ចាប់តាំងពីMV បទ “កុលាបមានបន្លា” បកស្រាយដោយតារាចម្រៀង ព្រាប សុវត្ថិ ចេញជាផ្លូវការ ហើយទទួលបានការគាំទ្រច្រើនតាំងពីថ្ងៃទី១៩ ខែធ្នូ ឆ្នាំ២០២៤ បទនេះក៏មានអ្នកយកទៅត្រាប់តាមកាន់តែច្រើនលើបណ្ដាញសង្គម ជាពិសេសបណ្ដាញសង្គម Tiktok។

កាន់តែអស្ចារ្យ នៅថ្ងៃនេះ ព្រាប សុវត្ថិ និងកូនៗ ២នាក់ បានលេងស្ដាយប្លែកៗ អមដោយបទចម្រៀងដែលកំពុងល្បីខ្លាំងនេះ នៅមុខទូរស័ព្ទ ហើយផុសនៅលើបណ្ដាញសង្គមផ្ទាល់ខ្លួនទទួលបានការគាំទ្រកាន់តែខ្លាំង។ កាន់កន្ដ្រកផ្កាកុលា ២កន្ដ្រក រាំអមពុតពេនដោយកូនប្រុសទាំងពីរនាក់ តារាចម្រៀងជើងចាស់ ត្រូវបានអ្នកគាំទ្រធ្លោយមាត់ថា “IDOL ព្រាប សុវត្ថិ ខ្ញុំមកវិញហើយ”។

“IDOL ព្រាប សុវត្ថិ របស់ខ្ញុំត្រឡប់មកវិញហើយ” គឺអ្នកគាំទ្រចង់សំដៅដល់ការស្ងៀមស្ងាត់ គិតរឿងមុខរបររកស៊ី ច្រើនជាងការចេញបទចម្រៀងថ្មីៗ និងការបង្ហាញមុខជាសាធារណៈក្នុងព្រឹត្ដិការណ៍ប្រគុំតន្ដ្រីផ្សេងៗ។ ប៉ុន្តែមួយរយៈចុងក្រោយនេះ លោកបែរមកបញ្ចេញសកម្មភាពច្រៀងតាមខេត្ដ និងថតបទថ្មីៗជាទីចាប់អារម្មណ៍បានច្រើន បើគិតចាប់ពីតាំងពីលោកបានឡើងងារជាឧកញ៉ា ស្រពពេលគ្នានឹងលោកចូលបានចូលរួមរស់លើទ្រនំថ្មី គឺផលិតកម្ម Galaxy Navatra មក។

ប៉ុន្មានបទល្បីៗចុងក្រោយនេះ មានMV បទ “កុលាបមានបន្លា” ត្រូវបានមហាជនងាកមកចាប់អារម្មណ៍តារាចម្រៀងជើងចាស់ ព្រាប សុវត្ថិ កាន់តែច្រើន ខណៈគណនីFacebook និងTiktok រាប់រយគណនីរបស់បុគ្គលល្បីៗបានលើកយកបទនេះទៅត្រាប់តាម ដោយបង្ហាញពីការវិកាប្លែកៗតាមចំណង់ចំណូលចិត្ដរបស់ខ្លួន។ ហ្វេនៗ លេងស្ដាយមិនអស់ចិត្ដ ឥឡូវលោក ព្រាប សុវត្ថិ ក៏បបួលកូនៗ មកត្រាប់តាមមិនឲ្យចាញ់អ្នកគាំទ្រឡើយ៕