អង្គការ PSE ធ្វើពិធី «បុណ្យផ្កាអប់រំ» រៃអង្គាសថវិកាជួយដល់ការហូបចុក និងរៀនសូត្ររបស់កុមារក្រីក្រ

2024-12-13 05:00:37
ចំនួនមតិ 0 | ចំនួនចែករំលែក 0

ចន្លោះមិនឃើញ

អង្គការដើម្បីភាពញញឹមនៃកុមារ ឬគេស្គាល់ថា PSE នៅរសៀលថ្ងៃទី១១ ខែធ្នូ ឆ្នាំ២០២៤ បានធ្វើពិធី «បុណ្យផ្កាអប់រំ» នៅក្នុងបរិវេណសាលាឯសង្កាត់ស្ទឹងមានជ័យ ដើម្បីរៃអង្គាសថវិកាជួយដល់ការហូបចុក និងការសិក្សារៀនសូត្ររបស់កុមារក្រីក្រ ៦៥០០នាក់ដែលកំពុងសិក្សា។

ទិដ្ឋភាពពិធីបុណ្យ

«បុណ្យផ្កាអប់រំ» នេះក្រោមការផ្ដួចផ្ដើមដោយអង្គការដើម្បីភាពញញឹម នៃកុមារ និងសហព័ន្ធសេវាអប់រំនៅកម្ពុជាជាមួយ និងអធិបតីភាពឯកឧត្ដម ហង់ជូន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ឯកឧត្ដម ពេជ សោភ័ន ទេសរដ្ឋមន្ត្រីទទួលបន្ទុកបេសកកម្មពិសេស និងឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ។

ទិដ្ឋភាពពិធីបុណ្យ

ឯកឧត្ដម ហង់ជូន ណារ៉ុន មានប្រសាសន៍ថា ក្នុងនាមឯកឧត្ដមផ្ទាល់ និងតំណាងក្រសួងអប់រំ យុវជន និងកីឡា ពិតជាមានសេចក្ដីសប្បាយរីករាយដែលបានចូលរួមពិធី «បុណ្យផ្កាអប់រំ» របស់អង្គការ PSE ។ កម្មវិធីបុណ្យនេះប្រារព្ធឡើងដើម្បីរៃអង្គាស់ថវិកាពីគ្រប់ទិសទីសម្រាប់ទ្រទ្រង់បេសកកម្មកសាងកុមារកម្ពុជាឲ្យមានអនាគតភ្លឺថ្លា មានស្នាមញញឹម និងមានក្ដីសង្ឃឹមសម្រាប់ជីវិតនៅពេលអនាគត។

ទិដ្ឋភាពពិធីបុណ្យ

ជាមួយគ្នានោះដែរឯកឧត្ដមសូមថ្លែងអំណរគុណចំពោះប្រធានអង្គការ PSE បុគ្គលិក លោកគ្រូ អ្នកគ្រូ និងថ្នាក់ដឹកនាំទាំងអស់ដែលបានចំណាយពេលជិត៣០ឆ្នាំមកហើយក្នុងការជួយបណ្ដុះបណ្ដាលដល់កុមារក្រីក្រ និងមិនមានលទ្ធភាពអភិវឌ្ឍន៍ខ្លួនឲ្យប្រែក្លាយជាយុវជនដែលមានសមត្ថភាព និងអាចជួយខ្លួនឯងបាន។

ទិដ្ឋភាពពិធីបុណ្យ

បញ្ជាក់ដែរថា «បុណ្យផ្កាអប់រំ» នេះប្រារព្ធឡើងកាលនៅរសៀលថ្ងៃទី១១ ខែធ្នូ ឆ្នាំ២០២៤ ដោយមានគ្រឹះស្ថានអប់រំ និងស្ថាប័នឯកជនចំនួន ៧៥ស្ថាប័ន បានចូលរួមជាសហអ្នកដើមផ្កា៕