ចូលវ័យជាង៤០ឆ្នាំ ខាំ ភូរិ ដាច់ចិត្តបើកហាងរកស៊ីផ្ទាល់ខ្លួន រួចកំណត់ពេលដកឃ្លាពីសិល្បៈហើយ!

2021-07-22 08:21:15
ចំនួនមតិ 0 | ចំនួនចែករំលែក 0

ចន្លោះមិនឃើញ

បុត្រកាហ្វេ គឺជាហាងមួយរបស់អ្នកនិពន្ធ និងដឹកនាំរឿងល្បីឈ្មោះ ខាំ ភូរិ ទើបបើកដំណើរការបានជាង១០ថ្ងៃ។ នេះ គឺជាមុខរបរដំបូងដែលលោកចាប់យកក្រៅពីអាជីពសិល្បៈ ហើយប្រិយមិត្តខ្លះប្រាកដជានឹកគិតថាវាជាសញ្ញាណមួយបង្ហាញថាផលិតកររូបនេះកំពុងរៀបចំជើងព្រួលដើម្បីដកឃ្លាពីអាជីពសិល្បៈហើយ។

លោក ខាំ ភូរិ ប្រាប់Sabay នៅរសៀលថ្ងៃទី២២ ខែកក្កដា នេះថា រូបលោកនៅតែបន្តការងារនិពន្ធ និងដឹកនាំរឿងដដែលដោយចាប់ពីថ្ងៃច័ន្ទ ដល់ថ្ងៃព្រហស្បតិ៍ លោកធ្វើការងារសិល្បៈ ហើយចាប់ពីថ្ងៃសុក្រ ដល់ថ្ងៃអាទិត្យ លោកជួយមើលការខុសត្រូវហាងជាមួយគ្រួសារ។ ប៉ុន្តែលោកថា នៅពេលអាជីវកម្មដំណើរការល្អ លោកនឹងដកឃ្លាពីសិល្បៈពិតមែនហើយ ដោយបច្ចុប្បន្នលោកចាប់ផ្ដើមធុញថប់ក្នុងការរស់នៅទីប្រជុំជន ហើយចាប់ផ្ដើមស្រឡាញ់អ្វីៗបែបធម្មជាតិ និងរបស់ចាស់ៗ។

ខាំ ភូរិ៖"តាមពិតគម្រោងបើកហាងកាហ្វេហ្នឹង២ឆ្នាំហើយ តែទើប១ឆ្នាំកន្លះចុងក្រោយនេះ បងគេចចេញពីក្រុងដោយសារមានហានិភ័យខ្ពស់រឿងកូវីដ។ ខ្ញុំគិតថារយៈពេល៤ ទៅ១០ឆ្នាំទៀត នឹងដកឃ្លាពីសិល្បៈហើយ ព្រោះចូលវ័យជាង៤០ នេះ ចាប់ផ្ដើមស្រឡាញ់អ្វីបែបធម្មជាតិ និងរបស់ចាស់ៗ ទើបហាងកាហ្វេដេគ័របែបហ្នឹង"។

លោក ខាំ ភូរិ ដែលជាកូនប្រុសបង្កើតលោក ខាំ ភឿន អតីតអភិបាលខេត្តក្រចេះ បានកសាងកេរ្តិ៍ឈ្មោះយ៉ាងសម្បើមតាំងពីអំឡុងឆ្នាំ២០១២ មក។ កាលណោះលោកជាអ្នកដឹកនាំសម្ដែងលេចធ្លោវ័យក្មេងប្រចាំនៅស្ថានីយទូរទស្សន៍ហង្សមាស។ ឆ្លងកាត់អាជីពសិល្បៈជាច្រើនឆ្នាំមកនេះ បានធ្វើឲ្យលោកកាន់តែយល់ច្បាស់ពីវិស័យសិល្បៈ ហើយសេដ្ឋកិច្ចគ្រួសារក៏កាន់តែប្រសើរ ហើយការដែលលោកបើកហាងលក់ដូរនេះ គឺជាជំហានមួយឆ្ពោះទៅរកភាពជោគជ័យក្នុងជីវិត។

បុត្រកាហ្វេ ដែលជាហាងកាហ្វេ និងម្ហូបអាហារតូចល្មមមួយ ស្ថិតនៅសង្កាត់ព្រែកឯង ខណ្ឌច្បារអំពៅ រាជធានីភ្នំពេញ។ ហាងកាហ្វេ និងអាហាររបស់។ បើតាមលោក ខាំ ភូរិ បច្ចុប្បន្ន បុត្រកាហ្វេ មានភ្ញៀវពិតប្រាកដពីមន្ត្រីរាជការ បុគ្គលិកធនាគារ អ្នកនិយមជិះកង់ និងសិល្បករ-សិល្បការិនីចូលហូបជាប្រចាំ។ ក្រៅពីអាជីពនិពន្ធ និងដឹកនាំរឿង លោក ខាំ ភូរិ បានឆ្លៀតជួយការងារហាងច្រើនលើការតុបតែងហាងដោយដាក់ឧបករណ៍តន្ត្រីចាស់ៗ និងការទទួលភ្ញៀវ៕

អត្ថបទ៖ ជិន សុភ័ក្ដ្រ