FIFA World Cup ឆ្នាំ ១៩៩៨ គឺជាការប្រកួតជើងឯកពិភពលោកលើកទី ១៦ ដែលធ្វើឡើងនៅប្រទេសបារាំងចាប់ពីថ្ងៃទី ១០ ខែមិថុនាដល់ថ្ងៃទី ១២ ខែកក្កដាឆ្នាំ ១៩៩៨។ បារាំងត្រូវបានជ្រើសរើសជាប្រទេសម្ចាស់ផ្ទះដោយ FIFA ជាលើកទីពីរក្នុងប្រវត្តិសាស្ត្រនៃការប្រកួត ដោយបានយកឈ្នះប្រទេសម៉ារ៉ុកក្នុងដំណើរការដេញថ្លៃ។ វាជាលើកទីពីរហើយដែលបារាំងរៀបចំការប្រកួត (លើកទីមួយគឺនៅឆ្នាំ ១៩៣៨) និងលើកទី៩ ដែលធ្វើឡើងនៅអឺរ៉ុប។ World Cup លើកនេះមានរយៈពេល ៣២ ថ្ងៃ វាគឺជាការប្រកួតយូរបំផុតដែលមិនធ្លាប់មាន។

វគ្គជម្រុះ​បានចាប់ផ្តើមនៅខែមីនា ឆ្នាំ ១៩៩៦ ហើយបានបញ្ចប់នៅខែវិច្ឆិកា ឆ្នាំ ១៩៩៧ ។ នេះគឺជាលើកដំបូងនៅក្នុងការប្រកួត វគ្គចែកពូលត្រូវបានបង្កើនពី ២៤ ក្រុមទៅ ៣២ ក្រុម។ ការប្រកួតចំនួន ៦៤ លេងនៅក្នុងកីឡដ្ឋានចំនួន ១០ ក្នុងទីក្រុង១០ ជាមួយនឹងការប្រកួតបើកឆាក និងការប្រកួតចុងក្រោយធ្វើឡើងនៅកីឡដ្ឋាន Stade de France។

ទីក្រុងដែលរៀបចំ និងកីឡដ្ឋាន

ការដេញថ្លៃរបស់ប្រទេសបារាំងដើម្បីធ្វើជាម្ចាស់ផ្ទះការប្រកួត World Cup ផ្តោតលើពហុកីឡដ្ឋានជាតិដែលមានកៅអីអង្គុយចំនួន ៨ម៉ឺន និងកីឡដ្ឋានចំនួន ៩ផ្សេងទៀតនៅទូទាំងប្រទេស។ អភិបាលក្រុងប៉ារីស លោក Jacques Chirac បានចរចាដោយជោគជ័យនូវកិច្ចព្រមព្រៀងជាមួយនាយករដ្ឋមន្ត្រី Édouard Balladur ដើម្បីសង់កីឡដ្ឋាន Stade de France ​ស្ថិតនៅភាគខាងជើងនៃរដ្ឋធានី។ ការសាងសង់នៅលើកីឡដ្ឋានបានចាប់ផ្តើមនៅខែធ្នូ ឆ្នាំ ១៩៩៥ ហើយត្រូវបានបញ្ចប់​ ឆ្នាំ ១៩៩៧ ដោយចំណាយប្រាក់ចំនួន ២​,៦៧ ពាន់លានហ្វ្រង់។

កីឡដ្ឋានសរុប ១០ បានប្រើប្រាស់សម្រាប់ការប្រកួត។ ការប្រកួតចំនួន ៩ ដែល​បានលេងនៅកីឡដ្ឋាន Stade de France (កីឡដ្ឋានដែលប្រើប្រាស់ច្រើនបំផុតក្នុងការប្រកួត) ការប្រកួតចំនួន ៦ ទៀតបានកើតឡើងនៅ Parc des Princes របស់ Paris Saint-Germain ​នាំឱ្យការប្រកួតសរុបនៅទីក្រុងប៉ារីសធ្វើជាម្ចាស់ផ្ទះដល់ទៅ ១៥។ ការប្រកួតចំនួន ៧ នៅពហុកីឡដ្ឋានជាតិ និង Lyon ធ្វើជាម្ចាស់ផ្ទះការប្រកួតសរុបចំនួន ៦។ Nantes, Toulouse, Bordeaux, Montpellier និង Saint-Etienne សុទ្ធតែធ្វើជាម្ចាស់ផ្ទះចំនួន ៦ ប្រកួត។

