រៀបចំធ្វើពិធីឡើងគេហដ្ឋានថ្មី តម្លៃខ្ទង់ម៉ឺនដុល្លាររួច ទើប សាយ សៀរ៉ា ទម្លាយថាឡើងដោយប្រថុចញ៉ុច

2024-04-10 06:31:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយប្រមូលថវិកាដែលបានសន្សំទុកជាយូរឆ្នាំពីអាជីពសិល្បៈ ព្រមទាំងបានលក់ដីខ្លះនៅភ្នំពេញ ដើម្បីសង់ផ្ទះវីឡាតូចល្មមមួយនៅឯស្រុកកំណើតក្នុងខេត្តកំពង់ចាម ដើម្បីបំពេញក្ដីប្រាថ្នាមួយរបស់អ្នកមានគុណទាំងពីររបស់ខ្លួន លោក សាយ សៀរ៉ា បានធ្វើពិធីឡើងគេហដ្ឋានថ្មីយ៉ាងប្រថុចញ៉ុចកាលពីថ្ងៃទី៦ ខែមេសា ឆ្នាំ២០២៤។

ធ្វើឡើងដោយប្រថុចញ៉ុច ក៏ដោយសារតែរូបលោកផ្ទាល់គ្រោងធ្វើនៅអំឡុងខែកុម្ភៈ ឆ្នាំ២០២៤ ប៉ុន្ដែប៉ាលោកប្រាប់ថាវេលាមិនសូវល្អ ក៏ត្រូវពន្យារពេលដោយមិនកំណត់ថ្ងៃ។ ស្រាប់តែនៅដើមខែមេសា ឆ្នាំ២០២៤ នេះ ក៏ស្រាប់តែប៉ារបស់លោកទៅដេញវេលាម្ដងទៀត ក៏ឃើញថាមានវេលាល្អនៅដើមខែមេសា មុនចូលឆ្នាំថ្មី ប្រពៃណីជាតិខ្មែរឆ្នាំនេះ ក៏លោកត្រូវគិតគូអញ្ជើញភ្ញៀវ និងរៀបចំពិធីភ្លាមៗតែម្ដង។

បើតាមតារាសម្ដែង និងជាពិធីករចាស់វស្សារូបនេះ បើទោះបីធ្វើឡើងដោយប្រថុចញ៉ុច និងនៅឆ្ងាយពីរាជធានីភ្នំពេញ ក៏ប៉ុន្ដែសាច់ញាតិ និងមិត្រភក្ដិក៏មិនបានចោលពិធីឡើងគេហដ្ឋានរបស់លោកដែរ។ ដោយមានភ្ញៀវច្រើនពេកនៅអំឡុងពេលល្ងាច គឺជាពេលពិសារភោជនីយអាហារនោះ រូបលោកផ្ទាល់ក៏មិនបានទទួលរាក់ទាក់ដល់ភ្ញៀវគ្រប់គ្នា និងបាននៅជជែកលេងយូរដែរ។ ទើបក្រោយបញ្ចប់កម្មវិធីភ្លាមៗរូបលោក និងគ្រួសារបានចេញវីដេអូមួយសូមថ្លែងអំណរគុណដល់ភ្ញៀវដែលបានផ្ដល់កិត្ដិយសទាំងអស់ ហើយក៏សូមអភ័យទោសចំពោះភ្ញៀវ ឬមិត្ដភក្ដិដែលមិនសូវទទួលបានរាក់ទាក់នៅថ្ងៃនោះ។

សូមរំលឹកថា លោក សាយ សៀរ៉ា បានធ្វើពិធីឡើងគេហដ្ឋានថ្មី នៅភូមិស្វាយក្រោម ឃុំស្វាយសាច់ភ្នំ ស្រុកស្រីសន្ធរ ខេត្ដកំពង់ចាម ដែលមានចម្ងាយផ្លូវជិត ១០០គីឡូម៉ែត្រពីរាជធានីភ្នំពេញ។ ប៉ុន្ដែនៅក្នុងថ្ងៃរៀបចំពិធីនោះគេឃើញមិត្ដសិល្បៈ ព្រមទាំងមន្ដ្រីរាជការមួយចំនួនបានអញ្ជើញចូលរួមយ៉ាងច្រើនកុះករ។ សម្រាប់ក្នុងរង្វង់សិល្បៈវិញ គេឃើញវត្ដមានដូចជា៖ អ្នកស្រី ចន ច័ន្ទលក្ខិណា លោក ញ៉ែម សំអូន និងភរិយា លោក ញ៉ែម សុគន្ធ លោក ជា សុវណ្ណនរាហ៍ និងលោក ភុល សុវណ្ណដានីន ជាដើម៕