ម្ចាស់ផ្ទះកម្ពុជា ឈរលេខ ២ នៃការប្រកួតកីឡាហែលទឹកពាក់ជើងទាជើងឯកអាស៊ីអាគ្នេយ៍គិតត្រឹមថ្ងៃទី៣ វិច្ឆិកា ២០២៤

2024-11-04 02:30:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតកីឡាហែលទឹកពាក់ជើងទា អាស៊ីអាគ្នេយ៍ លើកទី១ ដែលកម្ពុជាធ្វើជាម្ចាស់ផ្ទះបានដំណើរការអស់រយៈពេល ២ ថ្ងៃមកហើយក្នុងនោះម្ចាស់ផ្ទះឈរចំណាត់ថ្នាក់លេខ ២ បន្ទាប់ពីឈ្នះមេដាយមាស ២គ្រឿង។

លោក ហែម គីរី អគ្គលេខាធិការសហព័ន្ធខ្មែរកីឡាហែលទឹកបានឲ្យដឹងក្នុងពិធីបើកការប្រកួតថ្មីៗនេះថា ប្រទេសដែលចូលរួមសរុបទាំងអស់មាន ៧ គឺម្ចាស់ផ្ទះកម្ពុជា វៀតណាម ថៃ សិង្ហបុរី ម៉ាឡេស៊ី ឥណ្ឌូណេស៊ី និងហ្វីលីពីន និងសរុបកីឡាករ កីឡាការិនីទាំងអស់មាន ៦២នាក់។

អ្នកជំនាញផ្នែកកីឡាហែលទឹកខាងលើបន្ថែមទៀតថា មុនឈានដល់ការរៀបចំការប្រកួតនេះឡើងដោយសារតែបណ្ដាប្រទេសសមាជិកមើលឃើញពីភាពរីកចម្រើនរបស់កម្ពុជា និងមានទំនុកចិត្តខ្ពស់ក្រោយទទួលបានជោគជ័យក្នុងការទទួលរៀបចំនៅព្រឹត្តិការណ៍ធំៗដូចជាស៊ីហ្គេមជាដើម។

ងាកមកចាប់អារម្មណ៍ការប្រកួតរយៈពេល ២ថ្ងៃមកនេះប្រទេសឈរលេខ១ បានលើវៀតណាម បន្ទាប់ពីឈ្នះមេដាយមាស ៩ ប្រាក់ ៩ សំរឹទ្ធ ២ សរុប ២០គ្រឿង។ ចំណែកលេខ២ គឺកម្ពុជា បន្ទាប់ពីឈ្នះមេដាយមាស ២ ប្រាក់ ២ សំរឹទ្ធ ៣ សរុប ៧គ្រឿង។ លេខ៣ គឺឥណ្ឌូណេស៊ី មាស ១ ប្រាក់ ១ សំរឺទ្ធ ១ សរុប ៣គ្រឿង។

រំលឹកដែរថា ការប្រកួតកីឡាហែលទឹកពាក់ជើងទា អាស៊ីអាគ្នេយ៍ លើកទី១ នេះគឺធ្វើឡើងនៅកម្ពុជា ដោយមាន ៧ប្រទេសមកចូលរួម។ ការប្រកួតនេះធ្វើឡើងចាប់តាំងពីថ្ងៃទី១ ដល់ ៥ ខែវិច្ឆិកា ឆ្នាំ២០២៤ ដោយប្រើប្រាស់អាងហែលទឹកនៃពហុកីឡដ្ឋានជាតិ៕

អត្ថបទ៖ នួន ស៊ីណា