាកម្មដោះស្រាយរាល់បញ្ហាតាមផ្ទះគ្រប់ប្រភេទ។

លោកបន្តថា ៖ «ជាការពិតទៅ អ្វីដែលខ្ញុំសម្រេចបានបច្ចុប្បន្ននេះ សម្រាប់មនុស្សទូទៅ គេមិនទាន់ហៅថាជាជោគជ័យអីនៅឡើយទេ តែសម្រាប់ខ្ញុំខ្លួនឯង នេះគឺជាការសម្រេចបានជោគជ័យដ៏ធំធេងមួយហើយ ព្រោះខ្ញុំបានចាប់ផ្តើមពីគ្មានអ្វីទាល់តែសោះក្នុងខ្លួន សន្សំកាក់សេនតក់ៗ រហូតឈានដល់បើកក្រុមហ៊ុន CH Home Service នេះបានដូចសព្វថ្ងៃ»។

ជាកូនពៅក្នុងចំណោមបងប្អូន ៣នាក់ កើតក្នុងគ្រួសារក្រីក្រមួយនៅស្រុកកងមាស ខេត្តកំពង់ចាម លោកត្រូវបានឪពុកម្តាយដែលលែងលះគ្នាទុកឲ្យរស់នៅជាមួយជីដូនតាំងពីវ័យ ៦ឆ្នាំ តែរូបលោកនៅតែបន្តប្រឹងប្រែងទៅរៀនសូត្រនៅសាលា ដោយរំពឹងថានឹងអាចប្រើការសិក្សាផ្លាស់ប្តូរវាសនាខ្លួននាថ្ងៃមុខ។

ដល់ឆ្នាំ ១៩៩៩ លោកបានចាកចេញពីស្រុកកំណើតមករៀនបន្តថ្នាក់វិទ្យាល័យ នៅទីក្រុងភ្នំពេញ ដោយស្នាក់នៅជុំគ្នាជាមួយម្តាយវិញ ។ ក្រោយបញ្ចប់វិទ្យាល័យក្នុងឆ្នាំ ២០០២ ការងារដំបូងរបស់លោក គឺធ្វើជាអ្នករត់តុ និងបន្តការសិក្សាកម្រិតមហាវិទ្យា ផ្នែកភាសាអង់គ្លេស ជំនាញបកប្រែ។ ក្រៅម៉ោងធ្វើការ និងរៀនមហាវិទ្យាល័យ លោក បានឆ្លៀត រៀនភាសាចិន និងថៃ និងជំនាញកុំព្យូទ័របន្ថែម។

ដោយការប្រឹងអភិវឌ្ឍសមត្ថភាពមិនឈប់ឈរ លើជំនាញទំនាក់ទំនង និងភាសាបរទេស ក្នុងឆ្នាំ២០០៦ លោក តុង សៀកអាន ត្រូវបានក្រុមហ៊ុនបរទេសធំមួយផ្តល់ទំនុកចិត្ត ឲ្យកាន់តំណែងធំ ក្នុងតួនាទីជាអ្នកត្រួតពិនិត្យគុណភាពផលិតផលប្រចាំតំបន់អាស៊ីអាគ្នេយ៍។

ប្រឡូកក្នុងវិស័យការងារ អស់ជាង ១៨ ឆ្នាំ លោកនៅតែចិញ្ចឹមចិត្តចង់ធ្វើជាថៅកែដោយខ្លួនឯង ដោយលោកតែង បន្តប្រឹងសន្សំប្រាក់ ចំណេះ ជំនាញ និងប្រមែលប្រមូលបទពិសោធន៍ដាក់ខ្លួន។ លុះដល់ឆ្នាំ ២០១៨ លោកសម្រេចចាកចេញពីអាជីពខាងលើ មកបើកជំនួញដោយខ្លួនឯង គឺ CH Home Service ដោយចាប់បើកដំបូងលោកមានបុគ្គលិកត្រឹមតែ ៧ នាក់។ បច្ចុប្បន្នក្រុមហ៊ុន CH Home Service បានរីកចម្រើន និងមានបុគ្គលិកជាង ១ពាន់នាក់ ហើយដែលត្រៀមចាំបម្រើសេវាទូទាំងប្រទេសកម្ពុជា។

