សាយ សៀរ៉ា ទម្លាយដើមហេតុម្ដាយចូលពេទ្យសង្គ្រោះបន្ទាន់ ឥឡូវធ្វើឲ្យលោកគិតគូរកាន់តែខ្លាំងរឿងហូបចុក

2023-12-15 09:46:34
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង និងជាពិធីករ សាយ សៀរ៉ា កំពុងបង្កើនការមើលថែម្ដាយ-ឪពុក ជាពិសេសលើការហូបចុកប្រចាំថ្ងៃ ក្រោយម្ដាយរបស់លោកបានពុលបន្លែ ឬអន្លក់សម្រាប់ហូបជាមួយបាញ់ឆែវ រហូតបញ្ជូនទៅសង្គ្រោះនៅមន្ទីរពេទ្យកាលពីពេលថ្មីៗនេះ។

តារាប្រុសវ័យជ្រេ ប៉ុន្ដែរូបសម្បត្ដិនៅតែសមសួនរូបនេះ ហាក់ជួបបញ្ហាច្រើននៅចុងឆ្នាំ២០២៣ ខណៈដែលទីផ្សារសិល្បៈរបស់លោកមិនសូវមាន។ តាមរយៈការសាកសួររបស់Sabay នៅរសៀលថ្ងៃទី១៥ ខែធ្នូ នេះ លោកបញ្ជាក់ថា បន្លែបាញ់ឆែវដែលគេដាក់លក់នៅលើទីផ្សារនោះ មានជាតិពុល បានធ្វើឲ្យម្ដាយលោកក្អួត រាក និងសន្លប់។ ក្រោយសង្គ្រោះ និងសម្រាកព្យាបាលនៅមន្ទីរពេទ្យជាច្រើនថ្ងៃ ម្ដាយរបស់លោកបានដឹងខ្លួន ហើយត្រឡប់មកផ្ទះវិញហើយ ប៉ុន្ដែស្ថានភាពសុខភាពមិនសូវប្រសើរដូចកាលពីគាត់មិនទាន់ពុលនោះទេ។

សាយ សៀរ៉ា៖ "ខ្ញុំលើកដៃសំពះសុំបងប្អូនអាជីវករយើងជួយមើលប្រភពបន្លែនាំចូលផង ហើយកុំបន្ថែមអីទៀតនាំឲ្យប៉ះពាល់សុខភាពអ្នកហូបគ្រប់គ្នា...ជាពិសេសដូចប៉ា និងម៉ែខ្ញុំចាស់ៗអីចឹងងាយរងគ្រោះណាស់។ ខ្ញុំកំពុងតែអត់លុយដើរខ្ចីគេ ហើយពេលសុខចិត្ដថាលក់ឡាន ឬលក់ស្អីក៏បានឲ្យតែបានប្រាក់មកសង្គ្រោះអ្នកមានគុណសិន"។

   ទន្ទឹមនឹងការតស៊ូ ពុះពាររករកប្រាក់ព្យាបាលម្ដាយ លោក សាយ សៀរ៉ា ក៏ត្រូវទទួលបន្ទុកចិញ្ចឹមក្មួយៗជាច្រើននាក់នៅភ្នំពេញ។ បច្ចុប្បន្នម្ដាយ និងប៉ារបស់លោកមិនទាន់ត្រឡប់ទៅស្រុកកំណើតនៅខេត្ដកំពង់ចាមវិញនៅឡើយទេ ដោយរស់នៅជុំគ្នាជាមួយក្មួយៗ ដើម្បីតាមដានជំងឺផង និងបាននៅជិតភ្នែកច្រមុះលោកផង ខណៈដែលលោកកំពុងស្វះស្វែងរកការងារសិល្បៈ ដើម្បីដោះស្រាយបញ្ហាហិរញ្ញវត្ថុគ្រួសារបណ្ដើៗ៕