៥ឆ្នាំមុន! សម្តេចតេជោ និយាយថា ឯកឧត្តម គួច ចំរើន ជាមនុស្សខ្លាំង អាចគ្រប់គ្រងខេត្តព្រះសីហនុបាន ហើយពេលនេះតែងតាំងជាអភិបាលខេត្តកណ្តាល

2024-06-25 03:03:22
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពី៥ឆ្នាំមុន ឯកឧត្តម គួច ចំរើន ត្រូវបានតែងតាំងជាអភិបាលខេត្តព្រះសីហនុ ក្នុងខណៈដែលពេលនោះ ខេត្តមាត់សមុទ្រមួយនេះ មានឧបទ្ទវហេតុបាក់រលំអគារបណ្តាលឱ្យមានអ្នកស្លាប់ និងរបួសជាច្រើននាក់។

ក្នុងអំឡុងពេលដឹកនាំប្រតិបត្តិការសង្គ្រោះជនរងគ្រោះក្នុងឧបទ្ទវហេតុនេះកាលពីយប់ថ្ងៃទី២៤ ខែមិថុនា ឆ្នាំ២០១៩ សម្តេចតេជោ ហ៊ុន សែន បានថ្លែងទៅកាន់អ្នកកាសែត បញ្ជាក់មូលហេតុដែលតែងតាំងឯកឧត្តម គួច ចំរើន ជាអភិបាលខេត្តព្រះសីហនុថា គឺដោយសារតែឯកឧត្តម គួច ចំរើន ជាអ្នកខ្លាំង មានបទពិសោធន៍ ក្នុងការគ្រប់គ្រងទាំងកាលនៅរាជធានីភ្នំពេញ និងខេត្តកំពង់ចាម។

សូមជម្រាបថា ឯកឧត្តម គួច ចំរើន ត្រូវបានមហាក្សត្រ ផ្ទេរ និងតែងតាំងមុខតំណែង ពីអភិបាលខេត្តព្រះសីហនុ មកជាអភិបាលខេត្តកណ្តាល។ នេះបើតាមព្រះរាជក្រឹត្យ កាលពីថ្ងៃទី២៤ ខែមិថុនា ឆ្នាំ២០២៤។

គួររំលឹកថា ឯកឧត្តម គួច ចំរើន បានកាន់តំណែងជាច្រើនរួមមាន៖ អភិបាលរងខណ្ឌចំការមន (១៩៩៩-២០០៤) , អភិបាលខណ្ឌមានជ័យ(២០០៤-២០១៤), អភិបាលខណ្ឌដូនពេញ (២០១៤-២០១៦), អគ្គនាយករងរដ្ឋបាលក្រសួងមហាផ្ទៃ (២០១៦-២០១៧), អភិបាលខេត្តកំពង់ចាម (ខែមិថុនា ឆ្នាំ២០១៧-ខែមិថុនា ២០១៩) និងអភិបាលខេត្តព្រះសីហនុ (ខែមិថុនា ឆ្នាំ២០១៩-ខែមិថុនា ឆ្នាំ២០២៤)។

ឯកឧត្តម គួច ចំរើន កើតនៅថ្ងៃទី៤ ខែវិច្ឆិកា ឆ្នាំ១៩៧២ នៅភូមិតាពរ័លើ ឃុំពង្រក្រោម ស្រុកជីក្រែង ខេត្តសៀមរាប។

ក្រោយថ្ងៃរំដោះថ្ងៃ៧មករាឆ្នាំ១៩៧៩ ឯកឧត្តមដែលស្ថិតនៅក្នុងវយ័កុមារនៅឡើយបានចូលរៀនថ្នាក់ដំបូងក្រោមផ្ទះមួយនៅក្នុងភូមិត្រាចថ្មី ឃុំកំពង់ក្តី ស្រុកជីក្រែង ខេត្តសៀមរាប ចូលដល់ថ្នាក់ទី២ បានទៅរៀននៅសាលាគំរូកំពង់ក្តីបន្ទាប់មកបានបន្តការសិក្សារហូតដល់ចប់ចំណេះដឹងទូទៅនៅសាលា១០មករាសៀមរាបនៅថ្ងៃទី១៨ខែមិថុនាឆ្នាំ១៩៨៩។

នៅឆ្នាំ១៩៩០ ឯកឧត្តមបានចូលរៀននៅមហាវិទ្យាល័យបច្ចេកទេសកងទ័ពប្រទេសវៀតណាម ក្រោយមកនៅថ្ងៃ២៨ខែមីនាឆ្នាំ១៩៩៣ បានសិក្សាបន្តនៅមហាវិទ្យាលយ័និតិសាស្ត្រ និងវិទ្យាសាស្ត្រសេដ្ឋកិច្ច ដែលបញ្ចប់នៅថ្ងៃទី២២ខែកក្កដាឆ្នាំ១៩៩៧ ដោយទទួលបានបរិញ្ញាប័ត្រវិទ្យាសាស្ត្រសេដ្ឋកិច្ច ។ នៅថ្ងៃទី០១ខែតុលាឆ្នាំ២០០៤ បានចូលសិក្សានៅសាកលវិទ្យាលយ័និតិសាស្ត្រនិងវិទ្យាសាស្ត្រសេដ្ឋកិច្ចទទួលបានបរិញ្ញាបត្រ័ជាន់ខ្ពស់រដ្ឋបាលសាធារណៈនៅថ្ងៃទី០១ខែសីហាឆ្នាំ២០០៧។

ឯកឧត្តម គួច ចំរើន អាចប្រើប្រាស់បាននូវភាសាអង់គ្លេសនិងវៀតណាម។ ក្រៅពីការសិក្សានៅតាមមហាវិទ្យាល័យ និងសាកលវិទ្យាល័យ ឯកឧត្តមក៏បានទទួលការបណ្តុះបណ្តាលនិងវគ្គសិក្សាខ្លីៗ កម្រិតវិញ្ញាបនប័ត្រ ពីអង្គការJICAលើការគ្រប់គ្រងរដ្ឋបាលមូលដ្ឋាននៅប្រទេសជប៉ុន ឆ្នាំ២០០០ ពីក្រសួងរៀបចំដែនដីនគរូបនីយកម្ម និងសំណង់លើផ្នែកច្បាប់ភូមិបាល ,ពីវិទ្យាស្ថានខ្មែរសម្រាប់សហប្រតិបត្តិការនិងសន្តិភាពលើផ្នែកហ្វឹកហ្វឺនទំនាក់ទំនងអន្តរជាតិ ពីវិទ្យាស្ថានកម្ពុជាដើម្បីសិទ្ធិមនុស្សលើការងាររដ្ឋបាលសម្រាប់មន្ត្រីខេត្តក្រុង ពី UNIVERSITY OF SANFRANCISCO លើច្បាប់បោះឆ្នោត,ពីវិទ្យាស្ថានកម្ពុជាដើម្បីសិទ្ធិមនុស្សលើផ្នែកអភិបាលកិច្ចល្អ និងទទួលបានវិញ្ញាបនបត្រ័ពីសាលាក្រុងភ្នំពេញលើការងាររដ្ឋបាល៕

អត្ថបទ៖ សំភី