ឯកឧត្តម ហ៊ុន ម៉ានី មើលឃើញថាប្រជាពលរដ្ឋមានការយល់ដឹងច្រើន អំពីបញ្ហាសំរាម

2023-12-04 03:20:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្តម ហ៊ុន ម៉ានី រដ្ឋមន្រ្តីក្រសួងមុខងារសាធារណៈ និងជាសហស្ថាបនិកនៃគម្រោងស្អាត បានបង្ហាញពីភាពវិជ្ជមានដោយបានឃើញប្រជាពលរដ្ឋមានការយល់ដឹងច្រើនអំពីបញ្ហាសំរាម ជាពិសេសក្នុងអំឡុងពេលពិធីបុណ្យអុំទូកកន្លងទៅនេះ គឺមានការគ្រប់គ្រងសំរាមបានល្អ ដោយអ្នកចោលសំរាមតិចជាងមុន។ ឯកឧត្តមបានថ្លែងដូច្នេះ ក្នុងពិធីបិទយុទ្ធនាការភ្នំពេញស្អាតឆ្នាំ២០២៣ កាលពីល្ងាចថ្ងៃទី៣ ខែធ្នូ ឆ្នាំ២០២៣ នៅមជ្ឈមណ្ឌលម៉ានី (KAMPUS)។

ឯឧត្តមបានថ្លែងកោតសរសើរគ្រប់ភាគីស្ថាប័នពាក់ព័ន្ធក្នុងយុទ្ធនាការនេះ ដែលបានចូលរួមលើកកម្ពស់ការយល់ដឹងអំពីបញ្ហាសំរាម។ តែយ៉ាងណាមិញ ឯកឧត្តមបានបញ្ជាក់ថា ការយល់ដឹងពីសំរាមនេះ គឺត្រូវការរយៈពេលយូរទៀត ហើយត្រូវមានក្រើនរំលឹកគ្នាជាប្រចាំ។

ក្នុងឆ្នាំ២០២៣នេះ យុទ្ធនាការភ្នំពេញស្អាត បានផ្តោតលើសកម្មភាពធំៗចំនួន៤ គឺចិត្តខ្ញុំស្អាត ខ្មែរស្អាត ការងារខ្ញុំស្អាតខ្មែរស្អាត ខ្ញុំទំពាំងស្អាតខ្មែរស្អាត និងធុរកិច្ចយើងស្អាតខ្មែរស្អាត ស្ថិតក្រោមពាក្យស្លោក សីលធម៌យើងប្រពៃ ខ្មែរយើងថ្លាថ្លៃ ដោយផ្តោតសំខាន់លើការបញ្ជ្រាបសារអប់រំ ដើម្បីលើកតម្កើងវប្បធម៌ និងសីលធម៌សង្គម។

បើតាមការលើកឡើងរបស់ឯកឧត្តម ហ៊ុន ម៉ានី៖ «ឆ្នាំនេះ យើងបានធ្វើ១ជំហានទៀត។ កន្លងមកយើងគិតត្រឹមតែការគ្រប់គ្រងសំរាមទេ ប៉ុន្តែលើកនេះគឺយើងផ្សារភ្ជាប់លើសពីហ្នឹង។ ដែលក្នុងនោះដូចជាពាក្យយើងនិយាយចឹង គឺ ចិត្តខ្ញុំស្អាតខ្មែរស្អាត ការងារខ្ញុំស្អាតខ្មែរស្អាត ខ្ញុំទំពាំងស្អាតខ្មែរស្អាត និងធុរកិច្ចយើងស្អាតខ្មែរស្អាត គឺជាការផ្សារភ្ជាប់ទីមួយ គឺយើងត្រូវទទួលស្គាល់ថាយើងម្នាក់ៗ ជាផ្នែកមួយនៃកោសិកាសង្គមជាតិទាំងមូល ពោលគឺទង្វើរបស់យើង ផ្សារភ្ជាប់ទៅហ្នឹងសង្គមតែម្តង។»

ការបង្កើតយុទ្ធនាការភ្នំពេញស្អាត គឺពុំមែនជារឿងចៃដន្យ តែចលនានេះ កើតចេញពីបុព្វហេតុមួយ គឺការរួបរួមគ្នារវាងភាគីពាក់ព័ន្ធទាំងអស់ ដើម្បីកសាងភាពជាគំរូ ក្នុងការលើកកម្ពស់បរិស្ថានស្អាត តាមរយៈការទុកដាក់សំរាមឱ្យបានត្រឹមត្រូវ ការបណ្តុះផ្នត់គំនិតស្រឡាញ់ និងអនុវត្តភាពស្អាតឱ្យបានខ្ជាប់ខ្ជួន ក្នុងគោលដៅជំរុញអនាម័យស្អាត និងភាពស្រស់បំព្រងដល់សង្គម។

ចាប់តាំងពីឆ្នាំ២០១៧មក គម្រោងស្អាត ត្រូវបានបង្កើតឡើងក្នុងគោលបំណងបញ្ជ្រាបអំពីបញ្ហាប្រឈម និងខិតខំស្វែងរកដំណោះស្រាយរួមមួយស្តីពីការទុកដាក់សំរាមឱ្យបានត្រឹមត្រូវដល់សាធារណជន ដើម្បីចូលរួមបង្កើនសោភណ្ឌបរិស្ថាននៅកម្ពុជា។

ឯកឧត្តមបន្ថែមថា គម្រោងស្អាតបានក្លាយទៅជាយន្តការថ្មី សម្រាប់ការចូលរួមជាមួយរាជរដ្ឋាភិបាលដើម្បីស្វែងរកដំណោះស្រាយជូនសង្គមជាតិ ទាំងលើសោភណ្ឌភាព បរិស្ថាន ក៏ដូចជាការជំរុញលើកទឹកចិត្ត និងផ្តល់ភាពជាគំរូដល់ប្រជាពលរដ្ឋ ជាពិសេសយុវជនឱ្យចេះមានទំនួលខុសត្រូវលើការគ្រប់គ្រងសំរាម ដែលខ្លួនបានប្រើប្រាស់ ដោយបន្តការផ្សព្វផ្សាយដល់អ្នកដទៃបន្ថែមទៀត។ ជាពិសេសយុទ្ធនាការភ្នំពេញស្អាត២០២៣ បាននាំមកនូវបេសកកកម្មថ្មីបន្ថែមទៀតដល់យុវជន ទាំងការបញ្ជ្រាបសារអប់រំ ការលើកតម្កើងវប្បធម៌ និងសីលធម៌សង្គម។ សកម្មភាពទាំងនេះ បានផ្តល់ភាពវិជ្ជមានដោយផ្ទាល់ដល់អ្នកចូលរួម និងប្រយោលដល់សង្គមជាតិ៕