ស្ពានអាកាសឫស្សីកែវប្រកាសបើកឱ្យប្រើហើយ ឯស្ពានឆ្លងកាត់ទន្លេសាបដែលនៅជាមួយគ្នា ក៏នឹងបើកមុនចូលឆ្នាំខ្មែរដែរ

2023-02-27 06:30:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រមុខរាជរដ្ឋាភិបាលកម្ពុជា បានអនុញ្ញាតដាក់ឱ្យប្រើប្រាស់ជាបណ្តោះអាសន្នស្ពានអាកាសឫស្សីកែវ ស្ថិតក្នុងភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ ចាប់ពីថ្ងៃទី១ ខែមីនា ឆ្នាំ២០២៣។

រដ្ឋបាលរាជធានីភ្នំពេញ បានជូនដំណឹងកាលពីចុងសប្តាហ៍កន្លងទៅថា ស្ពានដែលត្រូវបានបើកការដ្ឋានសាងសង់កាលពីថ្ងៃទី៣១ ខែមករា ឆ្នាំ២០២២មួយនេះ សម្រេចការសាងសង់ស្ទើរតែ ១០០% ហើយបច្ចុប្បន្ននេះ ដោយនៅសល់តែការងារក្រាលកៅស៊ូ និងអ៊ុតគំនូសចរាចរ ហើយគ្រោងបញ្ចប់ការដ្ឋានសាងសង់ទាំងស្រុងនាប៉ុន្មានថ្ងៃខាងមុខនេះ។

សូមជម្រាបថា ស្ពានអាកាសនេះមានបណ្តោយ ៤៨៣ម៉ែត្រ និងទទឹង ១៥,៨ម៉ែត្រ ដែលក្រុមហ៊ុនវិនិយោគទុនអាណិកជនកម្ពុជា (OCIC) ទទួលបានគោលការណ៍សាងសង់ពីរាជរដ្ឋាភិបាល។

ចំណែកស្ពានមួយទៀតដែលនៅស្ថិតនៅចំណុចនោះផងដែរ គឺស្ពានបេតុងខ្សែកាបឫស្សីកែវឆ្លងកាត់ទន្លេសាបភ្ជាប់ទៅតំបន់អភិវឌ្ឍន៍ជ្រោយចង្វារ ក៏គ្រោងនឹងបញ្ចប់នៅដើមខែមេសា ឆ្នាំ២០២៣ផងដែរ ពោលគឺគ្រោងនឹងបើកឱ្យប្រើប្រាស់បណ្តោះអាសន្ននៅមុនចូលឆ្នាំខ្មែរ ខណៈគិតត្រឹមពាក់កណ្តាលខែមករា សម្រេចបាន ៩៣% ហើយ។

ស្ពានខ្សែកាបនេះ ត្រូវបានសាងសង់ចេញពីចំណុចឃ្លាំងស្តុកសាំងសូគីម៉ិច ផ្លូវជាតិលេខ៥ ទៅតំបន់អភិវឌ្ឍន៍ទីក្រុងរណបជ្រោយចង្វារ ដែលស្ថិតក្នុងសង្កាត់ព្រែកតាសេក ខណ្ឌជ្រោយចង្វារ។ ស្ពាននេះ មានប្រវែង ៦៤២ម៉ែត្រ ទទឹង ២០,៥ម៉ែត្រ មានសសរទាញខ្សែកាបចំនួន៤ កម្ពស់ ៤០ម៉ែត្រ ធៀបនឹងកម្រាលស្ពាន៕