ធ្លាប់តែឃើញឈុតសម្ដែងដ៏រន្ធត់ និងកំប្លែងខ្លីៗគេបង្ហោះលើបណ្ដាញសង្គមFacebook កាលពីប៉ុន្មានសប្ដាហ៍មកនេះ រវាងតារាភាពយន្ដបរទេសស្បែកខ្មៅម្នាក់ ជាមួយតារាជើងចាស់ ទេព រិនដារ៉ូ ឥឡូវនេះមានរឿងពេញហើយ កំពុងដាក់បញ្ចាំងនៅក្នុង Angkor DC។

លោក ទេព រិនដារ៉ូ ដែលជាតួអង្គសំខាន់ម្នាក់នៅក្នុងរឿង“វិញ្ញាណទីងមោង” បាននិយាយបែបកំប្លែង និងកាច់កុងគ្នាយ៉ាងសាហាវជាមួយបុរសស្បែកខ្មៅរូបនោះ។ គេអាចនិយាយបានថា នេះជាខ្សែភាពយន្ដដំបូងគេក្នុងឆ្នាំ២០២២ សម្រាប់លោក ទេព រិនដារ៉ូ ប៉ះជាមួយជនបរទេស ដែលធ្វើឲ្យទស្សនិកជនផ្ទុះសំណើច។

“វិញ្ញាណទីងមោង” គឺជាស្នាដៃនិពន្ធ និងដឹកនាំសម្ដែងដោយលោក ចែម សារឿន ហៅ​នាយគ្រឿន។ ខ្សែភាពយន្ដខ្នាតធំបែបកំប្លែងនេះ មានការអញ្ជើញចូលរួមដោយតារាបរទេស និងតារាខ្មែរល្បីៗជាច្រើន ដូចជា៖ លោក ទេព រិនដារ៉ូ លោក ចែម សារឿន ហៅនាយគ្រឿន លោក ប៊ីអាយជី លោក ងួន សុបិន ឌីជេ កាកា និងតារាសម្ដែងបរទេសស្បែកខ្មៅសប្បូរវោហារ គឺលោក Daniel ជាដើម៕