បទពិសោធជោគជាំ ធ្វើឲ្យ CL ដឹងថាជីវិតមនុស្សប្រៀបដូចសមរភូមិលើសង្វៀន វាយបុក

2021-12-15 04:10:29
ចំនួនមតិ 0 | ចំនួនចែករំលែក 0

ចន្លោះមិនឃើញ

បើសិនអ្នកតាមដានវិស័យ K-Pop តាំងពីជំនាន់ទី ២ នោះអ្នកប្រាកដជាដឹងពីទំហំនៃភាពល្បីល្បាញរបស់ CL តារាចម្រៀង និងជាអតីតមេក្រុមនារីដ៏មានឥទ្ធិពលប្រចាំវិស័យគឺ 2NE1។

ជាង ១២ឆ្នាំហើយដែល CL បានជម្នះរាល់ភាពលំបាកគ្រប់យ៉ាងសម្រាប់អាជីពសិល្បៈ ទាំងមុនចូលសិល្បៈ ពេលនៅជាក្រុម ពេលក្រុមបំបែក និងរហូតពុះពារលើវិថីជាតារាទោល ហើយត្រូវបរាជ័យរាប់មិនអស់ទៀត។

កន្លងផុតជាច្រើនឆ្នាំ CL ក៏នៅតែអាចស៊ូបាន រហូតមានសមត្ថភាពចេញអាល់ប៊ុមដោយខ្លួនឯងលើកដំបូងគឺ «ALPHA»។

«ប្រដាល់ ប្រៀបដូចជាជីវិតអ៊ីចឹង ពេលខ្លះ អ្នកត្រូវថយមកក្រោយ ពេលខ្លះអ្នកវៃចូល។ ប៉ុន្តែអ្នកត្រូវទប់លំនឹងឲ្យបានល្អបំផុត។ ខ្ញុំបានបញ្ចូលខ្លួនឯងក្នុង “Alpha Mode” ក្នុងការធ្វើអាល់ប៊ុម ហើយត្រូវតែជម្នះ មិនខ្លាចអ្វីទាំងអស់ ដើម្បីធ្វើវាឲ្យបាន»។ នេះជាការបញ្ជាក់របស់ CL។

តាំងពីថាសចម្រៀងរបស់នាងគឺ "In the Name of Love” ចេញតាំងពីឆ្នាំ ២០១៩ វាបានក្លាយជារឿងថ្មីមួយទៀតសម្រាប់ជីវិតសិល្បៈ។ ក្រោយមក ពេលបង្កើត Label ខ្លួនឯងនៅឆ្នាំ ២០២០ គឺ "Very Cherry” CL កាន់តែយល់ដឹងបានច្រើនពីអ្វីគ្រប់យ៉ាងដែលនៅជុំវិញខ្លួន រហូតនាងអាចសន្សំបទពិសោធក្នុងការចេញអាល់ប៊ុម "ALPHA” នេះបាន។

ពេលនេះ CL គឺជាតារាស្រីម្នាក់ដែលកាន់តែរឹងមាំជាមុនឆ្ងាយ ព្រោះឆ្លងកាត់ឧបសគ្គរាប់មិនអស់ ដួលហើយប្រឹងងើបឈរវិញ នាងកាន់តែមានជំនឿមុតមាំក្នុងជីវិត៕

ប្រភព៖ Koreaboo ប្រែសម្រួល៖ យី សុធារី