E-Sports៖ ឈ្នះមេដាយសំរឹទ្ធពិភពលោក ជាសញ្ញាណល្អមុនពេលស៊ីហ្គេម ២០២៣

2022-12-13 03:57:30
ចំនួនមតិ 0 | ចំនួនចែករំលែក 0

ចន្លោះមិនឃើញ

សហព័ន្ធកីឡាអេឡិចត្រូនិក (E-Sports) ការឈ្នះមេដាយសំរឹទ្ធពិភពលោកនៅឯប្រទេសឥណ្ឌូណេស៊ី លើកនេះជាសញ្ញាណល្អមួយមុនឈានដល់ស៊ីហ្គេម ២០២៣ ដែលកម្ពុជាម្ចាស់ផ្ទះ។

ទិដ្ឋភាពម្សិលមិញ

លោក លន់ សាមាឌី អគ្គលេខាធិការសហព័ន្ធ E-Sports បានឲ្យដឹងថា មេដាយសំរឹទ្ធពិភពលោកនេះជាប្រវត្តិសាស្ត្រសម្រាប់កម្ពុជាហើយ តាំងពីបង្កើតមករយៈពេល ៤-៥ឆ្នាំមកនេះមិនដែលទទួលបានលើវិញ្ញាសា Mobile Legends: Bang Bang នេះឡើយ។

អគ្គលេខាធិការរូបនេះបន្ថែមទៀតថា ក្រុមកីឡាករកម្ពុជាគឺធ្វើបានល្អ និងសង្កេតឃើញថាមានការរីកចម្រើនគួរកត់សម្គាល់ពីគុណផលកីឡា។ មេដាយសំរឹទ្ធពិភពលោកនេះគឺជាសញ្ញាណល្អមួយដើម្បីឈានទៅដណ្ដើមមេដាយកម្រិតណាមួយជូនកម្ពុជាពេលស៊ីហ្គេម ២០២៣។

ទិដ្ឋភាពម្សិលមិញ

តំណាងសហព័ន្ធរូបនេះក៏បង្ហាញការប្ដេជ្ញាពង្រឹងសមត្ថភាព ដុសខាត់ និងជំរុញលើការហ្វឹកហាត់ដល់កីឡាករជម្រើសជាតិទាំងអស់ដើម្បីជាការត្រៀមខ្លួនប្រជែងមេដាយ ឬស្វែងរកមោទកភាពជូនជាតិមាតុភូមិ ឆ្នាំ២០២៣។

ទិដ្ឋភាពម្សិលមិញ

រំលឹកដែរថា ក្រុម Impunity KH របស់កម្ពុជា ឈ្នះមេដាយសំរឹទ្ធ ១គ្រឿង នៃការប្រកួតកីឡាអេឡិចត្រូនិកជើងឯកពិភពលោកលើកទី១៤ (14TH IESF World Esport Championship) ឆ្នាំ២០២២ រៀបចំដោយសហព័ន្ធកីឡាអេឡិចត្រូនិកអន្តរជាតិ នៅប្រទេសឥណ្ឌូនេស៊ីកាលពីថ្ងៃទី១ ដល់ ១១ ខែធ្នូ ឆ្នាំ២០២២។ ល្ងាចម្សិលមិញនេះប្រតិភូ កីឡាករ បានវិលមកដល់កម្ពុជាវិញហើយ៕

អត្ថបទ៖ នួន ស៊ីណា