រាជដ្ឋាភិបាលកម្ពុជា តាមរយៈកិច្ចប្រជុំអន្តរក្រសួងនៅ​ថ្ងៃ​ទី៧ ខែឧសភា ឆ្នាំ​២០២៥ បាន​ត្រៀមឯកសារ និង​លើកទឡ្ហីករណ៍ជាច្រើនទាក់ទងនឹងតំបន់ទេសចរណ៍ប្រាសាទបុរាណចំនួន ២ ស្ថិតនៅ​ក្នុង​ទឹកដី​ខេត្ដតាកែវ។ កិច្ចប្រជុំបានផ្ដោត​លើការការត្រៀមខ្លួនដាក់បញ្ចូលភ្នំដា និងអង្គរបុរី ក្នុងបញ្ជីបេតិកភណ្ឌវប្បធម៌ពិភពលោក​ នៃអង្គការយូណេស្កូ។

កិច្ចប្រជុំដែលដឹកនាំ​ដោយ​លោកជំទាវរដ្ឋមន្ដ្រីក្រសួងវប្បធម៌ ភឿង សកុណា មន្ដ្រីជំនាញ​ផ្នែកបុរាណវិទ្យា និង​មាន​ការ​ចូល​រួម​ពីភិបាល នៃគណៈភិបាលខេត្ដតាកែវ លោក វ៉ី សំណាង​ ផង​នោះ បានដំណើរការចិច្ចប្រជុំលើក​ទី១ ជាមួយស្ថាប័នជំនាញ​ចំនួន ១១ផ្សេង​ទៀត។ រដ្ឋមន្ដ្រី និងមន្ដ្រីជំនាញ អាចនឹងបើកកិច្ចប្រជុំអន្ដរក្រសួងលើកទី២ ខណៈកិច្ចប្រជុំទី១ ក្រសួងវប្បធម៌ទើបបានស្ដាប់របាយការណ៍ពីភាគីពាក់ព័ន្ធ និង​ការ​បង្ហាញទឡ្ហីករណ៍មួយចំនួន។

សូមបញ្ជាក់​ថា ប្រាសាទ ភ្នំដា​ ស្ថិតនៅភូមិព្រែកតាផូ ឃុំគោកធ្លក ស្រុកអង្គរបុរី ខាងកើតទីរួមខេត្តតាកែវ ជាកន្លែងលិចទឹក៦ខែ និងគោក ៦ខែ​ ហើយ​មាន​ចម្ងាយ ១០២​គីឡូម៉ែត្រ​ពី​រាជធានីភ្នំពេញ និង​ ២៤គីឡូម៉ែត្រ​ពីទីរួមខេត្តតាកែវ។ វា​ត្រូវ​បានកសាងឡើងក្នុងសតវត្សទី៦ ក្នុងរជ្ជកាលព្រះបាទរុទ្រវរ្ម័ន ជាក្សត្រចុងក្រោយក្នុងសម័យអាណាចក្រភ្នំ ដើម្បីឧទ្ទិសដល់ព្រហ្មញ្ញសាសនា។

ប្រាសាទនេះ​ កសាងអំពីឥដ្ឋ ថ្មបាយក្រៀម និងថ្មភក់ ជារាងការ៉េ ជ្រុងនីមួយៗមាន១២ម៉ែត្រ និងមានកម្ពស់​ ១៨ម៉ែត្រ ពុំមានជណ្តើរទេ។ ទ្វា ៣ ជាទ្វាបញ្ឆោត និងទ្វា១ ជាទ្វាពិតនៅជញ្ជាំងខាងជើង ហើយជញ្ជាំងក្រាសខុសប្លែកពីប្រាសាទនានា។

ចំណែករមណីយដ្ឋាន អង្គរបុរី ជាអតីតរាជធានីដ៏ចំណាស់មួយរបស់ខ្មែរ​នាសម័យមុនអង្គរ គឺសម័យហ្វូណន​ ឬសម័យនគរភ្នំ។ ក្រៅពីប្រាសាទ និង​តំបន់ទេសចរណ៍បុរាណ​ទាំង​ពីរ​ តាកែវ ក៏ជាខេត្ដមាន​ប្រាសាទ និង​តំបន់ទេសចរណ៍បែបធម្មជាតិដ៏ទាក់ទាញ​ច្រើន​ទៀតដែរ។ ប៉ុន្ដែ​ក្រសួង​វប្បធម៌ និង​ស្ថាប័នពាក់ព័ន្ធ បាន​ចាប់​អារម្មណ៍​លក្ខណៈពិសេស​របស់តំបន់​ទេសចរណ៍ទាំង​ពីរ ទើប​គិតគូចង់ដាក់វាទៅជាសម្បត្ដិបេតិកភណ្ឌវប្បធម៌ នៃមនុស្សជាតិ៕