ឯកឧត្តម ខៀវ កាញ៉ារីទ៖ លើលោក មានតែព្រះពុទ្ធសាសនា១ទេ ដែលរីកចម្រើនដោយមិនមានហិង្សា

2022-11-24 03:37:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិភពលោកយើងនេះដើរទៅជាមួយនឹងការដុះដាលជំនឿសាសនារាប់រយ ជាមួយគ្នាការប្រឹងសាបព្រួសសាសនាផងខ្លួន ខ្លះបានឈានទៅដល់វិវាទសាសនា។ តែក្នុងនោះ មានតែសាសនាព្រះពុទ្ធមួយប៉ុណ្ណោះ ដែលរីកដុះដាលឡើងដោយមិនមានហិង្សា។ នេះ បើតាមការលើកឡើងរបស់ឯកឧត្តម ខៀវ កាញ៉ារីទ្ធ រដ្ឋមន្ត្រីក្រសួងព័ត៌មាន និងជាពុទ្ធសាសនិកមួយរូប។

ឯកឧត្តម រដ្ឋមន្ត្រី បានលើកឡើងដូច្នេះនៅក្នុងបទសម្ភាសន៍ផ្ទាល់ជាមួយអ្នកសារព័ត៌មាន ក្នុងឱកាសដែលលោកឧកញ្ញា បណ្ឌិត ស៊ុបបាំឆៃ វីរៈភូជុងជា អគ្គលេខាធិការនៃស្ថាប័នពោធិគៈយ៉ាវិទ្យាល័យ ៩.៨០ បានរៀបចំកម្មវិធីជប់ លៀង galadinner ទទួលស្វាគមន៍ ឯកឧត្តម ឆាយសុំផន ព្រហ្មវិហាន ប្រធាន សភាតំណាងរាស្ត្រនៃសាធារណរដ្ឋប្រជាធិបតេយ្យប្រជាមានិតឡាវនៅសណ្ឋា គារ Sofitel Phnom Penh Phokeethra។

ឯកឧត្តមរដ្ឋមន្ត្រី បានថ្លែងថា សាសនាព្រះពុទ្ធ ដែលបានរីកដុះដាលរាប់រយឆ្នាំមកនេះ គឺមិនមានការបង្ខំ ឬគាបប្រទេសណាមួយឲ្យជឿ តែសាសនានេះ គឺរីកដុះដាលដោយការទទួលស្គាល់ដោយឯកឯង ព្រោះថា សាសនាព្រះពុទ្ធ គឺអប់រំឲ្យមនុស្សស្រឡាញ់គ្នា ជួយគ្នា។ ដូច្នេះហើយ ទើបកម្ពុជា សម្រេចយកសាសនាព្រះពុទ្ធធ្វើជាសាសនារបស់រដ្ឋ។

យ៉ាងណា ឯកឧត្តមបានសង្កត់ធ្ងន់ថា ក្នុងន័យនេះ មិនមានន័យថា សាសនាព្រះពុទ្ធល្អលើសសាសនានានានោះទេ។ "យើងលើកព្រះពុទ្ធសាសនាធ្វើជារបស់រដ្ឋ តែជាមួយគ្នា យើងក៏គោរពអ្នកឯទៀតដែលកាន់សាសនាផ្សេងដែរ។ នេះជាចំណុចសំខាន់ណាស់នៃព្រះពុទ្ធសាសនា ដែលយើងចៀសបាននៅសង្គ្រាមសាសនានៅក្នុងប្រទេស ហើយអាចឲ្យមនុស្សដែលកាន់សាសនាផ្សេងគ្នា អាចរួមរស់ជាមួយគ្នាកសាងសង្គមមួយរួមគ្នាប្រកបដោយសុខដុមរម្យនា"។

