ប្រយ័ត្ន! លេងហ្គេមទូរសព្ទច្រើនម៉ោងអត់សម្រាក ភ្នែកនារីម្នាក់ប្រែជាខ្វាក់

2024-12-05 09:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

នារីវ័យក្មេងជនជាតិចិនម្នាក់ ប្រែជាខ្វាក់ភ្នែកមើលលែងឃើញ បន្ទាប់ពីចំណាយពេលលេងហ្គេមតាមទូរសព្ទដៃជាច្រើនម៉ោងដោយមិនបានសម្រាកគ្រប់គ្រាន់។

នារីរងគ្រោះមានឈ្មោះ Xiao Wu អាយុ ២១ឆ្នាំ រស់នៅទីក្រុង Dongguan ខេត្តក្វាងទុង ប្រទេសចិន បានចំណាយពេលមួយថ្ងៃពេញនៅផ្ទះអំឡុងពេលទិវាដើរលម្ហែកាយ Golden Week Holiday។ នាងមិនបានចេញដើរកម្សាន្តដូចប្រជាជនភាគច្រើនទេ នាងបែរជាយកពេលមកគេងផ្ទះលេងហ្គេមទូរសព្ទដៃទៅវិញ។

តាមប្រភព នារីវ័យក្មេងរូបនេះ បានលេងហ្គេមរត់ម៉ារ៉ាតុង King of Glory ស្ទើរតែពេញមួយថ្ងៃដោយមិនសម្រាកហូបចុកគ្រប់គ្រាន់។ នៅថ្ងៃទី ១ តុលា កញ្ញា Wu បានកត់សម្គាល់ឃើញថា ភ្នែកខាងស្ដាំរបស់នាងមិនអាចមើលឃើញច្បាស់ដូចសព្វដងទេ។

នាងគិតថា ប្រហែលគ្រាន់តែភ្នែកមិនបានសម្រាកប៉ុណ្ណោះ ដូច្នោះនាងសម្រេចទៅគេងសិន។ ទោះយ៉ាងណា ពេលក្រោកពីគេងវិញ ភ្នែកស្ដាំរបស់នាងមិនអាចវិលត្រលប់មកវិញបានទេ។ ឪពុកម្ដាយរបស់នាងមានការភិតភ័យយ៉ាងខ្លាំង រួចក៏ប្រញាប់បញ្ជូននាងនៅកាន់មន្ទីរពេទ្យភ្នែក Donggiang Huaxia Eye Hospital។

ក្រោយពិនិត្យរួចរាល់ គ្រូពេទ្យអះអាងថា កែវភ្នែកមិនអាចមើលឃើញទៀតទេ ឬ Retinal Artery Occlusion។ អាការៈនេះតែងតែកើតឡើងចំពោះមនុស្សចាស់ ប៉ុន្តែករណីរបស់កញ្ញា Wu មកពីភ្នែករបស់នាងហត់នឿយខ្លាំងពេកដោយសារប្រឹងសម្លឹងទៅមើលអេក្រង់ស្មាតហ្វូនដ៏តូចមួយ។

បើយោងទៅតាមប្រភពវេបសាយ Buzzflare នាង Wu តែងតែលេងទូរសព្ទចំនួន ៧ ឬ ៨ម៉ោងជាប់ៗគ្នាដោយមិនសម្រាកសូម្បីបន្តិច។ លើសពីនេះ នាងមានការងារខាងហិរញ្ញវត្ថុ (Finance) ដែលកាន់តែបន្ថែមសម្ពាធលើភ្នែករបស់នាងមួយកម្រិតទៀត។

នៅថ្ងៃឈប់សម្រាក នាងក្រោកនៅម៉ោង ៦ព្រឹក ស្រស់ស្រូបអាហារពេលព្រឹក រួចចាប់ផ្ដើមលេងហ្គេមរហូតដល់ម៉ោង ៤ទៀបភ្លឺតែម្ដង។ ពេលនេះនាងកំពុងសម្រាកនៅមន្ទីរពេទ្យ ក្រុមវេជ្ជបណ្ឌិតកំពុងព្យាយាមធ្វើយ៉ាងណាស្ដារកែវភ្នែកនាងមកវិញ៕