ធន់ ចាន់តាក់ ទទួលស្គាល់កំហុសរឿងឆ្លៀតវាយដៃគូ១កែងក្រោយចប់ទឹក

2025-03-17 01:24:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ធន់ ចាន់តាក់ បានធ្វើការប្រកួតក្នុងជំនួបមិត្តភាពជាមួយ Mbang Hen Eric ដែលត្រូវបានគេដាក់រហស្សនាមឲ្យថា កាន់តែខ្មែរ ក្នុងកម្មវិធីប្រកួតរបស់ស្ថានីយទូរទស្សន៍ CNC កាលពីថ្ងៃទី១៥ ខែមីនា ឆ្នាំ២០២៥ ។

ក្នុងការប្រកួតនោះមានវីដេអូបែកធ្លាយមួយគឺពេលដែលចៅក្រមប្រកាសចប់ទឹក ស្រាប់តែ ធន់ ចាន់តាក់ បានដើរទៅបម្រុងឱបកាន់តេខ្មែរ តែបែរជាឆក់វាយមួយកែងពេញ។ ដ្បិតតែមិនបង្កឲ្យមានរបួស ឬក៏បណ្ដាលឲ្យ កាន់តែសន្លប់ក្រោយពេលវាយមួយកែងនោះ ប៉ុន្តែទង្វើនេះបានធ្វើឲ្យអ្នកគាំទ្រគុនខ្មែរដែលបានឃើញវីដេអូនេះសម្ដែងការហួសចិត្តមួយខ្លាំងមែនទែន។

ទោះបីជាយ៉ាងណា សិស្សគុនខ្មែរក្នុងក្លិបលោក ធន់ សុភា រូបនេះបានទទួលស្គាល់ថា វាជាកំហឹងមួយឆាវដែលទប់អារម្មណ៍ខ្លួនឯងមិនបានទើបធ្វើរឿងមិនល្អដល់គុនខ្មែរមួយនេះ។ មែនទែនទៅពេលនោះខ្លួនគេពិតជាខុសមែន និងក៏បានធ្វើការសុំទោសភ្លាមៗទៅកាន់ កាន់តេ ដែរ ប៉ុន្តែបងប្អូនកម្ពុជានៅតែបន្តជេរមិនលើកលេង។

រឿងនេះមានបងប្អូនខ្លះចង់ឲ្យសហព័ន្ធគុនខ្មែរមានការដាក់ពិន័យដល់ ចាន់តាក់ ដែលធ្វើរឿងមិនគោរពដៃគូ ព្រោះបងប្អូនអ្នកគាំទ្រគុនខ្មែរយល់ឃើញថា វាពិតជាបានប៉ះពាល់ដល់កិត្តិយសគុនខ្មែរ ដែលបង្ហាញពីអត្តចរិតមិនល្អដល់សង្គម និងពិភពលោកទាំងមូល។ សូមបញ្ជាក់ថា កន្លងមក ចាន់ចាក់ មិនធ្លាប់ធ្វើរឿងខុសឆ្គងធ្ងន់បែបនេះទេ គេជាកីឡាករមានចិត្តធ្ងន់ម្នាក់ និងជាកីឡាករចាស់វស្សាម្នាក់ក្នុងវិស័យឈឺសាច់មួយនេះ៕