ក្រៅពីបញ្ចេញទូរសព្ទកំពូល Mi12 និងនាឡិកាឆ្លាតចំនួន ២ ម៉ូឌែលរួចមក Xiaomi ក៏បានប្រកាសចេញនូវកាសឥតខ្សែកំពូលរបស់ខ្លួន មានមុខងារទប់សំឡេងរំខាន នៅក្នុងរូបរាងដ៏តូចច្រឡឹង។

កាសនេះមានឈ្មោះថា Xiaomi Buds 3T Pro មុខងារពិសេសរបស់វា គឺមាន Microphone ចំនួន៣គ្រាប់ ធ្វើការរួមគ្នាទប់សំឡេងរំខានបានខ្លាំង ដល់ទៅ 40dB។ Xiaomi Buds 3T Pro ប្រើប្រាស់ Driver សំឡេងទំហំ ១០មីល្លីម៉ែត្រ Dual-magnet dynamic គាំទ្រកូដសំឡេង LHDC 4.0 អាចបញ្ចេញសំឡេងបានដល់ទៅ 900 kbps bitrate។

កាសនេះផ្ទាល់មានសមត្ថភាពការពារទឹកកម្រិត IP55 មិនត្រឹមតែប៉ុណ្ណោះប្រអប់កាសក៏ការពារទឹកផងដែរ ងាយស្រួលក្នុងការប្រើប្រាស់ក្នុងស្ថានភាពសំណើម និងមានធូលីហុយខ្លាំង។ ចំណែកកម្លាំងថ្មរបស់វាអាចប្រើប្រាស់បានដល់ទៅ ២៤ម៉ោង ហើយនៅលើកាសផ្ទាល់អាចប្រើបាន៦ម៉ោង។

Xiaomi Buds 3T Pro ដាក់លក់ក្នុងតម្លៃ ១៩៩ដុល្លារ ដែលជាតម្លៃមួយដ៏ថ្លៃបើប្រៀបធៀបនឹងឧបករណ៍ដទៃដែល Xiaomi ធ្លាប់បានចេញលក់៕

អត្ថបទ៖ Thea Sothun