តារាសម្ដែង លី គឹមសាន ហៅប្រុសខួច បានប្ដូររូបភាព Profile facebook របស់ខ្លួនពីរូបថតមួយសន្លឹកដែលមានទេសភាពធម្មតា មកដាក់រូប Banner ក្នុងខ្សែភាពយន្ដដែលមានចំណងជើងដ៏ចម្លែកមួយរបស់ផលិតកម្ម អិល ឌី គឺរឿង “ប៉ាឆាបូជាព្រាយ”។

តាមរយៈការចូលរួមសម្ពោធខ្សែភាពយន្ដនេះកាលពីយប់ថ្ងៃទី២៦ ខែវិច្ឆិកា ឆ្នាំ២០២៤ រូបថតរបស់លោក និងតារាល្បីៗមួយចំនួនទៀត ត្រូវបានគេរំលេចឡើងយ៉ាងធំនៅលើSCREEN ក្នុងរោងភាពយន្ដ LEGEND នាផ្សារទំនើបជីបម៉ុង ២៧១។ ប្រុសខួ ក៏ដូចជាតារាល្បីៗផ្សេងទៀតដែលជាតួអង្គសំខាន់ក្នុងខ្សែភាពយន្ដ ភាគច្រើនបានបង្ហាញវត្ដមាននៅថ្ងៃសម្ពោធ ហើយបានបង្ហាញអារម្មណ៍សប្បាយរីករាយ ដោយបង្ហាញរូបភាព Banner រឿង”ប៉ាឆាបូជាព្រាយ”នៅលើបណ្ដាញសង្គមរបស់ខ្លួនគ្រប់គ្នា។

បើតាមផលិតកម្ម អិល ឌី ខ្សែភាពយន្ដរឿង “ប៉ាឆាបូជាព្រាយ” នឹងចាប់ផ្ដើមចាក់បញ្ចាំងពីថ្ងៃទី២៨ ខែវិច្ឆិកា ឆ្នាំ២០២៤ តទៅក្រោយពីបានសម្ពោធចាក់បញ្ចាំងជាផ្លូវការកាលពីយប់មិញ។ ក្រោមវត្ដមានពីផលិតករ ចាងហ្វាងផលិតកម្ម និងតារាសម្ដែងល្បីៗ ខ្សែភាពយន្ដបែបជំនឿអរូបប្បិយ ព្រឺព្រួចមួយនេះ ក៏ត្រូវបានគេរំពឹងថានឹងទទួលបានការគាំទ្រច្រើនមិនចាញ់ខ្សែភាពយន្ដមុនៗដែលនិពន្ធ និងដឹកនាំសម្ដែងដោយផលិតករល្បីៗរបស់ផលិតកម្ម អិល ឌី ឡើយ៕

អត្ថបទ៖ Chin Sopheak