ផ្លូវល្បឿនលឿន រក្សាតម្លៃដដែលក៏ពិតមែន តែមានចំណុច១ដែលខុសគ្នារវាងអ្នកប្រើប្រាស់គន្លង ETC និងបង់សាច់ប្រាក់សុទ្ធ
- 2023-11-08 02:14:19
- ចំនួនមតិ 0 | ចំនួនចែករំលែក 0
ផ្លូវល្បឿនលឿន រក្សាតម្លៃដដែលក៏ពិតមែន តែមានចំណុច១ដែលខុសគ្នារវាងអ្នកប្រើប្រាស់គន្លង ETC និងបង់សាច់ប្រាក់សុទ្ធ
ចន្លោះមិនឃើញ
ក្រសួងសាធារណការ និងដឹកជញ្ជូន បានឱ្យដឹងថា ក្រុមហ៊ុនផ្លូវល្បឿនលឿន ភ្នំពេញ-ព្រះសីហនុ បានសម្រេចបន្តរក្សាតម្លៃដដែល (គឺបញ្ចុះ២០%) ដើម្បីជាការអបអរសាទរខួប១ឆ្នាំ នៃការបើកឱ្យដំណើរការផ្លូវល្បឿនលឿននេះ និងដោយមានការសម្របសម្រួលពី រាជរដ្ឋាភិបាលកម្ពុជា ក្រសួងសេដ្ឋកិច្ចនិងហិរញ្ញវត្ថុ ក្រសួងសាធារណការ និងដឹកជញ្ជូន និងក្រុមប្រឹក្សាអភិវឌ្ឍន៍កម្ពុជា ក៏ដូចជាក្រោមការចង្អុលបង្ហាញដោយផ្ទាល់ពីសម្តេចធិបតី ហ៊ុន ម៉ាណែត ។ ប៉ុន្តែមានចំណុចខុសគ្នាមួយចំពោះការរក្សាតម្លៃនេះ គឺ៖
អ្នកប្រើប្រាស់គន្លង ETC និង ANPR៖ ក្រុមហ៊ុនបន្តរក្សាតម្លៃដដែលនេះរយៈពេលពេញមួយឆ្នាំ គិតពីថ្ងៃទី១ វិច្ឆិកា ២០២៣ ដល់ ថ្ងៃទី៣១ តុលា ២០២៤។
អ្នកប្រើប្រាស់ផ្លូវ ដែលទូទាត់ជាសាច់ប្រាក់សុទ្ធ (MTC)៖ ក្រុមហ៊ុនរក្សាតម្លៃដដែលត្រឹមតែរយៈពេល ៦ខែប៉ុណ្ណោះ គិតចាប់ពីថ្ងៃទី ១ វិច្ឆិកា ២០២៣ ដល់ ថ្ងៃទី៣០ មេសា ២០២៤។
យោងតាមក្រសួងសាធារណការ ក្នុងរយៈពេល ១ឆ្នាំនេះមានយានយន្តធ្វើដំណើរសរុបចំនួន ៤ ៦៧៩ ២២២ គ្រឿង។ ផ្លូវល្បឿនលឿននេះ បានដើរតួនាទីយ៉ាងសំខាន់ក្នុងការនាំយក នូវបទពិសោធន៍នៃការធ្វើដំណើរថ្មី ចំណេញពេលវេលា កាត់បន្ថយគ្រោះថ្នាក់និងការកកស្ទះចរាចរណ៍ ព្រមទាំងលើកកម្ពស់ប្រសិទ្ធភាពនៃការធ្វើដំណើរជូន ដល់បងប្អូនប្រជាពលរដ្ឋ។ ជាពិសេស ផ្លូវមួយខ្សែនេះបានចូលរួមសម្រួលដល់ការ ដឹកជញ្ជូនទំនិញរវាង ប៉ូលសេដ្ឋកិច្ចភ្នំពេញ និងប៉ូលសេដ្ឋកិច្ចក្រុងព្រះសីហនុ ដែលជំរុញឱ្យសេដ្ឋកិច្ចជាតិមានការរីកចម្រើន៕