កីឡាករក្រសួងមហាផ្ទៃ៣រូបចូលជំរុំហ្វឹកហាត់ជម្រើសជាតិ U20 និងជម្រើសជាតិឈុតធំ

2024-05-04 05:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករវ័យក្មេងមានទេព្យកោសល្យនៃសមាគមបាល់ទះក្រសួងមហាផ្ទៃ៣រូបត្រូវបានសហព័ន្ធកីឡាបាល់ទះកម្ពុជា កោះហៅឲ្យចូលក្រុមបាល់ទះជម្រើសជាតិអាយុក្រោម២០ឆ្នាំ និងជម្រើសជាតិឈុតធំកាលពីពេលថ្មីៗ។

កីឡាករវ័យក្មេងទាំង៣រូបនោះមានដូចជាកីឡាករជំនាញប៉ះសេ កែវ ស្រេងលីហួរ កីឡាករស្មាត់ស្ដាំ ឆោម ទីណា និងកីឡាករដេញបាល់លឿន មុត រ៉ាណាត់។

កីឡាករទាំងបីរូបនេះសុទ្ធតែជាធនធានបាល់ទះល្អៗមានសមត្ថភាព និងមានភាពឈ្លាសវ័យ ហើយពួកគេទៀតសោតជាកីឡាករលេងទាំងឈុតធំនិងឈុតយុវជននៅសមាគមបាល់ទះក្រសួងមហាផ្ទៃ។

អ្នកប៉ះសេ កែវ ស្រេងលីហួរ លើកពានសម្ដេចក្រឡា ហោម សខេង ឆ្នាំ២០២៣

បើផ្អែកតាមប្រភពដ៏ទុកចិត្តមួយដែលស្និតនឹងសហព័ន្ធកីឡាបាល់ទះកម្ពុជា កែវ ស្រេងលីហួរ និង ឆោម ទីណា ត្រូវហ្វឹកហាត់ជាមួយក្រុមបាល់ទះជម្រើសជាតិកម្ពុជាអាយុក្រោម២០ឆ្នាំ ហើយ កែវ ស្រេងលីហួរ និង មុត រ៉ាណាត់ ត្រូវហ្វឹកហាត់ជាមួយក្រុមធំ។ ត្រង់ចំណុចនេះ លីហួរ ដែលជាអ្នកប៉ះសេវ័យក្មេងនិងទទួលបានការកោតសរសើរពីមហាជន ត្រូវបានសហព័ន្ធកីឡាបាល់ទះកម្ពុជាផ្ដល់ទំនុកចិត្តឱ្យចូលរួមទាំងឈុតតូចនិងឈុតធំ។

ស្មាត់ស្ដាំ ឆោម ទីណា លើកពានកីឡាជាតិឆ្នាំ២០២៣

នេះជាឱកាសល្អបំផុតដែលយុវជនទាំងបីខាងលើ ដើម្បីកសាងស្នាដៃជាមួយក្រុមបាល់ទះជម្រើសជាតិកម្ពុជាក្នុងព្រឹត្តិការណ៍ជាតិនិងអន្តរជាតិនានានាពេលខាងមុខ។ កែវ ស្រេងលីហួរ, ឆោម ទីណា និង មុត រ៉ាណាត់ ត្រូវខិតខំឲ្យបានខ្លាំងក្លាដើម្បីបានកៅអី១៤នាក់ចុងក្រោយ ដូចលោកបណ្ឌិត អាំង សិរីពិសិដ្ឋ អនុប្រធាននិងជាអគ្គលេខាធិការសហព័ន្ធកីឡាបាល់ទះកម្ពុជាបានលើកឡើងអ៊ីចឹង ការកោះហៅឲ្យចូលរួមហ្វឹកហាត់នេះមិនមែនប្រាកដថាជាប់ឡើយ ព្រោះកៅអីជម្រើសជាតិជាកន្លែងក្ដៅ អ្នកមានសមត្ថភាពទើបអង្គុយបាន ដូច្នេះពួកគេត្រូវប្រឹងប្រែងឲ្យអស់ពីកម្លាយកាយចិត្ត ដើម្បីទទួលបានសិទ្ធិក្នុងនាមជាកីឡាករបាល់ទះជម្រើសជាតិកម្ពុជាពិតប្រាកដ។

កីឡាករដេញបាល់លឿន មុត រ៉ាណាត់ លើកពានសម្ដេចក្រឡា ហោម សខេង ឆ្នាំ២០២៣

កាលពីពេលថ្មីៗនេះសហព័ន្ធកីឡាបាល់ទះកម្ពុជា បានកោះហៅយុវជនមកពីក្លឹបបីផ្សេងគ្នាដូចជាសមាគមបាល់ទះវិសាខា ក្លឹបបាល់ទះស្នងការរដ្ឋាននគរបាលរាជធានីភ្នំពេញ និងសមាគមបាល់ទះក្រសួងមហាផ្ទៃមកធ្វើតេស្ត ប៉ុន្តែមកទល់នឹងពេលនេះ សហព័ន្ធមិនទាន់បង្ហាញឱ្យដឹងពីសមាសភាពយុវជន U20 កម្ពុជាថាកីឡាករណាខ្លះជាប់នៅឡើយទេ។

គួរបញ្ជាក់ថានាថ្ងៃទី ២៤ ខែមិថុនា ឆ្នាំ២០២៤ ខាងមុខក្រុមជម្រើសជាតិបាល់ទះកម្ពុជាអាយុក្រោយ២០ឆ្នាំនឹងហោះទៅប្រទេសថៃ ដើម្បីប្រកួតជម្រុះជាមួយ U20 វៀតណាម ក្នុងពានរង្វាន់បាល់ទះជើងឯកអាស៊ី Asian Men's U20 Volleyball Championship។ ក្រុមណាឈ្នះនឹងទៅលេងវគ្គផ្ដាច់ព្រ័ត្រនៅប្រទេសឥណ្ឌូណេស៊ី នៅថ្ងៃទី២៣ ខែកក្តដា ឆ្នាំ២០២៤៕

អត្ថបទ៖ Um Sopheak