យុន ភ្ញាក់ផ្អើលពេលភ្នំពេញនៅតែលេងល្អ ទោះអត់មាន ធី ម៉េងហ៊ួង

2023-01-30 07:10:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្មាត់ យុន ស្រែស្រែ ឬឈ្មោះពេញ ទុយ កុសល បាននិយាយថាខ្លួនពិតជាភ្ញាក់ផ្អើលចំពោះការលេងបានយ៉ាងល្អរបស់ត្រីឆ្លាំងភ្នំពេញ បើទោះជាពួកគេមិនមានស្មាត់ធំ ធី ម៉េងហ៊ួង។

ក្រុមត្រីឆ្លាំងភ្នំពេញ បានបាត់បង់កីឡាករឆ្នើមម្នាក់ស្មាត់ ធី ម៉េងហ៊ួង ក្នុងការប្រកួតជាមួយក្រុមដំរីសៀមរាបនៅពេលព្រឹក។ ចំណុចនេះហើយ ទើបបានជាភ្នំពេញ ស្ទើរកម្លាំងបន្ដិចក្នុងការប្រកួតជាមួយក្រុមពង្រួលកំពង់ស្ពឺ របស់ស្មាត់ យុន ខណៈដែលក្រុមនេះពេញកម្លាំងហើយ ថែមទាំងពេញដៃល្អថែមទៀត មិនមានកីឡាកររបួសនោះទេ។ តែទោះជាយ៉ាងនេះក្ដី ភ្នំពេញ នៅតែអាចតតាំងរហូតដល់សិតទី៥ដដែល ទើបកាត់សេចក្ដីថាក្រុមណាជាក្រុមឈ្នះ។

ក្រោយពីចប់ការប្រកួត ហើយក្រុមយុន ជាអ្នកឈ្នះពានរង្វាន់ slamball ជាមួយប្រាក់រង្វាន់៥ពាន់ដុល្លារ អមជាមួយពានមាសមួយផងនោះ រូបគេបាននិយាយបែបនេះថា៖ “មុនការប្រកួតខ្ញុំគិតថា យ៉ាងខំណាស់ក៏ខ្ញុំស៊ី៣-១ដែរ តែដល់ពេលលេងជាក់ស្ដែងខ្ញុំឃើញថា គេល្អដែរ ចឹងយើងពិបាកដែរ។ ចំណុចដែលធ្វើឲ្យក្រុមខ្ញុំពិបាកស៊ីគេដែរហ្នឹង ព្រោះថា យើងលេងមិនសូវត្រូវគ្នា។ ចំពោះពាននេះវិញ ខ្ញុំមើលឃើញថាពិតជាល្អ ព្រោះមានការប្រកួតតាមខេត្ត ដែលឱ្យកីឡាករអាចបញ្ចេញសមត្ថភាពបាន”។

រំលឹកថាក្រុមពង្រួលកំពង់ស្ពឺ មានសរុប៥នាក់គឺ ទុយ កុសល ហៅយុនស្រែស្រែ, ឆ្វេងហ្ស៊ីនស្រុកខ្មែរ ទុយ រាជ ហៅអធិរាជប្រអប់ស្មាត់រាជ, អ្នកប៉ះសេឆ្នើម នួន វិចិត្រ មកពីក្លឹបអង្គរក្ស៣១១, អតីតកីឡាករជំនាញដេញបាល់លឿនក្លឹបរដ្ឋបាលរាជធានីភ្នំពេញ កែវ សុធារិទ្ធ, ខ្លាចាស់កំពូលល្បិច ផាត សុភ័ក្ត្រ ហៅទូចអង្គរក្ស និងដឹកនាំដោយលោក សៅ សាមីត អធិរាជឆាស្រុកខ្មែរ។ ពួកគេធ្វើបានល្អណាស់ ពោលគឺក្នុងពានរង្វាន់នេះមិនចាញ់មួយប្រកួតណានោះទេ មានកំណត់ត្រាឈ្នះ១០០%តែម្ដង៕

អត្ថបទ៖ ប្រុស យុទ្ធ