ជា ថាវី៖ ខ្ញុំមានមោទកភាពជាស្ត្រីខ្មែរមួយរូបដែលជ្រើសរើសឲ្យធ្វើចៅក្រមអន្តរជាតិកីឡាអាស៊ីនៅចិន

2023-10-16 04:32:32
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា ជា ថាវី ថាខ្លួនពិតជាមានមោទកភាពក្នុងនាមស្ត្រីខ្មែរមួយរូបដែលគេជ្រើសរើសឲ្យធ្វើអាជ្ញាកណ្ដាល ចៅក្រមអន្តរជាតិប្រកួតកីឡាអាស៊ី លើកទី១៩ ដែលធ្វើនៅប្រទេសចិនថ្មីៗនេះ។

កញ្ញា ជា ថាវី (រូបភាពហ្វេសបុកផេកការ៉ាតេមហាផ្ទៃ)

កញ្ញា ជា ថាវី ដែលជាគ្រូ និងចៅក្រមរបស់សហព័ន្ធកីឡាការ៉ាតេ បានឲ្យដឹងថា នេះជាលើកទី១ ហើយសម្រាប់កញ្ញាដែលបានចូលរួមធ្វើជាចៅក្រមអាជ្ញាកណ្ដាលក្នុងព្រឹត្តិការណ៍កីឡាអាស៊ី លើកទី១៩ នៅហាន់ចូវ ប្រទេសចិន។ ការចូលរួមនេះគឺទទួលបានបទពិសោធច្រើនពីព្រឹត្តិការណ៍ ព្រោះមានបណ្ដាចៅក្រម អាជ្ញាកណ្ដាលអន្តរជាតិជាច្រើនក្នុងអាស៊ីដែលបានមក។

កញ្ញា ជា ថាវី (រូបភាពហ្វេសបុកផេកការ៉ាតេមហាផ្ទៃ)

គ្រូការ៉ាតេខាងលើនេះប្រាប់ទៀតថា ក្នុងនាមជានារីខ្មែរមួយរូបគឺមានមោទកភាពដែលបានជ្រើសរើសឲ្យធ្វើជាអាជ្ញាកណ្ដាល ចៅក្រមអន្តរជាតិក្នុងព្រឹត្តិការណ៍ធំមួយនេះ។ ចំពោះអ្នកដែលត្រូវគេជ្រើសរើសគឺទាមទារសមត្ថភាពខ្លាំង និងមានលក្ខខណ្ឌដូចជាមាន Full Licence មាន World Licence និងការអនុវត្តន៍ការងារ (Performance) បានល្អទៀតផង។និយាយជារួមគឺជ្រើសរើសអ្នកល្អលើល្អ (Best of the Best)ព្រោះជាព្រឹត្តិការណ៍ធំហើយសំខាន់។

កញ្ញា ជា ថាវី (រូបភាពហ្វេសបុកផេកការ៉ាតេមហាផ្ទៃ)

បញ្ជាក់ដែរថា ព្រឹត្តិការណ៍កីឡាអាស៊ី លើកទី១៩ នេះគឺធ្វើឡើងនៅប្រទេសចិន អំឡុងថ្ងៃទី២៣ កញ្ញា ដល់ ៨ តុលា ឆ្នាំ២០២៣ ទើបបញ្ចប់ទៅថ្មីៗនេះ។ កញ្ញា ជា ថាវី ជាស្ត្រីខ្មែរមួយរូបដែលបានជ្រើសរើសឲ្យធ្វើជាចៅក្រម អាជ្ញាកណ្ដាលអន្តរជាតិលើប្រភេទកីឡាការ៉ាតេ ក្នុងព្រឹត្តិការណ៍ធំមួយនេះ៕