ខ្សែភាពយន្តជប៉ុន ប្រមាណ ៣០ចំណងជើង ត្រូវបានដែលបានជ្រើសរើស​យក​មក​ចាក់បញ្ចាំងក្នុងមហោស្រពភាពយន្តជប៉ុន (JFF) នៅរោងភាពយន្ត Major Cineplex by Smart ទាំង ៣ ចាប់ពីថ្ងៃទី ទី១៣ ដល់ថ្ងៃទី២៩ ខែមករា ឆ្នាំ២០២៣។

ភាពយន្តជប៉ុនទាំងនោះមានជាប្រភេទភាពយន្តបែប មនោសញ្ចេតនា ស្រមើស្រមៃ អាថ៌កំបាំង គំនូរជីវចល អានីមេ និងរឿងកំប្លែងជាដើម។ ភាពយន្តទាំងនោះ ឆ្លុះបញ្ចាំងឱ្យឃើញពីជីវភាពរស់នៅរបស់ប្រជាជន សង្គម និងវប្បធម៌របស់ជនជាតិជប៉ុន។

ក្នុងចំណោមខ្សែភាពយន្តទាំង ៣០រឿងនោះ ក៏មានភាពយន្តមួយចំនួនធ្លាប់ទទួលបានពានរង្វាន់ និងគំនូរជីវចលជប៉ុន ឈីងចាំង ដែលមានប្រិយភាពជាងគេនៅកម្ពុជាផងដែរ។

ក្រៅពីការទស្សនារឿងឈីងចាំងថ្មីដោយឥតគិតថ្លៃ លោកអ្នកក៏អាច​មក​ជួប និង​ថតរូប​ជាមួយឈីងចាំង​ ផ្ទាល់ ហើយ​ចូលរួម​កម្មវិធីសប្បាយៗបានផងដែរ។

កាលវិភាគបញ្ចាំងរឿងឈីងចាំងថ្មី មានដូចាខាងក្រោម៖

• រោងភាពយន្ត Major Cineplex AEON 1 ថ្ងៃទី ១៥ មករា ២០២៣ ម៉ោង 15:00 – 16:44
• រោងភាពយន្ត Major Cineplex AEON 2 ថ្ងៃទី ១៥ មករា ២០២៣ 20:00 – 21:44
• រោងភាពយន្ត Major Cineplex AEON 3 ថ្ងៃទី ១៤ មករា ២០២៣ 15:00 – 17:44 និង 19:00 – 20:44

ខុសពីលើកមុនៗ ស្ថានទូតជប៉ុន រៀបចំ «មហោស្រពភាពយន្តជប៉ុនលើកទី៨ នៅកម្ពុជា» ក្នុងរូបភាពធំជាងមុនៗ ក្នុងខេត្តក្រុងចំនួន៤ នៅក្នុងប្រទេសកម្ពុជា ដើម្បីអបអេសាទរនៃគម្រប់ខួប អនុស្សាវរីយ៍លើកទី ៧០ឆ្នាំ របស់ប្រទេសទាំងពីរ ដោយស្ថិតនៅក្រោមការសហការរបស់ស្ថានទូតជប៉ុនប្រចាំកម្ពុជា ក្រសួងវប្បធម៌ និងវិចិត្រសិល្បៈ ជាមួយនឹង មជ្ឈបណ្ឌលសហប្រតិបត្តិការកម្ពុជា-ជប៉ុន (CJCC) ព្រមទាំងមានក្រុមហ៊ុនធំៗផ្សេងទៀតចូលរួមឧបត្ថម្ភផងដែរ។

មហោស្រពភាពយន្តជប៉ុន ត្រូវបានធ្វើឡើងក្នុងខេត្តក្រុងចំនួន៤នោះរួមមាន៖ ខេត្តបាត់ដំបងដែលបានធ្វើការចាក់បញ្ចាំងនៅរោងភាពយន្តឯកភ្នំ កាលពីថ្ងៃទី២ ដល់ថ្ងៃទី៤ ខែធ្នូ ឆ្នាំ២០២២។ នៅខេត្តកំពង់ចាម ភាពយន្តជប៉ុនត្រូវបានចាក់បញ្ចាំងនៅសាលមហោស្រពព្រះសីហមុនី នៅថ្ងៃទី១៦ ដល់ទី១៨ ខែធ្នូ ឆ្នាំ២០២២។

នៅរាជធានីភ្នំពេញ ការចាក់បញ្ចាំងភាពយន្តជប៉ុននឹងធ្វើឡើងនៅរោងភាពយន្ត Major Cineplex by Smart ក្នុងផ្សារទំនើបអ៉ីអនម៉លទាំង ៣ សាខា ពីថ្ងៃទី១៣ ដល់ថ្ងៃទី២៩ ខែមករា ឆ្នាំ​២០២៣។ មហោស្រពនឹងបន្តការចាក់បញ្ចាំងនៅ ខេត្តសៀមរាប នៅរោងភាពយន្ត Major Cineplex by Smart ចាប់ពីថ្ងៃទី៣ ដល់ថ្ងៃទី៥ ខែកុម្ភៈ ឆ្នាំ២០២៣។

លើកលែងតែរឿងឈីងចាំងដែលការទស្សនាឥតគិតថ្លៃ សំបុត្រទស្សនាភាពយន្តជប៉ុនផ្សេងទៀតមានតម្លៃ ១ ត្រឹមតែដុល្លារប៉ុណ្ណោះ ហើយមានលក់នៅកន្លែងលក់ពោតតាមរោងភាពយន្តដែលបញ្ចាំង។

លើសពីនេះទៅទៀតដោយគ្រាន់តែថតវីដេអូ ៦០ វិនាទីដោយប្រើទូរស័ព្ទដៃនៅមហោស្រពភាពយន្តជប៉ុន ហើយមកកាន់ប្រអប់សារ Messenger របស់ Japanese Film Festival - Cambodia មុនថ្ងៃទី ២៣ ខែមករា ទស្សនិកជននឹងទទួលបានឱកាសឈ្នះដាវ Demon slayer ភ្លាម។

សូមមើលកាលវិភាគបញ្ចាំងរបស់ JFF ភ្នំពេញ ដូចខាងក្រោមនេះ៖