កាលពីខែមករា ឆ្នាំ២០២៣ ប្រទេសមួយនៅទ្វីបអាហ្វ្រិកគឺ អេត្យូពី បាន​ធ្វើការ​សម្រេចចិត្ត​ដ៏គួរឱ្យភ្ញាក់ផ្អើលបំផុត​ពោលគឺ​បាន​ក្លាយជាប្រទេសទីមួយ​ក្នុងពិភពលោក​ដែល​ហាមឃាត់​ការនាំចូល​រថយន្តចំហេះក្នុង សាំង-ម៉ាស៊ូត ដោយជំរុញការប្រើប្រាស់​រថយន្តអគ្គិសនី។

បច្ចុប្បន្ន​ប្រទេសអេត្យូពី មាន​រថយន្តអគ្គិសនី​រត់លើដងផ្លូវប្រមាណ ១០ម៉ឺនគ្រឿង ហើយរដ្ឋាភិបាល​បាន​ប៉ាន់ស្មានថា ចំនួននេះ​នឹងកើនឡើង ៤ដង នៅត្រឹម​ឆ្នាំ២០៣២។

ការសម្រេចចិត្តផ្អាក​នាំចូលរថយន្តចំហេះក្នុងរបស់អេត្យូពី ដោយសារកត្តាធំបំផុតគឺ​ភាពខ្វះខាត និងការឡើងថ្លៃប្រេងឥន្ធនៈ។ ចំណែកការប្រើប្រាស់​រថយន្តអគ្គិសនី គឺ​ភាគច្រើន​ប្រមាណ ៩៦% ហើយដែលប្រើថាមពលមកពី​ទំនប់វារីអគ្គិសនី ដែលជួយកាត់បន្ថយការចំណាយផង និងល្អចំពោះបរិស្ថាន​ផង។ ជាមួយ​គ្នានេះ រដ្ឋាភិបាល​អេត្យូពី​ ក៏បានលើកទឹកចិត្តផ្នែកពន្ធជាច្រើនសម្រាប់​ EV ផងដែរ។

កាលពីខែមិថុនាកន្លងទៅ អេត្យូពី បានបើកការដ្ឋានសាងសង់​រោងចក្រ​រថយន្តអគ្គិសនីធំបំផុតរបស់ខ្លួន ដោយចំណាយទុនវិនិយោគ ៥២លានដុល្លារ។ រោងចក្រនេះ រំពឹងថា នឹង​អាចដំឡើង​រថយន្តប្រមាណ ១ពាន់គ្រឿងក្នុង១ឆ្នាំ។

យ៉ាងណាមិញ ក្នុងរយៈពេលជាង១ឆ្នាំនេះ ក្រោយបិទនាំចូលរថយន្តចំហេះក្នុង ការជំរុញ​ប្រើប្រាស់រថយន្តអគ្គិសនីនៅអេត្យូពី បាន​បន្ត​ជួបឧបសគ្គជាច្រើន។ EV មានតម្លៃថ្លៃជាងរថយន្តចំហេះក្នុង ដែលប្រជាជនជាច្រើន គ្មានលទ្ធភាពទិញ។ បន្ថែមលើសនេះ គឺកង្វះខាតហេដ្ឋារចនាសម្ព័ន្ធពោលគឺ​ស្ថានីយសាកអាគុយ EV ដោយ​មាន​ចំនួនតែ ៥០កន្លែងប៉ុណ្ណោះ ខណៈដែល​ច្បាប់ពាក់ព័ន្ធនឹងរថយន្តអគ្គិសនី ក៏មិនទាន់តាក់តែងឡើង​គ្រប់គ្រាន់ដើម្បីឆ្លើយតបបញ្ហា​ដែលមានឡើងឡើយ ដែលបង្កើតភាពមិនច្បាស់លាស់សម្រាប់​អ្នកវិនិយោគ។

អ្នកជំនាញយល់ឃើញថា ការផ្លាស់ប្តូររបត់ដ៏លឿនរហ័សចេញពីរថយន្តចំហេះក្នុង ទៅរថយន្តអគ្គិសនី មិនទាន់ឆ្លើយតបនឹងស្ថានភាពហេដ្ឋារចនាសម្ព័ន្ធនាពេលបច្ចប្បន្ននេះទេ។ កង្វះខាតគ្រឿងបន្លាស់រថយន្តអគ្គិសនីដែលមានតម្លៃ​ ក៏ជាករណីធំមួយផងដែរ។

ប្រភពថាមពលចម្បងរបស់អេត្យូពី ដែលទទួលបាន​ពីវារីអគ្គិសនី កាន់តែជួបផលវិបាក ខណៈប្រទេសមួយនេះ នៅមិនទាន់​មានភ្លើងប្រើប្រាស់គ្រប់គ្រាន់នៅឡើយផង តែបែរជាត្រូវបង្កើនបន្ទុក​សម្រាប់​សាករថយន្តអគ្គិសនីទៀត។

គុណវិបត្តិទាំងប៉ុន្មានចំណុចខាងលើនេះ បាន​ធ្វើឱ្យប្រជាជនអេត្យូពី​ដែល​ទិញរថយន្តអគ្គិសនី​តាមរយៈការលើកចិត្តរបស់រដ្ឋាភិបាលនោះ កំពុងស្វែងរកការលក់រថយន្តប្រភេទនេះចេញវិញ និងងាកទៅរកការប្រើរថយន្ត Hybrid ជាដើម៕

អត្ថបទ៖ សំភី