ស្ថាបនិកសហព័ន្ធអុកចត្រង្គកម្ពុជា និងជាអតីតស្តេចអុកទសវត្សរ៍៩០កំពុងខ្វះថវិកាព្យាបាលជំងឺ
- 2022-12-14 07:45:31
- ចំនួនមតិ 0 | ចំនួនចែករំលែក 0
ស្ថាបនិកសហព័ន្ធអុកចត្រង្គកម្ពុជា និងជាអតីតស្តេចអុកទសវត្សរ៍៩០កំពុងខ្វះថវិកាព្យាបាលជំងឺ
ចន្លោះមិនឃើញ
លោក គ្រួច ចន្ថារិទ្ធ គ្រូបង្វឹកកីឡាករជម្រើសជាតិរបស់សហព័ន្ធកីឡាអុកចត្រង្គកម្ពុជាកំពុងខ្វះខាតថវិកាក្នុងការព្យាបាលជំងឺធ្ងន់ធ្ងរដោយដង្ហោយហៅស្វែងរកជំនួយឧបត្ថម្ភពីសប្បុរសជនទាំងក្នុង និងក្រៅប្រទេសដើម្បីជួយសម្រាលបន្ទុកចំណាយលើការព្យាបាល។
អតីតស្តេចអុកទសវត្សរ៍៩០ ដែលមានឈ្មោះល្បីរន្ទឺ ទាំងក្នុងស្រុក និងដល់ប្រទេសថៃត្រូវបានគេមហាជនស្គាល់ទូទៅថា លោកគ្រូត្រេន មានជំងឺបានសម្រាកព្យាបាលនៅមន្ទីរពេទ្យមួយរយៈពេលធំហើយ។ ស្ថានភាពជំងឺរបស់លោក ត្រូវការថវិកាមួយចំនួនធំដើម្បីចំណាយលើការព្យាបាលឲ្យមានសុខភាពប្រសើរឡើងវិញ។
បច្ចុប្បន្នសហព័ន្ធកីឡាអុកចត្រង្គកម្ពុជាក៍កំពុងជួបឧបសគ្គក្រោយពេលលោកគ្រូ ចន្ថារិទ្ធ សម្រាកនៅមន្ទីរពេទ្យ ពីព្រោះសហព័ន្ធត្រូវខ្វះធនធានគ្រូ ដើម្បីពង្រឹងសមត្ថភាពអត្តពលិកត្រៀមប្រកួតកីឡាស៊ីហ្គេមនា ខែឧសភា ឆ្នាំ២០២៣ ខាងមុខ។
សូមរំលឹកផងដែរថា លោកគ្រូត្រេន បានលះបង់កម្លាំងកាយចិត្ត និង ពេលវេលាស្ទើរពេញមួយជីវិតរបស់លោក ក្នុងវិស័យកីឡាអុកចត្រង្គកម្ពុជា។ លោកជាស្ថាបនិកមួយរូបដែលចូលរួមចំណែកយ៉ាងសំខាន់ក្នុងការបង្កើតសហព័ន្ធអុកចត្រង្គជាផ្លូវការកាលពីប៉ុន្មានឆ្នាំកន្លងទៅនេះ ដោយមិនទទួលបានថវិកា ឬប្រាក់ឧបត្ថម្ភអ្វីឡើយ។ រហូតដល់មានការរៀបចំជាគ្រូបង្វឹកផ្លូវការទើបលោកទទួលបានប្រាក់ឧបត្ថម្ភតាមគោលការណ៍ របស់សហព័ន្ធ និងក្រសួងអប់រំ យុវជន និងកីឡា។
ព្រឹទ្ធាចារ្យអុកចត្រង្គរូបនេះ ត្រូវបានមហាជន អ្នកស្នេហាវិស័យអុកចត្រង្គកម្ពុជា ទទួលស្គាល់ពីកម្រិតសមត្ថភាព និងទទួលបានការគោរពច្រើនជាងគេបំផុត។ លោកធ្លាប់ជាជើងឯក និងជើងឯករងអុកចត្រង្គជាច្រើនសម័យកាល។ ជាក់ស្តែងលោកបានក្លាយជាស្តេចអុកចត្រង្គកាលពីឆ្នាំ២០០១ និងជាប្រធានគណៈកម្មការរៀបចំការប្រកួតកីឡាអុករបស់សហព័ន្ធកីឡាអុកចត្រង្គកម្ពុជា។ កំឡុងពេលកំពុងល្បីឈ្មោះ លោកតែងតែចំណាយពេលវេលាដើម្បីដកស្រងបច្ចេកទេសជាមួយអ្នកស្នេហាវិស័យនេះទូទាំងប្រទេសនិងជាមួយកីឡាករល្បីឈ្មោះបំផុតរបស់ថៃផងដែរ។
កន្លងមកមានសប្បុរសជនជាកីឡាករតាមក្លឹបអុកចត្រង្គនានាដែលជាសមាជិករបស់សហព័ន្ធ និងសហព័ន្ធផ្ទាល់ ក៏បានចូលរួមជួយថវិកាមួយចំនួនដើម្បីជួយសម្រាលបន្ទុកចំណាយដល់គ្រួសាររបស់លោកបានខ្លះៗដែរ។ ទោះបីជាយ៉ាងណា ស្ថាន ភាពជំងឺរបស់លោកត្រូវការថវិកា មួយចំនួនធំថែមទៀតដើម្បីព្យាបាលឲ្យបានធូរស្រាល។វត្តមានរបស់លោក ពិតជាសំខាន់ណាស់ក្នុងការចូលរួមចំណែកបន្តពង្រឹងដល់កីឡាដែលជាកេរ្ត៍តំណែលរបស់ដូនតាកម្ពុជា ជាពិសេសសម្រាប់ការត្រៀមខ្លួនដណ្តើមមេដាយជូនជាតិពីកីឡាស៊ីហ្គេម លើកទី៣២ ឆ្នាំ២០២៣ ជាលើកដំបូងក្នុងប្រវត្តិសាស្រ្ត លើទឹកដីនៃព្រះរាជាណាចក្រកម្ពុជា៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
