កាក់កបណាស់! ណុប តុលា នៅតែអាចបន្តរកគ្រាប់បាល់បាន

2021-07-26 03:49:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងជំនួបជាមួយក្រុមបាតតារាងសូលទីឡូអង្គរ កាលពីថ្ងៃទី២៤ ខែកក្ដដា កន្លងទៅកីឡាករ ណុប តុលា នៅតែបន្តរកគ្រាប់បាល់បាន ពោលគឺបីគ្រាប់ហើយឱ្យណាហ្គាវើលដ៍ក្នុងនាមជាខ្សែប្រយុទ្ធ ហើយមួយគ្រាប់នេះគេធ្វើបាននៅនាទី៧៣។

អំឡុងពេលនោះលេងមិនទាន់ក្ដៅសាច់ដុំផង នៅតង់ទី១ត្រឺមតែ៤នាទីប៉ុណ្ណោះ ក្រុមម្ចាស់ផ្ទះសូលទីឡូអង្គរ បានដាក់១គ្រាប់នាំមុខ ១-០ ដោយកីឡាករ ណង វីលីក។ រហូតដល់នាទី២៨ កីឡាករ រដ្ឋ សំណាង រកបានមួយគ្រាប់ទៀត ចប់តង់ទី១ ម្ចាស់ផ្ទះនាំមុខ ២-០។ ចូលតង់ទី២ប្រធានក្រុម គួច សុគុម្ភៈ របស់ណាហ្គារកបានមួយគ្រាប់គានៅនាទី៤៨ ប៉ុន្តែនៅនាទី៥៩ កីឡាករ ណង វីលីក របស់សូលទីឡូបានបន្ថែមមួយគ្រាប់ទៀត ធ្វើឱ្យម្ចាស់ផ្ទះបន្តនាំមុខ ៣-១។

លុះរហូតដល់នាទី៧៣ ទើបខ្សែប្រយុទ្ធចំណូលថ្មីរបស់លោក មាស ចាន់ណា ណុប តុលា រកបានមួយគ្រាប់បន្ថែម និងចុងក្រោយធ្វើបានតាមស្មើដោយខ្សែការពារ នេន សុធារ័ត្ន នៅនាទី៩០+៤។

ចប់ការប្រកួតក្រុមជើងខ្លាំងណាហ្គាវើលដ៍ បានត្រឹមស្មើជាមួយម្ចាស់ផ្ទះ ៣-៣ មាន១៨ពិន្ទុ ឈរលេខរៀងទី៤បណ្ដោះអាសន្ន ក្រោយឆ្លងកាត់៩ប្រកួតនៃការប្រកួតដណ្ដើមពានរង្វាន់លីគកំពូលកម្ពុជារដូវកាល២០២១។ ចំណែកសូលទីឡូអង្គរវិញ ទើបមានមួយពិន្ទុប៉ុណ្ណោះឆ្លងកាត់៩ប្រកួត ពោលគឺមិនទាន់ស្គាល់ពាក្យឈ្នះនៅឡើយទេ។

ចំណែកពីរគ្រាប់ទៀតរបស់អតីតខ្សែការពារក្លឹបព្រះខ័នរាជស្វាយរៀង និងជម្រើសជាតិកម្ពុជា រកបានលើក្រុមអាស៊ីអឺរ៉ុបយូណាធីត និងអង្គរថាយហ្គឺរ។

ឆ្លងកាត់១០ប្រកួតកន្លងមកនេះ លេខ១នៅតែជាក្រុមខ្លាំងអង្គរថាយហ្គឺរ មាន២០ពិន្ទុ លេខ២ និងលេខ៣ បានលើក្រុមវិសាខា និងព្រះខ័នរាជស្វាយរៀង មាន១៩ពិន្ទុ ក្រោយឆ្លងកាត់ ៩ ប្រកួតដូចគ្នា៕

អត្ថបទ៖ អ៊ុំ សុភក្តិ