The Voice Cambodia ជិតវិលមកវិញ មានបេក្ខជនម្នាក់ ស្រែកថាដាក់ពាក្យប្រឡង ៤ដង កុំថាឡើយជាប់ សូម្បីតែឡើងឆាកក៏មិនបាន ឥឡូវ ណុប បាយ៉ារិទ្ធ ផ្ដល់គំនិតថ្មី

2023-02-16 08:28:20
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមគម្រោងកម្មវិធីប្រកួតចម្រៀងលំដាប់ពិភពលោក The Voice Cambodiaរបស់ក្រុមហ៊ុន ហង្ស មាស នឹងវិលមកវិញនៅខែមីនា ឆ្នាំ២០២៣ បន្ទាប់អាក់ខានជាច្រើនឆ្នាំ។ លោក ណុប បាយ៉ារិទ្ធ ដែលជាសមាជិកគណៈកម្មការម្នាក់ ក៏បានប្រកាសឲ្យបេក្ខជន-បេក្ខនារីដែលមានក្ដីប្រាថ្នាចង់ក្លាយជាតារាចម្រៀងអាជីព ត្រូវត្រៀមខ្លួនដាក់ពាក្យប្រឡង។

ដោយមានបេក្ខជន-បេក្ខនារី ទិញពាក្យចូលប្រឡងរាប់ពាន់នាក់ គណៈកម្មការរៀបចំកម្មវិធី តម្រូវឲ្យបេក្ខជនខ្លះត្រូវតេស្ដ ឬសាកល្បងសំឡេងរបស់ខ្លួនដោយផ្ទាល់ និងខ្លះត្រូវថតសំឡេងរបស់ខ្លួនផ្ញើតាមរយៈតេឡេក្រាមទៅកាន់គណៈកម្មការ ក្នុងវគ្គជម្រុះ។ ទន្ទឹមគ្នានេះ មានបេក្ខជន-បេក្ខនារីខ្លះ ចង់បញ្ចេញសមត្ថភាពដោយផ្ទាល់។

ជាក់ស្ដែងបេក្ខជនម្នាក់ឈ្មោះ អែម សៀន និយាយថា ខ្លួនធ្លាក់ដាក់ពាក្យប្រឡង និងបានផ្ញើសំឡេងតាមONLINE ចំនួន៤លើកហើយ ប៉ុន្ដែមិនដែលជាប់ទាល់តែសោះ។ ក្រោយពីទទួលបានការត្អូញត្អែរនេះ តារាចម្រៀង ណុប បាយ៉ារិទ្ធ និងជាសមាជិកគណៈកម្មការម្នាក់ បានផ្ដល់គំនិតទៅប្អូននោះវិញ។

លោក ណុប បាយ៉ារិទ្ធ និយាយថា ប្រឡងវគ្គជម្រុះដំបូងដោយផ្ទាល់ ត្រូវតម្រង់ជួររង់ចាំដោយមានមនុស្សរាប់ពាន់នាក់ឈរតម្រង់ជួរដូចគ្នា ទម្រាំដល់វគ្គប្អូន។ ពេលនោះ ត្រូវបញ្ចេញសមត្ថភាពមុខក្រុមការងារមិនក្រោម ១០នាក់ និងនៅមុខកាមេរ៉ាថតផ្ទាល់ៗ។ លោកបានដាក់សំណួរទៅកាន់ប្អូនប្រុសថា តើប្អូនច្បាស់ទេថាប្អូនមិនមានអារម្មណ៍ភ័យសោះ? ហើយមានឱកាសច្រៀងតែម្តងគត់ ឬបទទី២ប្រសិនក្រុមការងារវិភាគថាសំឡេងប្អូន អាចច្រៀងបទណាមួយបានពីរោះ គេនឹងផ្តល់ឱកាសលើកទី២ ។

លោកបញ្ជាក់ថា ផ្ទុយទៅវិញបើប្អូនសម្រេចប្រឡងតាមOnline មានតែប្អូនប៉ុណ្ណោះដែលនៅពីមុខកាមេរ៉ាថតរបស់ប្អូន ហើយប្រមូលអារម្មណ៍ច្រៀងបទដែលប្អូនចង់ច្រៀងគិតថាពីរោះ ថតនៅកន្លែងណាដែលប្អូនមានទំនុកចិត្តថាមិនខ្ទរ មិនមានសម្លេងរំខាន មិនបាច់រង់ចាំ ចង់ថតពេលណា ម៉ោងណាជារឿងរបស់ប្អូន ថតហើយស្តាប់ថាល្អផ្ញើរឲ្យក្រុមការងារ គឺចប់។

លោក ណុប បាយ៉ារិទ្ធ បន្ថែមថា បើថតមួយបទមិនទុកចិត្ត អាចថត ២ រឺ៣ បទដើម្បីឲ្យខ្លួនឯងមានជម្រើស។ សំខាន់បើប្អូនមានសមត្ថភាព អត់មានអ្វីដែលពិបាកទេ កម្មវិធីព្យាយាមសម្រួលដល់បេក្ខជនទៅវិញទេដោយមិនចាំចំណាយពេលក្រោកពីព្រឹកទៅឈរតម្រង់ជួររង់ចាំយូរ ទម្រាំដល់វេនយើង។

រូបថត៖ ហ្វេសប៊ុក ណុប បាយ៉ារិទ្ធ

ការជជែកគ្នាពីលក្ខណ្ឌ និងដំណើរការប្រកួតកម្មវិធី The Voice Cambodia នេះ គឺបន្ទាប់ពីផេកអ្នករៀបចំកម្មវិធី បានប្រកាសពីដំណឹងវិលមកវិញរបស់កម្មវិធីដ៏អស្ចារ្យនេះ ហើយត្រូវបានលោក ណុប បាយ៉ារិទ្ធ ចែករំលែកបន្ដ ដោយបញ្ជាក់ពីការចាប់ផ្ដើមប្រគំតន្ដ្រីនៅតាមខេត្ដមួយចំនួនជាមុន ហើយកម្មវិធីប្រកួត នឹងចាប់ផ្ដើមនៅអំឡុងខែមីនា ឆ្នាំ២០២៣៕

ជិន សុភ័ក្ដ្រ