ឯកឧត្តម ខៀវ កាញ៉ារីទ ត្រៀមនឹងចូលរួមជាថ្មីក្នុងក្បួនធម្មយាត្រាលើកទី៣ ដែលផ្ដួចផ្ដើមដោយ ស្ថានប័នពោធិគៈយ៉ាវិទ្យាល័យ ៩.៨០ របស់ ឧកញ្ញាបណ្ឌិត ស៊ុបបាំឆៃ វីរៈភូជុង។ ឯកឧត្តមបានចូលរួមម្ដងរួចហើយនៅក្នុងក្បួនធម្មយាត្រាលើកទី២ ដែលបានឆ្លងកាត់សាធារណរដ្ឋប្រជាធិបតេយ្យប្រជាមានិតឡាវ ចូលទៅកាន់ប្រទេសវៀត ណាម ក្នុងខេត្ត - ឌៀន បៀន ហ្វូ និងបានមើលឃើញពីភាពសំខាន់ពីការផ្សាយព្រះធម៌របស់ព្រះពុទ្ធទៅកាន់ពុទ្ធសាសនិកជុំវិញពិភពលោក។

ធម្មយាត្រាដ៏ធំប្រចាំនេះ ត្រៀមនឹងរៀបចំលើកទី៣នៅឆ្នាំ ២០២៤ខាងមុខ។ ថ្លែងនៅក្នុងពិធីទទួលស្វាគមន៍ឯកឧត្តម ឆាយ សុំផន ព្រហ្មវិហាន ជាប្រធានសភាតំណាងរាស្ត្រនៃសាធារណរដ្ឋប្រជាធិបតេយ្យប្រជាមានិតឡាវ ដែលបានអនុញ្ញាត្តឲ្យស្ថាប័នពោធិគៈយ៉ាវិទ្យាល័យ ៩.៨០ដឹកនាំក្បួនធម្មយាត្រាលើកទី២ ចូលទៅកាន់ទឹកដីឡាវ ឧកញ្ញាបណ្ឌិត ស៊ុបបាំឆៃ វីរៈភូជុង ប្រាប់ថា គោលបំណងសំខាន់របស់ធម្មយាត្រា គឺចង់បង្កើតចលនាផ្សព្វផ្សាយព្រះធម៌របស់ព្រះពុទ្ធដល់ប្រទេស ក្នុងទ្វីបអាស៊ី ឱ្យប្រកាន់ខ្ជាប់នូវជំនឿតាមបែបព្រះពុទ្ធសាសនា វិធីសាស្ត្រនៃការគិត មិនធ្វើបាបឬប៉ះ ពាល់នរណាម្នាក់។ លោកលើកឡើងថា "យើងចង់ឃើញប្រជាជនក្នុងអាស៊ីដែលជាកូនចៅរបស់យើង រស់នៅយ៉ាងស្ងប់សុខ និងសន្តិភាព"។

តាមលោក ស៊ុបប៉ាឆៃ វីរៈភូជុង សម្រាប់គម្រោងធម្មយាត្រាលើកទី ៣ នៅឆ្នាំ២០២៤ នេះ តាមផែនការ គឺលោកចង់រៀបចំយ៉ាងធំដល់ទៅ ៧ ប្រទេសឯ ណោះ ដែលក្នុងនោះច្បាស់ណាស់មានកម្ពុជា ឡាវ មីយ៉ានម៉ា វៀតណាម ថៃ និងស្នើសុំការចូលរួមពី ប្រទេស ២ ទៀត គឺឥណ្ឌា និងចិន ដែលយើងឃើញថាប្រជាជនភាគច្រើនកាន់សាសនាព្រះពុទ្ធដូចគ្នាដែរ។

ការហែឆ្លងកាត់ប្រទេសចំនួន ៥ នៃដងទន្លេមេគង្គ មាន ថៃ កម្ពុជា ឡាវ វៀតណាម និងមីយ៉ាន់ម៉ា នឹងរួមគ្នាដល់ថ្ងៃបញ្ចប់នៃការដង្ហែរមកដល់ទឹកដីអង្គរហើយមានការ ដាំដើមពោធិ៍ រាប់បាត្រព្រះសង្ឃជាង៣០០អង្គ ពិធីប្រកាសបិទ និងមកដល់មុខអង្គវត្ត(អង្គតូច)។ ចុងក្រោយធ្វើពិធីឧទ្ទិសដល់ព្រះមហាព្រះក្សត្រខ្មែរនៃអាណាចក្រអង្គរ ហើយថែមទាំងថ្វាយទីទៀនដល់សម្តេចសង្ឃ និងព្រះសង្ឃ៕