លោក មាស ចាន់ណា ជុំវិញការប្រកួតទល់ក្រុមខ្លាំង Bali នៅ AFC Cup ល្ងាចនេះ

2022-06-27 02:22:34
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក មាស ចាន់ណា គ្រូបង្វឹករបស់ក្លឹបវិសាខាសង្ឃឹមថា ក្រុមរបស់លោកនឹងអាចលេងបានល្អជាងប្រកួតទី១ ក្នុងពានរង្វាន់ AFC Cup 2022 នៅប្រទេសឥណ្ឌូណេស៊ីវេលាម៉ោង៤ល្ងាចនេះនៅទឹកដីប្រទេសឥណ្ឌូណេស៊ី សម្រាប់ការប្រកួតទី២ក្នុងពូល G ទល់ក្រុម Bali United ។

អតីតគ្រូបង្វឹករបស់ក្លឹបណាហ្គាវើលដ៍រូបនេះ បាននិយាយក្នុងសន្និសីទកាសែតមុនការប្រកួតទល់ក្រុម Bali ថា «…ខ្ញុំសង្ឃឹមថានឹងក្លាយជាការប្រកួតដ៏អស្ចារ្យ ដោយសារយើងនឹងត្រូវលេងក្រោមក្រសែភ្នែកទស្សនិកជនរាប់ម៉ឺននាក់ ហើយខ្ញុំក៏សង្ឃឹមដែរថា ក្រុមរបស់យើង នឹងធ្វើបានល្អជាងប្រកួតទី១ទៀត»។

ងាកទៅកាន់ការលេងរបស់ម្ចាស់ផ្ទះវិញលោក មាស ចាន់ណា បានពន្យល់យ៉ាងដូច្នេះថា « Bali ជាក្រុមខ្លាំងមួយក្នុងពូល ហើយក៏ជាក្រុមខ្លាំងជាងគេផងដែរ។ ប៉ុន្តែក្រោយពេលយើងលេងទល់ Kaya ខ្ញុំឃើញថា កម្រិតរបស់យើង និង Bali ក៏ប្រហាក់ប្រហែលគ្នាដែរ។ … ចំណុចល្អរបស់ Bali គឺពួកគាត់មានការប្រមូលអារម្មណ៍បានល្អ នៅដើមតង់ និងចុងតង់...»។

គ្រូបង្វឹកដដែលបានបន្ថែមថា មុនពេលចាកចេញពីប្រទេសកម្ពុជា លោកបានកំណត់គោលដៅហើយថា នឹងធ្វើយ៉ាងណាយកឈ្នះ២ស្មើ១ ក្នុងនោះគឺឈ្នះ Kaya ស្មើ Bali និងឈ្នះ Kedah។ ប៉ុន្តែបន្ទាប់ពីលោកបានឃើញកូនក្រុមលេងបានល្អយកឈ្នះ Kaya ២-១ នៅប្រកួតទី១ លោកចង់ឈ្នះទាំង៣ប្រកួតតែម្ដង៕

អត្ថបទ៖ ស្រី សុវណ្ណដារ៉ា