នៅសប្ដាហ៍ទី ៥ នៃវគ្គ Live Show របស់ Cambodian Idol រដូវកាល​ទី ៤ ពិតជា​ធ្វើឲ្យអ្នកទស្សនាព្រឺរោមមិនស្ទើរទេ ដោយសារភាពអស្ចារ្យ​នៃ​ការ​បង្ហាញ​សមត្ថភាព​បេក្ខជន ព្រម​ជាមួយនឹង​សន្ធឹកនៃការគាំទ្រ ស្រែកហ៊ោររបស់អ្នកទស្សនាផ្ទាល់នៅស្ទូឌីយោ។

បេក្ខភាព​ទាំងអស់ត្រូវបង្ហាញ​សមត្ថភាព​ ដោយច្រៀង «បទចម្រៀងមនោសញ្ចេតនាស្នេហាស្រុកស្រែ» មិនមែន ១បទ ប៉ុន្តែដល់ទៅ ២បទ។ ក្រៅ​ពីសម្ដែង​សមត្ថភាព​ទោលរៀងខ្លួន ពួកគេត្រូវ​បាន​កម្មវិធី​តម្រូវ​ឲ្យចាប់ដៃគូគ្នា ១ក្រុម ៣នាក់។

គណៈកម្មការទាំង ៤ ដែល​ជា​អ្នកសម្រិតសម្រាំងបេក្ខភាពតាំងពីវគ្គ Audition រហូត​មក ពិតជា​រីករាយ និង​រំភើប ហើយចាត់ទុកថា នេះ​ជា​ប្រវត្តិសាស្ត្រថ្មី មិនធ្លាប់មានពីមុនក្នុងកម្មវិធី Cambodian Idol។ ដោយសារតែ​ក្តុកក្ដួលពេក ណុប បាយ៉ារិទ្ធ​ ដែលជាគណៈកម្មការឆ្នើម​មួយរូបប្រចាំកម្មវិធី ៤ រដូវកាលនោះ ក៏ស្រាប់តែស្រក់ទឹកភ្នែក ដោយ​ថែម​ទាំង​បាន​លើកឡើងម្ដងហើយម្ដងទៀតថា នេះ​ហើយជា​សុបិនដែល​ខ្លួនចង់បាន ហើយវា​បាន​ក្លាយជា​ការពិត។ មួយវិញទៀត សបញ្ជាក់ថា​ កម្មវិធី Cambodian Idol ពិតមិនចាញ់កម្មវិធីនៅបរទេស​ឡើយ។

ចុចទស្សនាវីដេអូទាំងស្រុងនៅទីនេះ!

យ៉ាងណា​មិញ សម្រាប់​សប្ដាហ៍ទី ៥ នៃវគ្គ Live Show នេះដែរ បេក្ខភាព​ដល់ទៅ ៣ រូប មាន​ ផាន គីម សុង, ឡាច ណុច និង លី ប៊ីលី ត្រូវ​ចាកចេញពីកម្មវិធី ដោយ​ទទួល​បាន​ការ​បោះ​ឆ្នោតគាំទ្រពីទស្សនិកជន តិចជាងគេ។ ប៉ុន្តែទោះជាយ៉ាងណា ពួកគេ​ត្រូវ​បាន​គេ​ស្គាល់ច្បាស់ពេកហើយ ថា​ជា​បេក្ខភាពជើងខ្លាំង ដែល​មាន​សមត្ថភាព​បរ្ផបដូចតារាចម្រៀងអាជីព និង​ត្រូវ​គណៈកម្មការលើកសរសើរជានិច្ច។ ការចាកចេញរបស់​ពួកគេ ពិតជា​បាន​ធ្វើឲ្យមហាជន​មាន​ការសោកស្ដាយជា​ខ្លាំង៕

អត្ថបទ៖ យី សុធារី