រំលឹកដល់មូលហេតុដែលធ្វើឲ្យលោកចាប់យកជំនួញមួយនេះ លោក តុង សៀកអាន ថា ៖ « ខ្ញុំជាមនុស្សមិនចេះទំនេរ ឲ្យតែសល់ពេល ដឹងតែប្រឹងរកគ្រប់ផ្លូវ។ ដើមឡើយ ក្រៅពីការងារពេញម៉ោង ខ្ញុំបាននាំភ្ញៀវជួលផ្ទះ ហើយគេចេះតែរអ៊ូទាំរឿងស្រុកខ្មែរ ចង់រកជាងជួលជុល ធ្វើនេះនោះតិចតួចក្នុងផ្ទះពិបាក ខ្លះរកបានហើយគុណភាពការងារទុកចិត្តអត់បានទៀត ។ ឃើញអីចឹង ខ្ញុំក៏បែកគំនិតរកខាងនេះទៅ»។

«ដំបូងយើងមានក្រុមការងារតូច តែដោយសារគុណភាពសេវាយើងល្អ និងឆាប់រហ័ស ធ្វើឲ្យភ្ញៀវរកយើងហើយរកទៀត និងជួយផ្សព្វផ្សាយពីមាត់មួយទៅមាត់មួយ ដែលធ្វើឲ្យ សេវាកម្ម របស់យើងមានទីផ្សារឆាប់រហ័ស ឯក្រុមការងារកាន់តែធំផងដែរ រហូតដល់ចុងឆ្នាំ ២០១៨ ទើបខ្ញុំសម្រេចបើកក្រុមហ៊ុន CH Home Service នេះជាផ្លូវការ »។ លោក តុង សៀកអាន ពន្យល់បន្ថែម។

និយាយដល់ការលំបាកដែលលោកជួបប្រទះក្នុងរបរនេះ លោកថា ច្រើនរាប់មិនអស់ទេ៖ « ជួបភ្ញៀវពិបាកមធ្យមទេ ងំគឺ ជាមួយជាងដែលធ្វើការងារ គ្មានការទទួលខុសត្រូវ ធ្វើឲ្យតែរួចពីដៃ ណាត់ខុសម៉ោងខុសពេល ហើយជាថៅកែ យើងត្រូវតែទទួលខុសត្រូវចេញសង និងបំពេញតម្រូវការភ្ញៀវ ដើម្បីកុំឲ្យខូចឈ្មោះក្រុមហ៊ុន។ ពេលខ្លះក៏ហត់ស្ទើរតែចង់ឈប់ម្តងៗ តែខ្ញុំខំធ្វើចិត្តឲ្យធ្ងន់ ដូចគេថា កុំធ្វើការងារទាំងឆេវឆាវ ខឹងខុស ខឹងខាត»។

«ខ្ញុំធំឡើងជាមួយការលំបាក ដូច្នេះវាបង្រៀនខ្ញុំឲ្យប្រឹង ខ្ញុំរស់នៅមើលគេ មើលឯង មើលសង្គមជុំវិញខ្លួន អង្កេត វិភាគ ជួបបញ្ហាអីមួយ ខ្ញុំតែងប្រឹងរកដំណោះស្រាយឲ្យទាល់តែបាន។ បើមិនដឹង មិនចេះ ក៏សង្វាតសួរនាំគេឯង និងប្រឹងហ្វឹកហាត់ខ្លួនឯងខ្លះ ហើយខ្ញុំរស់នៅបែបនេះតាំងពីនៅក្មេងមកម្ល៉េះ ខ្ញុំយល់ថានេះហើយជាទុនដ៏សំខាន់មួយ ជួយឲ្យខ្ញុំសម្រេចក្តីស្រមៃខ្លួនឯងបានដូចថ្ងៃនេះ»។ លោកបញ្ជាក់បន្ថែម។

គិតត្រឹមឆ្នាំ ២០២១នេះ លោក តុង សៀកអាន មានវ័យ ៣៧ឆ្នាំហើយ សព្វថ្ងៃជាម្ចាស់ក្រុមហ៊ុន CH Home Service ដែលកំពុងតែសាងកេរ្តិ៍ឈ្មោះល្បីល្បាញ ពិសេសក្នុងចំណោមភ្ញៀវចិន និងបរទេស។

CH Home Service គឺជាភ្នាក់ងារបច្ចេកវិទ្យាថ្មី ដែលជួយដោះស្រាយរាល់បញ្ហាការងារទាំងក្រៅ និងក្នុងផ្ទះ ព្រមទាំងបម្រើសេវាកម្មទូទាំងប្រទេសកម្ពុជា ដែលលោកអ្នកអាចទូរស័ព្ទហៅបានភ្លាមៗ និងផ្តល់សេវាកម្មរហ័សទាន់ចិត្ត។

កាន់តែច្បាស់អំពីសេវាកម្ម អាចចូលទៅកាន់គេហទំព័រហ្វេសបុកផេក របស់ក្រុមហ៊ុន CH Home Service ។

សម្រាប់ព័ត៌មានបន្ថែម ឬកក់ហៅសេវាកម្មណាមួយរបស់ CH Home Service ៖