រំជួលចិត្ត! ដឹងរឿងពិការដៃរបស់កីឡាករអុកចត្រង្គ ជា ស៊ីដេត គ្រោះថ្នាក់សន្លប់២០ថ្ងៃ

2021-12-27 00:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ជា ស៊ីដេត កីឡាករមានថ្មីដៃលើប្រភេទកីឡាអុកចត្រង្គរំលឹកពីហេតុការណ៍គ្រោះថ្នាក់ចរាចរណ៍នៅប្រទេសថៃ ត្រូវសន្លប់រហូត២០ថ្ងៃ និងបាត់បង់ដៃឆ្វេងប៉ុន្តែមិនបោះបង់កីឡានៅតែតស៊ូលេងជាប់លេខ២ជើងឯកថ្នាក់ជាតិ។

កីឡាករ ជា ស៊ីដេត កំពុងប្រកួត

កីឡាករ ជា ស៊ីដេត បានឲ្យដឹងថា ចំពោះរឿងពិការដៃឆ្វេងនេះគឺកើតឡើងប្រហែល២ឆ្នាំមុននេះទេ នៅពេលដែលលោកបើកឡានជូនពលករខ្មែរទៅធ្វើការនៅប្រទេសថៃ។ រំលឹកដល់រឿងអតីតកាលជើងខ្លាំងលេងអុកចត្រង្គរូបនេះជួបគ្រោះថ្នាក់កាលនោះសន្លប់រហូតដល់ទៅ ២០ថ្ងៃទើបដឹងខ្លួន និងត្រូវសម្រាកក្នុងពេទ្យប្រហែល១ខែផងដែរ។

កីឡាករ ជា ស៊ីដេត កំពុងប្រកួត

បើទោះជាពិការដៃម្ខាងមិនដូចមុនក្ដីបុរសវ័យ ៣៨ឆ្នាំរូបនេះ មិនបានបាក់ទឹកចិត្ត ឬបោះបង់ក្ដីសង្ឃឹមនោះឡើយ ពោលនៅខំប្រឹងបន្តមុខរបរជាអ្នកបកប្រែថៃ និងទំនាក់ទំនងការងារពលករដូចមុន។ ពិសេសទៀតនោះគឺមិនមានប៉ះពាល់ដល់ខួរក្បាលជាហេតុមិនអាចបន្តការលេងអុកចត្រង្គរបស់លោកទេ។ អ្នកខេត្តបាត់ដំបងខាងលើនៅតែលះបង់ និងបន្តក្ដីស្រមៃក្នុងការចូលរួមប្រកួតកីឡាអុកចត្រង្គរបស់លោករហូតជាប់លេខ២កាលពីពេលថ្មីៗនេះក្នុងព្រឹត្តិការណ៍ជើងឯកថ្នាក់ជាតិ ឆ្នាំ២០២១។

ទិដ្ឋភាពប្រគល់ពានរង្វាន់

រំលឹកដែរថា កីឡាករ ជា ស៊ីដេត ជាអតីតម្ចាស់ពានលេខ១ក្នុងព្រឹត្តិការណ៍បុណ្យសមុទ្រនៅខេត្តកោះកុងកន្លងទៅ។ លោកចាប់លេងអុកប្រហែល២០ឆ្នាំមកហើយ។ កាលពីថ្ងៃទី២៤ ខែធ្នូ ឆ្នាំ២០២១ នេះ ស៊ីដេត បានជាប់លេខ២ កម្មវិធីជើងឯកថ្នាក់ជាតិ បន្ទាប់ពីលេងស្មើគ្នា២ក្កា និងចាញ់ម៉ោងលើកីឡាករ ម៉េង សេរីសម្បត្តិ៕

អត្ថបទ៖ នួន ស៊ីណា