មុនល្បី តារាទាំងនេះជួបឧបសគ្គវេទនា ខ្លះធ្លាប់ធ្លាក់ការប្រកួតឡើងល្វីងមុខដល់ទៅ ៥០ដង ទម្រាំជាប់

2021-05-20 06:43:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្លូវឆ្ពោះទៅរកភាពជោគជ័យក្នុងការក្លាយខ្លួនជាតារា K-Pop មិនស្រួលនោះទេ ហើយតារាច្រើននាក់ណាស់ដែលធ្លាប់រងទុក្ខ ក្រាញននៀលនឹងផ្លូវមានសុទ្ធតែបន្លានេះ ស៊ូគ្រប់ស្ថានភាពលំបាក ជាពិសេសបំបែករនាំងដំបូង គឺការប្រឡងចូលសិល្បៈ។ អ្នកខ្លះក៏មានសំណាងបានជាប់ភ្លាមៗ ស្របពេលខ្លះទៀតត្រូវបរាជ័យច្រើនដងណាស់ ទម្រាំមានវាសនាបានជាប់ ក្លាយជាមនុស្សម្នាក់ដែលគ្រប់គ្នាហៅ Idol ពេញៗមាត់។

១. Yeonjun (TXT)

ក្នុងវីដេអូផ្សាយផ្ទាល់មួយ Yeonjun បានលើកឡើងថា លោកបានធ្លាក់ពីការប្រកួតច្រើនដងណាស់ ក្នុងកម្មវិធិប្រកួតចូលសិល្បៈ។

កាលពីលោករៀននៅមធ្យមសិក្សា លោកបានចូលប្រកួតទាំងពាក់វ៉ែនតា និងឯកសណ្ឋានសិស្ស។ ពេលនោះ Yeonjun បរាជ័យច្រើនសាណាស់ ក្រោយមកក៏សម្រេចឈប់ពាក់វ៉ែនតាចូលប្រឡង នៅពេលមួយនោះ។ បន្ទាប់មកស្រាប់តែ លោកបានជាប់ក្នុងការប្រកួតជាច្រើនកន្លែង។

ដូចនេះជំនួសពីការពាក់វ៉ែនតា Yeonjun ក៏ពាក់ Contact Lens វិញ ទើបក្រោយៗមកលោករកផ្លូវឃើញ គឺជាប់នៅផលិតកម្ម Big Hit ក្លាយជាតារាល្បីទល់សព្វថ្ងៃ។

២. JooE (MOMOLAND)

ក្នុងបទសម្ភាស JooE បាននិយាយពីដំណើរតស៊ូដ៏សែនលំបាករបស់នាង ពេលក្លាយជាតារាម្នាក់។ នាងថា នាងចង់ក្លាយជាតារាចម្រៀងតាំងតែពីតូច ហើយចាប់ផ្ដើមចូលរៀនច្រៀង និងរាំ ពេលរៀននៅមធ្យមសិក្សា។ បើទោះបីសាលារៀននៅឆ្ងាយពីផ្ទះក៏ពិតមែន ក៏ប៉ុន្តែនាងនៅតែព្យាយាម ស៊ូទាល់តែសមត្ថភាពច្រៀងនាងឲ្យផលច្រើន។ ពេលនោះដែរ JooE ក៏បានដាក់ពាក្យចូលរួមប្រកួតច្រើនកន្លែងដែរ ប៉ុន្តែត្រូវបានគេបដិសេធមិនទទួលច្រើនលើក ច្រើនកន្លែងណាស់ ដល់ទៅ ៥០ដងឯណោះ។

ក្រោយមកនាងក៏បានចូលប្រកួតចូលផលិតកម្ម MLD ហើយពេលថ្នាក់ដឹកនាំឃើញពីសមត្ថភាព ក៏បានទទួលនាងមកធ្វើជាតារាយកតែម្ដង។

៣. IU

ពេលនេះអ្នកណាៗក៏ស្គាល់ថា នារីម្នាក់នេះល្បីឈ្មោះកម្រិតណាលើវិថីសិល្បៈកូរ៉េ ហើយទម្រាំមានថ្ងៃនេះ IU ប្រឈមនឹងរឿងលំបាកឆ្អែតឆ្អន់ហើយ។

កាលពីក្មេង គ្រួសារនាងជាប់បំណុលគេវ័ណ្ឌក ហើយនាងនិងប្អូន ត្រូវទៅនៅជាមួយជីដូន។ ដោយសារឃើញជីដូនខំប្រឹងចិញ្ចឹមពួកនាងទាំងមានវ័យចាស់ជរា ហើយបូកផ្សំនឹងទឹកចិត្តកតញ្ញូចង់ជួយសម្រាលបន្ទុក ទើប IU ចាប់ផ្ដើមសើរតាមក្ដីស្រមៃ និងស៊ូជាមួយនឹងវាសនា រហូតក្លាយជាតារា។ ប៉ុន្តែមុនបានជោគជ័យ នាងមានប្រវត្តិបរាជ័យពីការប្រកួតដល់ទៅ ២០ដង។ មិនត្រឹមតែប៉ុណ្ណោះ នាងធ្លាប់ទាំងត្រូវផលិតកម្មមួយ ធ្វើស៊ីនាង ដោយបោកប្រាស់នាងទៀតផង រហូតបានកន្លែងថ្មី ទើបរាសីនាងចាប់ផ្ដើមឡើងមកទីស្រួលវិញ។

៤. Choa (អតីតសមាជិក AOA)

ដំបូងឡើយ Choa ដាក់ពាក្យប្រឡងចូលផលិតកម្ម JYP និង SM ប៉ុន្តែគ្មានផលិតកម្មមួយណាទទួលទេ។ Choa ជាតារាស្រីម្នាក់ដែលមានបទពិសោធច្រើនជាមួយ SM ដោយសារនាងដាក់ពាក្យប្រកួត ១៥ដង ប៉ុន្តែបរាជ័យទាំងអស់ រហូតចុងបញ្ចប់ទើបនាងបានសម្រេចផ្លូវដើរ ពេលប្រឡងចូលផលិតកម្ម FNC និងបានក្លាយជាសមាជិក AOA កាលពីឆ្នាំ ២០១២ ដល់ឆ្នាំដែលនាងសម្រេចចេញពីក្រុម៕

ប្រភព៖ Koreaboo ប្រែសម្រួល៖ យី សុធារី