ក្រុមដែលចូលរួម

ការ​ប្រកួត​ជម្រុះ​ទាំង ៣២ ក្រុម​ត្រូវ​បាន​បែង​ចែក​ជា​ ៨ ពូល​ដែល​បាន​បង្កើត​មូលដ្ឋាន​នៃ​ការ​ចាប់​ឆ្នោត​សម្រាប់​វគ្គ​ចែក​ពូល។ ក្រុមដែលចូលរួមមានដូចជា៖​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​

ប្រេស៊ីល បារាំង (ក្រុមម្ចាស់ផ្ទះ​) អាល្លឺម៉ង់ អ៊ីតាលី អេស្ប៉ាញ ​អាហ្សង់ទីន​ រូម៉ានី ​ហូឡង់ អូទ្រីស បែលហ្សិក ប៊ុលហ្គារី ក្រូអាត ដាណឺម៉ាក អង់គ្លេស ស្កុតឡេន យូហ្គោស្លាវី ន័រវេស ឈីលី កូឡុំប៊ី អ៊ីរ៉ង់ ជប៉ុន ប៉ារ៉ាហ្គាយ អារ៉ាប៊ីសាអូឌីត កូរ៉េខាងត្បូង កាមេរូន ហ្សាម៉ាអ៊ីក ម៉ិកស៊ិក ម៉ារ៉ុក នីហ្សេរីយ៉ា អា​ហ្វ្រិកខាងត្បូង ទុយនីស៊ី និងសហរដ្ឋអាមេរិក។

វគ្គផ្ដាច់ព្រ័ត្រ

វគ្គផ្តាច់ព្រ័ត្រត្រូវបានធ្វើឡើងនៅថ្ងៃទី ១២ ខែកក្កដាឆ្នាំ ១៩៩៨ នៅ Stade de France, Saint-Denis ។បារាំង​បាន​​ឈ្នះ​​​ប្រេស៊ីល​ក្នុង​លទ្ធផល ៣-០ ដោយ​ ២ គ្រាប់​​​របស់ Zinedine Zidane និង​ការ​ស៊ុត​បញ្ចូល​ទី​ដោយ​​កីឡាករ Emmanuel Petit។ ជ័យជម្នះនេះបានធ្វើឱ្យបារាំងលើកពាន World Cup ជាលើកដំបូង ដោយក្លាយជាក្រុមជម្រើសជាតិទី ៦ បន្ទាប់ពីអ៊ុយរូហ្គាយ អ៊ីតាលី អង់គ្លេស អាល្លឺម៉ង់ខាងលិច និងអាហ្សង់ទីន ដើម្បីឈ្នះការប្រកួតនៅលើទឹកដីខ្លួនឯង។

កីឡាករលេចធ្លោ

Zinedine Zidane គឺជាកីឡាករដ៏លេចធ្លោជាងគេសម្រាប់ការប្រកួតនេះ បើទោះជារូបលោករកបានត្រឹម ២គ្រាប់នៅ World Cup ទាំងមូលក៏ដោយ។ ឈ្មោះពេញ Zinedine Yazid Zidane​ កើតថ្ងៃទី ២៣ ខែមិថុនា ឆ្នាំ ១៩៧២ ដែលត្រូវបានគេស្គាល់ថា Zizou គឺជាអតីតកីឡាករដែលលេងជាខ្សែបម្រើប្រយុទ្ធ។ Zidane ត្រូវ​ចាត់ទុក​ ជាកីឡាករដ៏អស្ចារ្យបំផុតមួយរូបគ្រប់សម័យកាល ហើយក៏ជាកីឡាករដ៏ល្បីសម្រាប់ភាពចម្រុះ ចក្ខុវិស័យ ការបញ្ជូនបាល់ ការគ្រប់គ្រងបាល់ និងបច្ចេកទេសរបស់គាត់។ Zidane បានឈ្នះពានបុគ្គលជាច្រើនក្នុងនាមជាកីឡាករ រួមទាំងការជាប់ជាកីឡាករឆ្នើមប្រចាំឆ្នាំរបស់ FIFA ក្នុងឆ្នាំ ១៩៩៨, ២០០០ និង ២០០៣ និងការឈ្នះ Ballon d'Or ឆ្នាំ ១៩៩៨៕